Compromisu por Xixón refuga la Clase de toréu pa neños.

Compromisu por Xixón refuga la Clase de toréu pa neños que se ta ufiertando dende l’Ayuntamientu, nun comunicáu de prensa nel que’l so voceru, Daniel Fernández, califica como “llamentable” educar a la infancia nel maltratu animal.

Daniel Fernández, voceru de Compromisu por Xixón, calificó de “llamentable” la Clase de toréu pa neños, que se va a realizar güei dientro de les actividaes de los 125 años de la Plaza d’El Bibio.

Pa Compromisu por Xixón, “ye increíble que’l Conceyu nun tenga prioridaes más importante pa gastar el dineru público que n’educar a los neños nel maltratu animal con clases de toréu” y aprofió que “el mesmu gobiernu que llinda les ayudes d’emerxencia social, gástase’l dineru nesti tipu d’actividaes”.

Dende Compromisu por Xixón señalen que “l’apueste por fomentar una afición polos toros rescampla, nuna ciudá onde nun esiste y nun da pa caltener l’actividá de la Plaza d’El Bibio, ya que los empresarios que les xestionen siempres dicen que tienen perdes, pero siguen presentándose pa xestionar la plaza, lóxicamente porque hai otru tipu de sofitos públicos anque se nieguen” y destacó que “tenemos una Alcaldesa, conceyala de mediuambiente para más inri, que declaró sagraos los toros en Xixón, y bien ciertu que va gastar lo que faiga falta por caltenelos”.

Finalmente Daniel Fernández calificó de “llamentable que na zona del Estáu con más refugu a los toros, tengamos un gobiernu municipal totalmente insensible al maltratu animal y que tien la caradura de dicir que nun hai dineru p’asuntos muncho más serios y éticos, pero sí pa clases de toréu”.