Compromisu esixe retira la denuncia contra integrantes del centru La Madreña

Fernando Villacampa, como voceru de Compromisu per Uviéu, solicitó esti día la retirada inmediata de la denuncia presentada pola empresa pública SEDES contra cinco integrantes del Centru Social La Madreña d’Uviéu. Dende Compromisu destaquen que “a La Madreña namá se-yos puede acusar de demostrar que los recursos públicos pueden ponese al serviciu de la mayoría social, en cuenta de especular con suelu públicu y empeñar la cuentes públiques, no que ye especialista’l Conceyu d’Uviéu”.

Compromisu señala que “la clase política asturiana gobernante utiliza a una empresa pública pa dar una llección a les persones comprometíes socialmente, una y bones la Conseyería de Salú ocupada por La Madreña yera un edificiu públicu a la espera del siguiente pelotazu urbanísticu, pa preste del conglomeráu político y empresarial que gobierna Asturies, y agora quedáronse ensin negociu por culpa d’esti colectivu”.

Pero tamién destaquen “la cobardía de los políticos asturianos, que nun s’atreven a dir de frente contra la sociedá civil, sinón qu’usen a una empresa pública controlada polos mesmos políticos que nos gobiernen”.

Pa Compromisu, resulta chocante cuantimenos que la web de SEDES defina a la empresa diciendo que “SEDES se configura como un proyectu estremáu, de marcaes raigaños sociales […] Xenerosidá frente’l conxuntu de la rexón […] característiques toes elles, empuestes a faer del proyectu una obra de toos y pa toos “, y en realidá ataca de frente y de manera feroz a un centru social que ta cubriendo en dellos casos servicios sociales importantes, que sumen adulces de les instituciones públiques gracies al enfotu rde facer retayos.

Compromisu resalta que “l’Alministración Pública tien dos opciones, o retirar la denuncia contra estos ciudadanos comprometíos cola mayoría social, o asumir les consecuencies de poner los recursos públicos al so serviciu en cuenta de al serviciu de la ciudadanía”.