Bimenes acueye los II Alcuentros Alternativos y populares

Bimenes va acoyer esti mes de setiembre los “II Alcuentros Alternativos y populares” convocaos por “Asturies de pies” que sol lema Contra la farsa institucional del 8 de setiembre (Día d’Asturies) va desenvolver delles actividaes a lo llargo de los díes seis y siete na capital del conceyu.

Nuna nota de prensa espublizada esti día, Compromisu por Asturies sofita estos alcuentros por considerar que “la situación de crisis actual foi xenerada pola actuación d’una casta políticu-empresarial que vien dirixiendo dende va décades Asturies y qu’ante l’ausencia d’un proyectu de país, conduciónos a una situación de ruina económica na qu’a la clase trabayadora asturiana y a la mayor parte de la so ciudadanía vien resultándo-y acaldía más difícil llegar a fin de mes y aportar a unes condiciones de vida mínimes”.

Asina, pa Compromisu, “la dificultá d’amplios sectores de la población al accesu a les enerxíes necesaries (gas, eletricidá), a la vivienda, a les melecines, o’l deterioru brutal de los servicios públicos, forma parte, por desgracia de la nuesa realidá cotidiana”.