Conflictu llingüísticu ente l’alumnáu de Pedagoxía de la Universidá d´Uviéu.

L’asociación cultural N’ast denunció, nun comunicáu de prensa recibíu n’Asturnews, la discriminación de los alumnos de la Facultá de Pedagoxía que queríen emplegar l’asturianu nes orles de fin de carrera. N’ast denuncia que “dellos estudiantes plantegaron la posibilidá de facer les orles n’asturianu o billingües” recibiendo la negativa, a cualquiera de les opciones, como respuesta.

Xabel de Cea, presidente de N’ast y estudiante de pedagoxía púnsose en contactu col Colectivu d’Estudiantes de Pedagoxía (Coesped) y col Decanatu de la Facultá pa qu’entamen a trabayar, y posicionase, nesti conflictu.
Los estudiantes que quieren tener la so orla n’asturianu plantegaron la posibilidá de buscar otru establecimientu onde se ficieren orles diferente del que tradicionalmente trabaya cola Facultá de Pedagoxía, posibilidá tamién rechazada pola comisión d’estudiantes encargada de facer les orles, aduciendo qu’el sitiu onde se diben facer les orles “nun se diba cambiar y que se podíen facer n’asturianu anque pagando más”. Esta situación provocó que N’ast repartiera un escritu tituláu “Ser asturianu cuesta más” nel que denuncien la situación.