asturnet

La Fundación Belenos vieno acabante d’asoleyar esta selmana pasada’l númberu 34 de la so revista, “Asturies, memoria encesa d’un país”, na qu’amás de les estayes habituales, como Memoria Gráfica d’Asturies, nesta ocasión firmada por Antón Álvarez Sevilla y dedicada a apurrir dellos datos ya imáxenes sobre les nueses races autóctones nun asoleyaos enantes en trabayos de so, y Cartafueyos de Belenos, la espublización recueye trabayos de munchu interés como’l firmáu por García Arias alrodiu del celtismu llingüísticu n’Asturies.

La llista d’artículos d’esti númberu 34 entámala “Averamientu a la ecoloxía de los conceyos asturianos del Altu Navia” por Fernando Montes García y síguela “Una reflexón sol celtismu llingüísticu asturianu” de Xosé Lluís García Arias, tres del que pue lleese l’artículu “Afayu d’una estela con decoración castreña n’Antrialgu (Piloña)” por mor de la investigación d’Ástur Paredes, Daniel Cueli Canto y Alberto Álvarez Peña.

Completen esti númeru dellos otros artículos como “El guerreru durmiente” d’Alberto Álvarez Peña; “El palu: un arma na tradición asturiana” de Gausón Fernande Gutierri, “Catalogar pa protexer: el padremuñu etnográficu del conceyu de Cabrales” de Diego Ruiz de la Peña Ruiz y Alberto Álvarez Uría y “El “Celta o Astur”, una escultura de Folgueras” de Lluis Portal Hevia. El caberu de los artículos col que se pieslla’l númberu ye “Cill Áirne: trenta años d’un viaxe iniciáticu a la verde Erín” firmáu por Ignaciu Llope.

La revista va distribuyise ente los suscriptores nos prósimos díes y yá se pue mercar nes llibreríes Ojanguren (Uviéu), Paradiso (Xixón) y Rima (L’Infiestu).

Esti próximu sábadu 16 d’agostu celebraráse un “Ancontro Blogueiros de l Praino” na comarca portuguesa de Miranda dl Douro, que comparte llingua con Asturies, y onde la llingua asturiana, nomada ellí “mirandés”, tien reconocencia oficial. Nestos actos participarán represenantes d’entidaes de tol dominiu llingüísticu. Los representantes asturianos serán Iniciativa pol Asturianu y xunta ellos tarán Faceira de Lleón, Furmientu de Zamora, la entidá asturlleonesa El Teixu y l’Associçón de Lhéngua i Cultura Mirandesa.

Los actos van entamar a les 9 la mañana cola presentación del pendón del llugar, visita al llugar y llectura de versos en toles variedaes del dominiu llingüísticu. Darréu de la xinta, celebráse una rolda d’intervenciones que va abrir Amadeu Ferreira, de l’Associaçon de Lhéngua i Cultura Mirandesa. De siguío, Fernando Álvarez-Balbuena, d’El Teixu va falar “De Llenguas y Fronteiras”, “Mirandeses y llioneses: Dous Puebros Vecinos y Hermanos” sedrá la charra de Ricardo Chao, de Faceira.

Pela parte d’Iniciativa pol Asturianu, representada pol so presidente, Inaciu Galán, daráse llectura a la conferencia “¿Qué podemos facer xuntos pola nuesa llingua?”, echando’l pieslle a les charres. La conferencia va parase nes distintes acciones que dende la entidá asturiana camienten que ye posible poner en marcha pa trabayar a favor de la llingua común compartida por asturianos, lleoneses y mirandeses, mesmo nel ámbitu llocal, como nel internacional, onde la situación de la llingua asturiana preocupa a entidaes como’l Conseyu d’Europa, la UNESCO o l’Altu Comisionáu de Drechos Humanos de la ONX.