CCOO pide la dimisión del Vicerrector de Profesoráu pol casu Alarcos

Comisiones Obreres pide la dimisión del vicerrector de profesoráu tres de la sentencia que fizo anular el contratu del fíu d’Alarcos pol so nomamientu a deu como profesor Ayudante Doctor.

La crítica del sindicatu céntrase na convocatoria de places d’Asociaos y Ayudantes Doctores que, con un procedimientu de manera totalmente innecesariu ya irresponsable, llevó alantre la Universidá d’Uviéu en 2013 (como CCOO denunció, magar ser desmentíos pol Rector), apocayá llevó al Tribunal Cimeru de Xusticia d’Asturies a confirmar una sentencia na que s’anula un contratu d’Ayudante Doctor por ser contratáu ensin concursu y por aciu nomamientu del Vicerrector de Profesoráu.

Les restricciones estatales a la contratación foron la escusa que diera’l Vicerrector de Profesoráu al repitíu incumplimientu de la llei y del reglamentu de concursos, que como desplica na so nota de prensa CCOO trai convocatoria oficial, nomamientu de tribunal, publica-ción nel BOPA, etc… Esto ye y foi siempres terminantemente falso sigún el sindicatu: “nunca hubo restricciones a la contratación temporal, solo a la indefinida. Nel ámbitu del PDI esto traduzse en que nunca hubo restricciones a la contratación d’Ayudantes, Ayudantes Doctores nin Asociaos, toos contratos de calter temporal. Solo les places de Collaborador, Contratáu Doctor y Profesor Titular d’Universidá son les que tuvieron restricciones. Nada esculpa l’actuación del Vicerrector de Profesoráu, ante la confirmación de la sentencia y la manifiesta violación de la llei, tien de dimitir o, de nun faelo, ser destituyíu nel plazu más curtiu pol Rector”.

Nel casu de la plaza oxetu de la sentencia, del Departamentu de Filoloxía Clásica y Románica, la nota de prensa de Comisiones desplica que “nun hubo «comité» o pseudocomité dalgunu de selección. Anque’l Vicerrector pretendió forzar a la Comisión de Docencia d’esi Departamentu a que fixera una selección a manera de comité de contratación (al marxe, poques gracies, del reglamentu), esta negárase pola illegalidá del procedimientu”.

CCOO esixi, amás de la depuración de responsabilidaes, “una negociación inmediata col Rector pa buscar una solución negociada. CCOO defende que se dexe al PDI de la Universidá d’Uviéu poder desenvolver el nuesu llabor ensin respigos innecesarios y cola llexitimidá que dexe una carrera académica planificable y ascendente nes distintes figures”.