asturnet

La Conseyería de Cultura y Deporte del Principáu empecipió los trámites pa protexer doce llugares d’Asturies nos qu’esiste una clara vinculación ente un texu monumental y hestóricu y una ilesia perteneciente al nuesu patrimoniu cultural, que formen un conxuntu indixebrable que ye precisu protexer de forma íntegra. Con esta midida preténdese, sobremanera, protexer unu de los legaos más significativos de la hestoria, cultura y tradición d’Asturies: vieyos árboles hestóricos que nes últimes décades tán sumiendo o sufriendo agresiones bien dañibles, por cuenta d’obres pocu cuidadoses colos árboles y la so redolada.

Va utilizase pa esta protección la categoría de Sitiu Hestóricu, reconocida na Llei de Patrimoniu Cultural d’Asturies de 2001 y qu’hasta la fecha nunca nun s’aplicare. La Llei define un sitiu hestóricu como aquel llugar venceyáu a acontecimientos d’interés hestóricu singular, a tradiciones populares o a creaciones culturales relevantes, dexando la so protección al traviés de la so declaración individualizada como Bien d’Interés Cultural. Igualmente, l’artículu 69.2 d’esta llei señala que se va valorar, a efectos de la so protección individual, l’interés etnográficu que puedan tener “llugares venceyaos a tradiciones populares, ritos y lleendes especialmente significativos”, señalándose nesti artículu tamién que “la rellación tradicional ente’l mediu físicu y les comunidaes humanes que los habitaron” constitúi un posible elementu etnográficu a protexer.

Munchos d’estos exemplares de texu sustitúin o son descendientes d’otros asitiaos nos mesmos llugares, sitios que ye probable que fueren espacios de cultu antes de la estensión de la relixón cristiana.

Los sitios que se van protexer son los siguientes:

-Ceñal, en La Collá (Siero), onde esiste un texu de gran porte venceyáu a los restos de l’antigua ilesia parroquial, del sieglu XVI-XVII, amburada mientres la Guerra Civil.

-Santa Coloma (Ayande), onde hai dos texos (unu d’ellos declaráu Monumentu Natural) venceyaos a la ilesia parroquial, del sieglu XV.

-Santibanes la Fonte (Ayer). El texu ye de los más destacaos d’Asturies, con 3,5 metros de perímetru, ente que la ilesia ye un relevante exemplu d’arquitectura gótica modificada en dómina renacentista y moderna. Nesti casu, el texu y l’ilesia cunten yá cola máxima protección (Monumentu Natural y Bien d’Interés Cultural, respectivamente), tratándose agora d’avanzar escontra una xestión unificada de dambos elementos. -Rozadas (Bual), onde esiste un conxuntu de cuatro texos alliniaos al pie de la ilesia de San Blas, que se xune a un grupu de texos familiares” asitiaos al pie de les cases.

-Montoubu (Miranda), onde coesisten un texu d’un porte impresionante, con 3,5 metros de perímetru, una ilesia parroquial del sieglu XVI y los restos d’una torre defensiva baxomedieval.

-Martul (Vilanova d’Ozcos), onde nel campu de la ilesia de San Xuan el Degolláu esiste un gran texu de 3,5 metros de perímetru.

-Peruelo (Quirós), onde un gran texu convive coles ruines de la ilesia gótica de Santolaya.

-Arangas (Cabrales), onde s’alcuentra unu de los mayores texos d’Asturies, de más de cinco metros de perímetru, al pie de la ilesia parroquial de San Pablu, fundada na segunda metá del sieglu XVI.

-Samartín del Mar (Villaviciosa), onde coesisten un texu de 3,2 metros de perímetru y una ilesia del sieglu XVIII.

-L’Abadía Cenero (Xixón), onde esta’l míticu texu de L’Abadía de L’Abadía Cenero, llantáu en 1786, al pie de la ilesia de San Xuan Bautista, d’orixe románicu.

-Abamia (Cangues d’Onís). Nesti llugar simbólicu de la hestoria d’Asturies coesisten dellos texos cola ilesia de Santolaya, románica y que’l so orixe remontar al entamu de Reconquista.

-Samartín de Salas (Salas). Nel campusantu, al pie de la ilesia de Samartín d’orixe prerrománicu, álzase unu de los texos más impresionantes d’Asturies, declaráu Monumentu Natural..

Con esta midida, Asturies da un pasu bien importante na xestión del so patrimoniu medioambiental y cultural, tendiendo escontra una mayor coordinación de les polítiques de caltenimientu en dambes materies. Ye una midida pionera a nivel estatal cola que se pretende, n’última instancia, llograr la pervivencia d’un elementu natural de tanta relevancia cultural como ye’l texu, garantizando la so coesistencia harmónica col Patrimoniu Cultural d’Asturies, que dende siempres tuvo una vinculación bien estrecha con esti árbol.

Coles mires de sorrayar el caltenimientu y puesta en valor de los texos históricos, el Xardín Botánicu Atlánticu de Xixón va acoyer los próximos 1 y 2 de marzu unes xornaes que lleven por títulu “Xestión y Caltenimientu de Texos y otros árboles históricos”. Más de 180 persones confirmaron yá la so presencia nesti cursu gratuitu, entamáu pola Conseyería de Cultura y Deporte y el Xardín Botánicu. Reconocíos naturalistes, escritores, conservadores y técnicos especialistes na xestión d’árboles van ufiertar conferencies a tolos asistentes. Les charres van sirvir de puntu de partida pa la celebración d’una mesa redonda, moderada pol naturalista y escritor Ignacio Abella, que se va celebrar na tarde del xueves 1 de marzu. Na mañana del vienres visitarán los texos de L’Abadía Cenero y Ceñal, rematando con una visita a la Cabayera d’El Tragamón, nel Xardín Botánicu.