Portada Sociedá Bueno llama a los conceyales de Xixón “incultos y analfabetos” por tener que pidir la so Fundación les subvenciones como les demás

Bueno llama a los conceyales de Xixón “incultos y analfabetos” por tener que pidir la so Fundación les subvenciones como les demás

by asturnet

El filósofu y profesor eméritu de la Universidá d’Uviéu, Gustavo Bueno, manifestó’l martes que’l Conceyu de Xixón retiró la subvención de 12.000 euros a la Fundación qu’él mesmu preside por “incultos y analfabetos”, mentantu que’l conceyal encargáu precisaba que lo que tien de facer la entidá que preside’l conocíu filósofu ye solicitar l’ayuda mediante convocatoria.

Sigún Europa Press, el filósofu dixo lliteralmente que “el Conceyu piensa que na Fundación facemos Xuntes escontra’l PSOE”. El profesor de Filosofía realizó estes manifestaciones a Europa Press momentos enantes d’aconceyase la Comisión pa la Recuperación de la Memoria Histórica creada pol alcalde d’Uviéu, Gabino de Lorenzo, pa cambiar el nome de les cais franquistes y de la que Bueno forma parte. El filósofu asturianu, qu’aseguró que s’enteró pola prensa de la retirada de la sovención, esplicó qu’hai dos niveles diferentes. Nel primeru, dixo, “el Conceyu de Xixón pue retirar la sovención ensin dar nenguna esplicación”, y nel segundu, manifestó, que la “represalia” nun foi por dalgo tan puntual como la publicación del so llibru ‘Zapatero y el pensamientu Alicia. Un presidente nel país de les maravilles’, sinón por dalgo más “global”.

Gustavo Bueno dixo entender que la ‘Selmana Negra’ “ye dalgo que atrai a munches persones y que’l mundiu de la filosofía ye dalgo pa unos pocos”. Amás, detacó que la Fundación “fai un gran llabor y convida a xente de toa España y d’América”.

Bueno manifestóse nestos términos dempués de que’l Grupu Municipal Popular aletara ayeri, per mediu del conceyal Manuel Pecharromán, de que’l Conceyu de Xixón retirara la sovención qu’anualmente recibía de 12.000 euros.

Pela so parte, el conceyal de Cultura del Conceyu de Xixón, Justo Vilabrille, negó que’l Conceyu denegara una sovención a la Fundación Gustavo Bueno, pa la celebración del so alcuentru anual. Según l’edil, “nun hai nenguna decisión de tipu políticu nin ideolóxicu” que se tenga en cuenta a la hora d’otorgar sovenciones. Nesti mesmu sen pronuncióse güei’l voceru de la Xunta de Gobiernu del Conceyu de Xixón, José María Pérez, qu’aseguró que “nun se-y denegó a nenguna entidá la so subvención pal 2008”. El responsable municipal precisó que lo que debe facer agora la entidá que preside’l conocíu filósofu ye solicitar l’ayuda mediante convocatoria.

Tamién te podria gustar