asturnet

Ilustrísimes autoridaes, señores académicos y académiques, amigos y amigues:

Asistimos a la celebración d’esti XXXIII Día de les Lletres Asturianes nuna situación d’esceicionalidá. Esceicionalidá que vien marcada a nivel del estáu por una crisis económica ensin precedentes na historia recién y, a nivel d’Asturies, por una crisis d’estabilidá política con perfondes implicaciones socio-económiques y culturales.

Na Academia de la Llingua Asturiana somos conscientes d’esta situación y, darréu d’ello, quiximos facer un actu del Día de les Lletres non convencional.

Venimos de dar voz a distintos asturianos y asturianes, persones dueites toes elles, carauterizaes pol so compromisu con Asturies y pol so amor a esta tierra. Ellos acaben d’ufrinos les sos reflexones y propuestes sobre la política cultural y llingüística que’l nuesu País pue llevar alantre nestos momentos críticos. A toos-yos damos les gracies poles sos aportaciones y pola sinceridá y valentía con que les planteguen. Gracies, en nome de l’Academia ya nel mio propiu nome, a Pilar Rubiera, a Lluis Arias, a Paz Rendueles, a Lisardo Lombardía, a Ricardo Saavedra y a Pedro Suárez. Munches gracies.

La crisis económica tamién afeuta direutamente al funcionamientu de la nuesa institución, y aféutala gravísimamente. L’Academia ye una institución con una fonda implicación social; poro, ye una institución especialmente sensible y razonable en cuantes a los esfuerzos que toos debemos facer tanto individual como coleutivamente. Pero, en tou casu, el criteriu esixible nestos casos ye’l de la proporcionalidá y nós esiximos esa proporcionalidá: baxar el presupuestu de l’ALLA un 40% nun paez razonable y lleva apareyao, amás, que la institución nun puea llevar alantre los sos cometíos fundacionales, venceyaos, ensin dulda, a la meyora de la vida social y cultural asturiana. Dende equí pidimos a los nuevos dirixentes políticos del Principáu que se rectifique una decisión presupuestaria dafechu inaceptable.

Ya nun paréntesis, dellos númberos (que se puen ver na prensa escrita gallega d’estos díes) pa la reflexón: les academies (o instituciones asemeyaes) de comunidaes con llingua propia como Galicia, País Vascu o Cataluña reciben esti añu del gobiernu central la cantidá de 682.000 euros caúna, a lo qu’hai qu’amestar la financiación de los respeutivos gobiernos autonómicos. Nel casu de l’Academia gallega, por exemplu, en 2011 esta aportación foi de casi 300.000 euros, pero fuerces polítiques gallegues piden a la xunta de la comunidá autonómica vecina que la financien cola mesma cantidá que lo fai l’estáu, esto ye con otros 682.000 euros. Y nós, nada del gobiernu central, porque l’asturianu nun ye llingua oficial, y un 40% menos del gobiernu de nueso.

Nós persabemos que la política cultural faise, en dómines de crisis, enforma más difícil dende’l puntu de vista de la so tresllación social, pero nun mos engañemos, nun hai crisis que xustifique la renuncia a los derechos culturales y llingüísticos, como nun hai crisis que xustifique la perda de los derechos humanos más elementales. Y el derechu al usu de la propia llingua ye un drechu reconocíu pola Organización de les Naciones Xuníes como derechu humanu fonderu, lo mesmo que pola Declaración Internacional de los Drechos Llingüísticos. N’efeutu, convién nun escaecer que, cuando pola mor d’argumentos socio-económicos se cuestionen otros derechos humanos, podemos cayer en situaciones de déficit democráticu o, dacuando, nel totalitarismu políticu; exemplos a esgaya d’esto tenémoslos na convulsa vida política del sieglu pasáu.

Pero centrémosnos na Asturies de güei. Lo que nun se fixo nes époques de bonanza, porque nun supimos o nun quiximos (o nun quixeron), hai que facelo agora en materia de política llingüística, porque nun se pue aguardar muncho más: necesitamos racionalidá, planificación y xusticia. Y asina, por exemplu, un elementu de racionalidá (ya inclusive de rentabilidá económica) ye la reconocencia de la especialidá de llingua asturiana pal profesoráu d’Educación Primaria y Secundaria; un elementu de planificación ye’l diseñu d’un verdaderu procesu de recuperación llingüística n’Asturies; un elementu de xusticia (l’únicu almisible) ye’l qu’empobine a un procesu aicionáu de reconocencia de la oficialidá de la llingua asturiana.

Hai muncho andao. Llueu de tantos años sabemos qué ye lo que funciona y xenera consensos sociales y cuálo sedría cuestionable acordies cola situación d’anguaño. L’Academia de la Llingua Asturiana lleva décades pensando qué facer nesti terrén. Sabemos cómo, a qué ritmos y con qué oxetivos se pue facer p’algamar una Asturies, asturiana sí, pero tamién, cosmopolita y moderna y amestada a les llinies del progresu social que fixen les dinámiques internacionales.

En definitiva, nós queremos collaborar nel llogru d’una sociedá asturiana abierta, non escluyente y dinámica culturalmente. Y queremos facelo lloñe de complexos y rocees pasaes. Nesti sen, el nuevu Gobiernu d’Asturies ha tener la seguranza de la nuesa llealtá porque de lo que tamos falando nun ye solo (y ello ye fundamental) del futuru económicu de nueso, sinón que tamos refiriéndonos, cenciellamente, al futuru d’Asturies como pueblu, futuru que nun ye dable sin un futuru pa la llingua asturiana.

Munches gracies.

¡Puxa Asturies!

Ana Mª Cano, a 6 díes andaos del mes de mayu de 2012.

Pa toa esa xente que piensa que, porque lleven años y años inorándonos, mintiéndonos y estafándonos, vamos danos. Pa toa esa xente que cree que va doblanos una clas política y una élite burocrática y económica mediocre y incompetente. Pa toa esa xente hai que manda-yos un mensaxe bien claru: la reivindicación permanente va ser la respuesta.

Nes ultimes décades fuimos quien a construyir un movimientu social humilde y dignu con capacidá pa entamar campañes, reclamaciones y demostraciones unitaries, de valor y de compromisu. Un movimientu social que ye’l vehículu d’espresión de les esixencies de la comunidá de falantes d’asturianu. Un movimientu reivindicativu que pon nel centru del debate ciudadanu y políticu la llingua asturiana y el so futuru.

Esti Día de Les Lletres llega depués d’un añu de tiempu perdíu, parálisis y inmovilismu. La nuestra clas política, que nun supo qué facer coles sos atribuciones y que nun quixo cumplir los sos deberes, sigue igual que siempre. Con unos nomes o con otros, sigue igual que siempre. Y les poques novedaes, faltaría más, son pa peor, p’abrir camín al discursu de la negación y l’odiu, pa negar la xusticia y la evidencia.

Esi aparatu de los partíos, esa burocracia política insensible colos derechos llingüísticos yá fiede. Esi aparatu ye’l que lleva tantu tiempu negándonoslos. Esi poder ye’l que inora les lleis vixentes y fai de la omisión y el pasotismu la so bandera permanente.

Por eso hai que trabayar pa qu’eso cambie. Hai que trabayar pa que l’airón de la nuestra indignación arrastre’l so inmovilismu y la so axenda oculta de desaparición de la nuestra llingua. Nun merecemos una clas política que nun pue facer que sía llegal lo que ye de xusticia.

La confirmación del Tribunal Supremu de que ye illegal poner un mínimu d’alumnos pa dar clas d’asturianu en Secundaria ye la muestra. Tuvo que venir la xusticia a dicir a los responsables d’Educación anteriores qu’eso nun ye llegal.

Tenemos que facer que los próximos gobiernos sían los del cumplimientu de la llexislación llingüística, los del cumplimientu de la toponimia, los de la xeneralización de la enseñanza, los de los medios de comunicación n’asturianu, los del usu en toles alministraciones.

Tenemos que facer que l’Estatutu se reforme yá y se reforme cola oficialidá. Nun valen les disculpes, nun val dicir qu’agora la cosa ta mal; porque, cuando tuvo bien, ¿qué fixeron? Nada. Nunca fixeron nada por reconocer llegalmente los derechos que tienen ciudadanos d’otres comunidaes del Estáu.

Ye tiempu de nós, d’axuntanos, d’analizar en conxunto, de reforzar la reivindicación llingüística y les sos bases teóriques, d’actualizar les actividaes y los discursos énte los cambios na realidá y na sociedá. Esta ye la manera de siguir conectando cola xente, de llevar la nuestra llucha a tolos sitios, a tolos sectores.

Esti ye un tiempu difícil tamién. La crisis económica, amás d’afectar al bolsu y a los puestos de trabayu de la xente, ta repercutiendo gravemente na industria pequeña qu’usa l’asturianu y cree nello. Que ciarraren toles llibreríes especializaes o que desapaeciera l’únicu periodicu n’asturianu son una prueba clara. Amás, los recortes de les Alministraciones tán cebándose cola cultura. Nel casu del asturianu, con un presupuestu yá probetayu, la mengua de les subvenciones podría repercutir mui negativamente nel sector editorial y musical nel nuestru idioma, que nun pue sobrevivir ensin una política d’apoyu públicu. Amás, la desapaición de les partíes destinaes al sector priváu y a les entidaes locales afectaría negativamente na concepción social del idioma como una llingua válida pa tolos ámbitos.

A too esto hai que sumar que’l Gobiernu asturianu sigue ensin cumplir cola Llei d’Usu y Promoción, que, anque curtia, ye la llexislación llingüística qu’hai. La recuperación de la toponimia, que diba a pasu lentu, nun vio nesta última llexislatura nengún espediente aprobáu y la propia Alministración nun usa les formes oficiales. El porcentaxe d’emisión n’asturianu na RTPA nun llega nin al 2%. Otra manera, na educación, les circunstancies yá conocíes de precariedá de l’asignatura tán faciendo que l’asturianu siga marxinao en toles etapes imposibilitando que les xeneraciones nueves apriendan l’idioma y dexando la tresmisión xeneracional nuna situación dramática.

Sicasí, como vieno faciendo a lo llargo de les últimes décades y a pesar de los tiempos complicaos nos que vivimos, el movimientu de reivindicación llingüística va siguir esixendo lo que ye de xusticia, sabedor de que la mayoría de los problemes mentaos enantes podríen solucionase col reconocimientu de los nuestros derechos llingüísticos.

Tamién nos prestaba contavos que nun tamos solos na llucha. Que nestos díes de celebración pa la llingua asturiana sentimos y recibimos el sofitu, el calor y l’animu de munches partes, de muncha xente, dende Aragón o Cataluña hasta Frisia o Bretaña. Sitios onde la xente, y sobre too la mocedá, tamién ta dando la cara pol futuru de les sos llingües.

Y ye qu’hai que recordar que tamién la llexislación europea ta con nós. Esta seronda va publicase l’informe de siguimientu de la Carta Europea de les Llingües Minoritaries del Conseyu d’Europa, que va alertar de la involución drámatica de les polítiques llingüístiques en tol Estáu y pal casu asturianu va reforzar la recomendación ineludible de la oficialidá.

Ye verdá que ta malo de facese oyer nestos tiempos, pero la defensa del nuestru idioma ta perriba de circunstancies coxunturales, por mui abegoses que seyan, porque tamos nuna carrera contra reló contra’l desaniciu. Mentes quedemos xente lleal a la llingua, vamos siguir demostrándolo tolos díes, en toles ocasiones, na escuela, nel trabayu, nes cais… Vamos conquistar un futuru pa la nuestra llingua y pa la nuestra sociedá.

¡L’asturianu, llingua oficial!