asturnet

La ‘Mocedá d’IX’ señala que les valoraciones de Felipe VI sobre la mocedá “demuestren una visión idílica de la so grave situación y suponen una socarrona burlla” a quien sufre la crisis. Carlos Martínez Núñez, coordinador federal de la Área Federal de Mocedá, señala que “quien colen nun lo faen mayoritariamente p’aprender idiomes o formase, y de fechu los meyores celebros del nuesu país tán na so mayoría infrautilizados nos sos llugares d’acoyida y nun realicen trabayos que desenvuelvan les sos habilidaes y les sos carreres”.

L’Área Federal de Mocedá d’Izquierda Xunida considera que les valoraciones realizaes ayeri pol xefe del Estáu, nes qu’encamentó a la/vos moces a trabayar fora del nuesu país pa formase y, d’esta forma, aprender idiomes y adquirir pervalibles esperiencies “demuestren una visión parcial ya idílica de la grave situación personal pola que traviesen miles de mozos y suponen una socarrona burlla a tolos trabajadore/as que sufrimos les consecuencies d’una crisis que ta bien llueñe d’unviar”.

Carlos Martínez Núñez, coordinador federal de ‘Mocedá d’IX’, señala que “con más de 700.000 mozos y moces que tuvieron qu’abandonar les sos families y les sos cases pa buscase la vida n’otros países por aciu trabayos precarios y mal remuneraos, amás de les altes tases d’emplegu xuvenil nel Estáu español, estes palabres de Felipe VI seríen bien ‘guapes’ si non fora pola cruel realidá qu’escuenden”.

Casu, Sobrescobiu, Llaviana, Samartín del Rei Aurelio y Llangréu, los cinco conceyos de la CUenca del Nalón, vienen acabante d’aprobar en caún de los sos plenos la declaración de conceyos llibres de racismu, xenofobia, homofobia, machismu y apoloxía del nazismu. L’apautamientu produzse pol enfotu que dende va unos meses distintes entidaes sociales, culturales y polítiques de la cuenca del Nalón vienen amosando cola introducción y aprobación d’una moción en cada un de los plenos del Valle pa que dichos conceyos se declaren Conceyu llibre de racismu.

D’un tiempu acá tán rexistrandose actitúes racistes nel valle, que van dende l’agresión fisca a dalgún inmigrante, al insultu, les pintaes, amenaces… Nunos momentos de crisis y de necesidá na población siempre ye fácil que surdan esti tipu de comportamientos o simpatíes pa con ellos. La falta d’un verdaderu analís pola mayor parte de la población fai que sía más fácil asumir mensaxes racistes, que plantiase realmente quien ye’l responsable de la situación actual. Por casu na tema llaboral, la culpa nun ye de les muyeres o los inmigrantes que cobren menos que los homes de nacionalidá española, sinón de los empresarios que s’aprovechen y esploten a losl trabayadores de distinta forma, reproduciendo l’argumentu machista de pagar menos a les muyeres pola so condición de muyer o a los inmigrantes pola so situación d’estranxeru.

Güei como siempres el racismu adopta formes diverses en distintos países, anque con un nexu común, alimentándose de prexuicios discriminatorios, refugando la cultura y los valores ayenos, y traduciéndose en conductes que van dende la negación de derechos y el hostigamiento hasta la violencia y llimpieza étnica.

Ta viéndose l’apaición d’organizaciones xuveniles con claros enclinos nazis y fascistes nel valle, y temíen la implantación d’organizaciones polítiques de les mesmes característiques. Organizaciones que se ponen una piel de corderu y escuenden campañes qu’afalen a la xenofobia y al odiu racial detrás de campañes asistencialistes de recoyida d’alimentos por poner un exemplu.

Diches organizaciones utilicen el despreciu y la violación de los derechos humanos y llibertaes fundamentales, acompañándose de doctrines de diferenciación o superioridá, científicamente falses, moralmente condenables y socialmente inxustes y peligroses.

Nos conceyos de la cuenca, consideren esti tipu d’actividaes non solo daqué totalmente refugable y denunciable, sinón un actu d’hipocresía y esmemoria hestórica. Esmemoria, “porque nun fai muncho que sufrimos les garres d’una dictadura franquista, esmemoria, porque en toes y cada una de les families de les cuenques hai daquién que tuvo qu’emigrar nun tiempu, yá fora nos 60, los 70, los 90 o na actualidá, y porque dende fai munches xeneraciones la cuenca foi la casa pa miles y miles de persones que vinieron d’otres partes a trabayar a la mina y a conformar la sociedá que güei somos. Dende estos colectivos, tenemos claro, que la llucha contra la crisis ye una llucha política, una llucha pa defender los nuesos derechos y el nuesu futuru, xunto a tolos sectores oprimios y esplotaos de la sociedá, tengan la nacionalidá que tengan”.

Por esti motivu, la inmensa mayoría de les organizaciones polítiques, sindicales y sociales con presencia nes cuenques impulsaren estes mociones y llamen a nun collaborar en nenguna de les sos campañes, que cola escusa de “aidar” a families precisaes pretenden introducir l’odiu y la división ente nós, a nun aceptar la so propaganda xenófoba, y a nun frecuentar los locales de quien fomenten esta ideoloxía.

MOCIÓN APROBADA EN TOLOS CONCEYOS DEL VALLE, COMO CONCEYU LLIBRE DE RACISMU, XENOFOBIA. HOMOFOBIA, MACHISMU Y DE APOLOXÍA AL NACISMU.

• Qu’esti conceyu en Plenu declare contrariu a tou enguizamientu al racismu, xenofobia, homofobia o cualesquier otra manifestación d’enguizamientu al odiu. Y que se declare contrariu a cualquier apoloxía del nazismu. • Que dende esti Conceyu se contacte coles asociaciones y entidaes que trabayen nesti campu pa llevar a cabo xornaes de concienciación ya integración sobre otres races, cultures, etc. • Y dende esti Conceyu se siga lluchando sollertes por que nun pueda introducise nel nuesu conceyu nengún elementu que de pies a fregaos o pronunciamientos xenófobos o racistes, actuando contundentemente con tolos preseos que la llei tenga a mano. • Coles mesmes, declarar a esti conceyu, como Conceyu Llibre de racismu, xenofobia, homofobia machismu y d’apoloxía del nazismu. Organizaciones promotores de la iniciativa: Adepavan – Asturies en Pie! – Asociación de Mujeres Afectadas de Endometriosis ADAEC (Asturias) – Ateneo Republicano de Langreo – CAVASTUR – CSA La Semiente – CSI – Colectivu de Muyeres Les Filanderes – Darréu – El Militante – Estaya de La Memoria l’Altu Nalón – Intervalo – Izquierda Anticapitalista – IU – Muyeres del Carbón – Para@s y Precari@s d’ Asturies – PCE – PCPE – Podemos – PSOE – Sindicato de Estudiantes – Soldepaz Pachakuti – U.C. de CCOO del Nalón – U.C. de UGT del Nalón – UJCE.

Iniciativa pol Asturianu vieno acabante de denunciar esti día que la nueva marca de calidá pa sidreríes nun usa la llingua de la sidra, l’asturianu, polo que reclama un cambiu pa impedir una oportunidá perdida d’usar l’asturianu nel nome del sellu, como un elementu más que suma identidá a una marca que quier identificar a la sidra d’Asturies. El gobiernu asturianu daba hai poco’l preste a un nuevu sellu de calidá al que podrán acoyese sidreríes que demuestren poner procuru n’aspectos como l’echáu o que tengan característiques singulares, escaeciendo dafechu l’usu del asturianu.

Pala Asociación, “siempre ye estimulante y constructivo premiar la calidá y el bon facer y pueden dar munchu xuegu no comercial y no turístico. Pero nun puede caenos embaxo, por embargu, la falta d’usu del asturianu nel nome de la marca”: “Sidrerías de Asturias, Calidad Natural”.

Pa Iniciativa pol Asturianu “esta ye una falta incomprensible y decepicionante, sobre manera tratándose de dalgo circunscrito al ámbitu asturianu y nun entornu tan tradicional y onde l’asturianu tien una presencia tan mayoritaria, como campu de la sidra”.

Nuna nota de prensa asoleyada esti llunes, Iniciativa quier decxar afitao que “na gran mayoría d’establecimientos del país, l’asturianu úsase con total normalidá en diferentes niveles, dende lo esperable nos nomes (la mayoría de los chigres tienen el nome n’asturianu), pasando per lletreros como “Nesti chigre pue cantase”, “homes” o “muyeres” nos baños, “abierto” y “pesllao”, hasta l’usu oral, que nel ámbitu sidreru ta mui vivu. Tamién hai exemplos de sidra etiquetao n’asturianu, como L’Allume o Castañón, ente otros”.

Y tamién que “notros llugares onde la sidra tamién ye tradicional, casu del País Vascu, términos como “sagardotegi” (sidrería), “sagardoaren lurraldea” (territoriu sidreru), o’l del ritu del “txotx” preséntense al visitante como daqué inseparable del productu que se-y ofrez. Esiste ellí la etiqueta “Sagardo Gorenak” (sidra superior), la cual que pueden algamar les marques de sidra más sobresalientes”.

Pa Iniciativa pol Asturianu ye necesario que la marca recueya tanto na so propuesta como nel so desendolcu, “l’usu del asturianu como un elementu a tener en cuenta nos parametros p’acoyese a la mesma, asina como que’l propiu sellu de calidá tenga’l nome na nuesa llingua “Sidreríes o Chigres d’Asturies, Calidá Natural”. Y ye que lo que se viende ye tamién la esperiencia, un pedazu de la cultura, una escena de los nuestros vezos y l’idioma ye una parte tresversal ensin la que’l conxuntu queda incompletu ya incoherente. La particularidá cultural ye un valor añadío qu’atrapa l’interés de los visitantes y el nun la enarbolar ye un menospreciu de lo de puertes pa dientro y un desaprovechamientu de puertes pa fuera”.