asturnet

Iniciativa pol Asturianu va celebrar esti xueves 31 de xunetu un concursu “Pasopallabra” colos alumnos de la UABRA, según facía anuncia esti dia na so web. Basáu nel esitosu programa de televisión, el concursu va facese a partir de les 22,30 hores na Disco Zaycor, en Cangas del Narcea y bien cerca de les instalaciones de la Universidá Asturiana de Branu (UABRA), de l’Academia de la Llingua Asturiana, onde estos díes Iniciativa pol Asturianu tien amás instaláu un puestu informativu y de venta de productos.

Los interesaos en participar nel concursu pueden apuntase nel puestu o al traviés de los miembros d’Iniciativa pol Asturianu que tán nos cursos. Animamos a participar nesta actividá lúdica pero tamién reivindicativa que va sirvir pa recaldar fondos pal trabayu de la entidá.

Amás, el llunes 4 a lo llargo de tola xornada, un equipu del proyectu televisivu d’Iniciativa pol Asturianu, “Alderiques d’Asturies” va tar grabando un reportaxe sobre los cursos nes instalaciones de Cangas del Narcea. Facese sociu d’Iniciativa pol Asturianu demientres los cursos de la UABRA tien premiu, un llibru de regalu, que podrás pasar a buscar pel puestu de la organización.

Les rempuestes del Gobiernu español a les entrugues plantegaes por Andecha Astur al traviés del diputáu Rafael Larreina, tendentes a determinar si efeutivamente les dificultaes pa la escolarización de la nuesa llingua y la precariedá llaboral de los sos ensiñantes débese rialmente a la falta de collaboración del Ministeriu d’Educación español, punxeron una vegada más n’evidencia a la Conseyería de Cultura y a la so titular,Ana González Rodríguez, que recurrió a esta escusa pa xustificar la bien deficiente escolarización del asturianu.

Concretamente, la rempuesta que diera el Gobiernu español nun almite duldes porque dizse testualmente: “La Administración Educativa de la Comunidad Autónoma del Principado de Asturias será la encargada de poner en marcha los recursos necesarios, tanto personales como materiales o de cualquier otro tipo, para el estudio de dicha lengua en las aulas, incluido el profesorado que la impartirᅔ

Andecha denunciaba esti día que “con esta rempuesta queda claramente determinada que la responsabilidá ye del “Principado”, tantu no que se refier a la deficiente escolarización del asturianu como a la inxustificable situación de precariedá llaboral na que caltien al profesoráu de dicha llingua, quedando de manifiestu la so falta de voluntá política pa la nomalización llingüística n’Asturies, y les sos llamentables artimañes pa evitar asumir responsabilidaes”.

En cualisquier casu, dende Andecha Astur atalanten que “la situación na qu’el “Principado” caltien a la nuesa llingua ye antidemocrática ya inxustificable, y que denguna midía que nun parta de la reconocencia llegal de la oficialidá de la llingua asturiana nun ye más qu’una chambonada y un entretener a la sociedá asturiana mientres se sigue conculcando’l so drechu a utilizar la propia llingua nel propiu país”.

Izquierda Xunida denuncia que’l Gobiernu del PP, con Wert a la cabeza, auspicia la espansión del negociu de les universidaes privaes mientres desprestixa a les públiques, nun comunicáu qu’asoleyaba ayer l’Área Federal d’Educación d’IX. Nelli alviertese de que la nueva normativa que prepara’l ministru al traviés del Decretu-Llei de Creación y Reconocencia d’Universidaes “quier consagrar que les comunidaes autónomes puedan revocar l’autorización de funcionamientu a les universidaes públiques o de los sos centros que nun cumplan una serie d’esixencies mínimes, previsión qu’hasta agora namái se contemplaba pa los centros privaos”.

Izquierda Xunida, al traviés de la so Área d’Educación, denuncia la espansión del negociu priváu na Educación qu’auspicia’l Gobiernu del PP, esaniciando requisitos p’abrir nueves universidaes privaes y facilitando que les comunidaes autónomes puedan cerrar universidaes públiques al traviés del nuevu decretu-llei de creación y reconocencia d’Universidaes que prepara”.

Dende 1997 les universidaes privaes abondaron na xeografía estatal de la mano del PSOE y del PP, pasando de 12 a 32, ente que nun s’abrió nin un solu campus públicu y caltiénense los 50 qu’había. A estes 32 xúnense 5 nuevos proyectos, los dos más recién na Comunidá de Madrid, onde’l númberu de privaes doblaría yá casi al de públiques. Sicasí, nestos 17 años nun varió sustancialmente el númberu d’estudiantes universitarios.

El coordinador de l’Área Federal d’Educación d’IX, Enrique Díez, denuncia que la repitida frase llanzada por altos responsables del Gobiernu de Mariano Rajoy de que ‘hai demasiaes universidaes’, “tendría de ser fiel a la verdá y afirmar ‘hai demasiaes universidaes privaes’. La última universidá pública llevantóse va trés llustros y, sicasí, nesi tiempu, el númberu de privaes multiplicóse por dos”.

Na mesma llínea, Díez señala que “la mayoría de los informes preceptivos emitíos pola Conferencia Xeneral de Política Universitaria fueron negativos. Señalen defectos graves nos proyectos de creación de nueves universidaes privaes y na práctica totalidá d’ellos sorráyase la falta d’encaxe de la ufierta de titulaciones propuestes, por innecesaria, nel marcu de la programación general”.

Magar que munches d’elles nun axuntaben tolos requisitos esixíos -con un 30% de profesores doctores, cuando’l mínimu de Bolonia ye’l 50%-, nin garantizaben la calidá docente (la universidá ‘online’ Manuel Ayau patrocinada por una naviera, una empresa de talasoterapia y de tresportes frigoríficos asitiase nuna casa de 23 metros cuadraos), nin una mínima actividá investigadora que nun paez se-yos rentable (el 99% de la investigación faise nos centros públicos), los distintos gobiernos autonómicos autorizaron l’apertura d’estos negocios privaos’ universitarios que se convirtieron en fábriques de expender títulos a bon preciu.