asturnet

Nun comunicáu asoleyáu recién, les árees d’Educación y Mocedá d’Izquierda Xunida d’Asturies amuesen “so más fondu refugu escontra la torpeza y falta de sensibilidá cola que’l Rectoráu de la Universidá d’Uviéu trató’l cambéu nel réxime de permanencia, no qu’afecta al númberu de creitos qu’han ser superaos pa poder matriculase nesti cursu” darréu dela noticia de qu’un númberu significativu del alumnáu va tener que treslladase de carrera o d’Universidá.

Pa IX, “cuando s’acomete una reforma de tanta importancia (falamos nada menos de les condiciones qu’han de cumplir los estudiantes pa poder siguir cursando los sos estudios) l’afayadiza divulgación del cambéu realizáu ye un deber d’un bon gobiernu universitariu, espliquen dende estes dos árees de la coalición. Al so xuiciu, llamentablemente, constátase qu’esi llabor divulgativu nun foi realizáu, pos atopamos con alumnos que nun van poder matriculase (a pesar de tener aprobaes la mayoría de les asignatures de segundu y terceru) por tener delles asignatures de primeru suspenses”.

Sigún les árees d’Educación y Mocedá de la coalición “si lo supieren con antelación, estos estudiantes dedicaríen el so tiempu a aprobar eses asignatures previes, en llugar d’estudiar y aprobar asignatures de terceru, que, paez ser, agora nun-yos van sirvir de nada, ya que van vese espulsaos de la Universidá. Les árees d’Educación y Mocedá d’IX esperen que la Universidá sía consciente del erru que cometió al nun anunciar perbien esta midida, y que conceda un periodu de prórroga a los estudiantes que s’atopen nesta situación”.

Dende Izquierda Xunida d’Asturies apuesten “pola conciliación de los estudios universitarios cola vida llaboral y les dificultaes personales y familiares de los estudiantes. Esto fai que, en determinaes ocasiones, sía imposible pal alumnáu aprobar les asignatures por cursos, ente que sí lo ye aprobar delles asignatures de distintos cursos. Poner una llende de creitos pa poder matriculase en cuartu, y afitar un númberu mínimu de creitos en primeru, va claramente contra l’espíritu de conciliar los estudios universitarios cola vida llaboral y les dificultaes personales, daqué que, a xuiciu de la nuesa formación, ye clave pa poder tener un sistema educativu superior *verdaderamente universal, esto ye, pa tol mundu, independientemente de si l’alumnáu precisa simultáneamente trabayar o curiar a un pariente”.

Con too y con eso, creen qu’esta reforma podría tener una resultancia bien distinta, siquier, en cuanto al númberu d’alumnos escluyíos, si anunciárase afechiscamente, de forma que los alumnos de la Universidá d’Uviéu modificaren les sos prioridaes a la de preparar unes asignatures o otres, colo que dalgunos cumpliríen el requisitu de los 48 creitos de primeru, llogrando asina garantizar la so permanencia.

Tres un conceyu celebráu nos últimos díes en Xixón ente miembros de les direutives de la Casa d’Asturies en Valencia y d’Iniciativa pol Asturianu, llegóse al alcuerdu de poner en marcha un cursu d’asturianu de forma conxunta nel llar d’esti centru asturianu asitiáu en territoriu valencianu.

Iniciativa pol Asturianu, que tien entamaes iniciatives formatives d’esti tipu en territoriu asturianu y en cursos a distancia, va echar un gabitu pa poner en marcha esti programa formativu, entregando materiales y guiando’l cursu, collaborando na so difusión y participando del procesu formativu.

Dende Iniciativa pol Asturianu nun podemos tar más satisfechos por esta nueva iniciativa de la que se va dar anuncia con más detalle a lo llargo del mes de setiembre. Felicitamos a la Casa d’Asturies en Valencia pol usu que fai yá davezu y con normalidá de la nuesa llingua y por esta iniciativa qu’aguardamos seya l’entamu de más collaboraciones. Animamos a otros centro asturianos a collaborar con nós n’iniciatives asemeyaes a esta.

Emilia Vázquez, diputada d’IX d’Asturies na Xunta Xeneral, vieno acabante entrugar esti día a la Conseyería d’Educación pola situación llaboral de los trabayadores que desenvuelven el serviciu d’intérpretes de llingua de signos por aciu una contratación esterna nos centros d’educación Primaria, Secundaria, Bachilleratu, y nos ciclos y Programes de cualificación profesional inicial.

La diputada entruga si la Conseyería tien previstu abrir pa esti cursu o siguientes una bolsa de trabayu pa intérpretes de llingua de signos qu’empresten los sos servicios en centros educativos y en casu de nun ser asina, si considera que, a los efectos de la valoración de costos llaborales de la ufierta económica, ye d’aplicación el Conveniu Colectivu Xeneral de Centros y Servicios d’Atención a Persones con discapacidá; cómo garantiza l’órganu de contratación el cumplimientu de la ufierta en relación a los derechos retributivos de los trabayadores como’l derechu de subrogación, l’antigüedá y otros contemplaos na lexislación vixente, y, a lo último, si contempla en dalguna de les circulares o instrucciones de funcionamientu de la mesma Conseyería, les competencies y obligaciones d’estos profesionales, más allá de la mera traducción directa, no relativo a los llabores educativos de coordinación, preparación de materies y coordinación colos equipos d’orientación y los profesionales intervinientes nel procesu educativu de cada alumnu o alumna.

La diputada esplicaba nuna información asoleyada ayeri qu’estes 12 persones, amás de los que realicen les sos sustituciones, ven perxudicaos los sos derechos llaborales y retributivos yá que al ser contrataos de forma esterna pa la prestación d’esti serviciu utilízase como criteriu básicu la ufierta económica más ventaxosa y les meyores del ofertante. Les baxes na llicitación repercuten nel amenorgamientu del salariu y derechos llaborales de los trabayadores. A manera d’exemplu, el salariu que se xenera per hores trabayaes d’un trabayador o trabayadora a xornada llaboral completa apenes supera los 700 euros.

Amás, a estos trabayadores que cumplen pa con una función educativa, nun se-yos ta aplicando’l conveniu que análogamente sería-yos d’aplicación, al nuesu entender, el Conveniu Colectivu Xeneral de Centros y Servicios d’Atención a Persones con Discapacidá (BOE 243, de 9 d’ochobre de 2012). Ye ciertu qu’esclúi a l’alministración, pero nesti casu nun se trata de personal de l’alministración sinón qu’empresten servicios nésta.

Na opinión dela diputada “ye obligación de l’alministración non solo velar pol aforru económicu na prestación del serviciu, innegable, sinón qu’hai de velar, tamién, porque les ufiertes presentaes cumplan cola llegalidá vixente. Ente otres, que los costos de personal afayense al conveniu, pos, de nun ser asina y nun xustificase esti estremu, la ufierta nun tuviera de ser considerada”.