asturnet

El pasáu miércoles 11 de marzu presentábase en Xixón un videu promocional de l’Asociación de Queseros Asturianos y la páxina web del sellu de calidá AQA (Asociación de Queseros Artesanos del Principado de Asturias), que tien como fin la promoción de los quesos artesanos d’Asturies y qu’aconceya a más de cuarenta queseríes. Y la Xunta pola Defensa de la Llingua Asturiana facía díes depués una crítica al usu nulu de la llingua asturiana nesta promoción de los productos asturianos, inda más cuando esti videu de presentación y esti sellu de calidá tienen collaboración pública de la Conseyería d’Agroganadería y Recursos Autóctonos.

El videu de promoción de l’AQA nun ye un casu aisláu de maltratu y diglosia pa cola llingua asturiana na promoción de los productos asturianos, sigún la Xunta Pola: “nestos años vienen publicándose dellos anuncios de sidra, carne de xata roxa asturiana y d’artesanía d’Asturies, ente otros, que nun respeten de nenguna manera l’asturianu nin el gallego-asturianu y que s’escuden na promoción esterior d’estos recursos pa usar namás el castellanu, en cuenta d’una difusión d’un videu nes llingües propies d’Asturies y una subtitulación nes llingües que sían pa los territorios a los que se pretenda llegar, como’l castellanu, inglés, chinu, etc”.

Con too, la principal crítica de la Xunta pola Defensa de la Llingua Asturiana “ye’l mieu a facer un usu normal de la llingua pa promocionar los productos d’Asturies, igual que se fai nes otres zones del Estáu onde hai una llingua propia diferente del castellanu: en tolos casos de publicidá con dineru público de los productos gallegos, catalanes y vascos, la llingua vehicular ye’l gallegu, catalán o aranés y el vascu, respectivamente, con una posterior traducción o subtitulación a otres llingües. Tamos énte un sector que xenera empléu y actividá económica y que tien que se concienciar de la so asturianidá pa poder vender al esterior un productu de calidá con una identidá diferente a lo que se pueda atopar n’otros sitios y asina consiguir la visibilidá que tien que tener pal gran públicu”.

Na nota de prensa na qu’asoleyaben so descontentu, la Xunta quería dexar bien afitao que “nestos tiempos de crisis y recortes, col idioma como ún de los primeros afectaos pola época económica mala, nun se pue entender que nun s’use l’asturianu cuando nun cuesta dineru la so aplicación a un trabayu d’edición nuevu: los queseros y queseres que participen na promoción, si l’AQA tuviere apreciu pola llingua, podríen facelo perfectamente n’asturianu, sin tener un coste añadíu a la preparación del videu”.

Dende’l próximu 28 de Marzu nel Centru d’Alcuentros y Creatividá, allugáu nen L’Entregu, na antigua Sierra del Trabanquín, va ufrise la Esposición más grande realizada n’Asturies alrodiu de les figures Playmobil que cumplieron 40 años d’Hestoria hai poco. “Los Clicks reconquisten Asturies” ye’l títulu d’esta esposición creada con figures Playmobil que van representar en dioramas acciones y escenes bien variaes.

Dende los pirates al espaciu, pasando pel vieyu oeste, ya inclusive xanes y trasgus, o una mina asturiana con castillete, xaula y galeríes, hasta la mesma recreación de la batalla de Cuadonga con Pelayo a la cabeza, y otres más, hasta completar na nave principal con 200 metros cuadraos de dioramas de distintes temátiques.

En collaboración cola Asociación de coleccionistes de Clicks (AESCLICK) va facese’l montaxe nos próximos díes pa que nun falte detalle nesta Esposición única, onde la recreación d’estos espacios produciránla 34 persones. Ente los montadores atópense nueve integrantes de la fazaña del Llibru Guiness de los Record con figures Playmobil, que foron axuntar 68.808 Clicks nuna sola esposición.

Como novedá nesti tipu d’esposiciones, ta creándose un serviciu de audioguía que fai posible l’acercamientu de conocencia sobre la temática recreada. Estos guiones dan conocencia sobre distintos aspeutos culturales y significativos d’Asturies.

La empresa alemana Playmobil, con fábrica n’España, va sortear ente los asistentes distintos llotes de xuguetes y dexará material pa l’amuesa espositiva.

Amás d’esta vinculación con Asturies, cada unu de los dioramas va ser dedicáu a un personaxe vivu, que tenga que ver cola acción del diorama y que sía asturianu. D’esta manera tan orixinal queremos rindir homenaxe a persones asturianes pola so conocencia, trabayu o dedicación. Amás tase iguando un calendariu de charres culturales colos asturianos escoyíos pa ser homenaxaos.

Con tou esto tamién se va realizar el PRIMER CONCURSU NACIONAL DE CUSTOM PLAYMOBIL que consiste na creación de figures nes que s’usen distintes técniques pa consiguir un Playmobil únicu y distintu. El visitante va escoyer los ganadores por votación.

El Conceyu de L.lena abre mañana, y hasta el 20 del presente mes, el plazu pa la recepción de solicitúes pa participar nel plan d’empléu local ‘L.lena contrata’, al traviés del cual van crease 12 puestos de trabayu como peonos de servicios múltiples. La llista provisional d’almitíos y escluyíos va publicase’l 23 de marzu, y el día 26 va conocese’l llistáu definitivu, previu periodu de reclamaciones. Les pruebes teóriques van realizase’l día 30 de marzu nel Hotel d’Asociaciones, y el 6 d’abril conoceranse les propuestes de contratación.

Nes bases d’esti plan d’emplegu incorpórense distintes novedaes, como que la contratación ta destinada a persones integrantes d’unidaes familiares con un mínimu de dos miembros, que s’atopen en situación de desemplegu y onde la media de les retribuciones mensuales de tolos miembros de la unidá familiar demientres l’añu 2014 nun superaren el 50 per cientu del Indicador Públicu de Renta d’Efectos Múltiples (IPREM) mensual establecíu pal referíu añu.

Nun se van computar como ingresos les ayudes económiques d’emerxencia social, ayudes económiques de sofitu a families, y beques d’estudiu Nes anteriores convocatories el requisitu yera que tolos miembros de la unidá familiar, incluyíu’l solicitante, s’atoparan en situación de desemplegu y nun percibieren nengún tipu de prestación nin subsidiu. Agora namái tendrá de tar desemplegáu’l solicitante del puestu.

Otra de les novedaes ye que na valoración va tenese en cuenta, amás del empadronamientu (que yá cuntaba), que’l solicitante sía mayor de 55 años y que nun cobre prestación o subsidiu, y que cunte con un periodu cotizáu mínimu de 10 años. Esaníciase’l requisitu de tener esperiencia llaboral en puestos similares. El 7 per cientu de les places va ser cubiertu por persones con discapacidá igual o superior al 33 per cientu. La teniente d’alcalde, Gema Álvarez, esplicó que la intención ye que “los trabayadores escoyíos empiecen nel Conceyu la primera quincena d’abril”. Recordó que “con esti sistema de contratación, opten a un emplegu por un periodu de seis meses y, una vegada concluyíu, pueden aportar demientres dos años más a l’ayuda familiar”.