asturnet

La organización N’ast entama una campaña antitaurina esti branu. Pa la organización nun ye entendible que “cuando n’Asturies tamos viviendo un momentu de fuerte cris social ya identitaria”, s’apueste “otra vuelta pol espardimientu del flamenquismu na nuesa tierra nun enfotu d’anular la cultura propia del País”.

N’ast califica esti fechu como “estratexa d’aculturación, aprovechando l’actual situación de descomposición folclorica de la estructura sociocultural específica d’Asturies”, que camienten “ta empobinada a sustituir unes pautes culturales y unes referencies identitaries como comunidá nacional por otres que fomenten l’alienación de la población en rellación al propiu territoriu col envís de llexitimar socialmente’l marcu de subordinación política y dependencia estructural d’Asturies al respective del Estáu español, garante de los intereses económicos de los oligarques d’un llau ya otru del cordal cantábricu”.

Poro, N’Ast, “como organización sectorial del Movimientu de Lliberación Nacional Asturianu que trabaya l’ámbitu cultural”, reivindica con esta campaña “la dignidá patria énte l’agresión permanente qu’implica la imposición del flamenquismu, que nun escaezamos que ye la variedá más rancia, reaccionaria ya etnocéntrica del nacionalismu españolista”, espliquen.

Les persones interesaes en collaborar na campaña pueden ponese en contautu con N’ast en L’Ayalga (cai Prendes Pando 11, Xixón) o nel corréu Nast.oficialida@gmail.com

Emmanuel Le Merlus, activista pola llingua bretona, ta de visita estos díes per Asturies, dempués de recorrer 17.000 km y más de 28 estaos col oxetivu de promover la diversidá cultural y el conocimientu mutuu ente les minoríes llingüístiques d’Europa. Esti viaxe ta patrocináu poles escueles en llingua bretona, pola Oficina de la Llingua Bretona, pol Institutu de la Cultura Bretona y pol Conseyu Rexonal de Bretaña.

A lo llargo d’estos díes, va aconceyar con dellos representantes del movimientu de reivindicación llingüística (Xunta pola Defensa de la Llingua Asturiana), d’Instituciones (Academia de la Llingua Asturiana), representantes políticos y educativos y con medios de comunicación.

Amás celebró un alcuentru cola prensa nel Conceyu Abiertu d’Uviéu, onde espresó la so opinión sobre la situación de la llingua asturiana, comentando “nun entender cómo l’asturianu sigue ensin ser oficial”.

Blogue del viaxe

La organización Iniciativa pol Asturianu emitía estos díes una nota de prensa na que recuerden que “l’asturianu ye una ventaya a la hora d’anunciase”. Como exemplos ponen les campañes «Aforra les perres pa les vacaciones, la cesta la compra regálatela Caudalia» o «Teas onde teas siempres ye bon momentu pa tornar a casa», que califiquen como “namás dos exemplos de grandes empreses que se sumen a les permunches iniciatives d’otros negocios asturianos”, en referencia a los restoranes Tierra Astur, qu’entamó una campaña billingüe xugando cola cercanía del idioma a la hora d’afalagar el calter familiar de los sos llocales y los sos clientes y Caudalia, un centru comercial allugáu en Santuyano (Mieres), que fai usu de la llingua d’Asturies pa una campaña de promoción.

Dende esta asociación en defensa del idioma destaquen “la importancia de que n’Asturies el so comerciu emplegue l’asturianu con naturalidá, dalgo que per otra parte tendría que ser habitual como asocede n’otres comunidaes españoles, ya que’l papel de la normalización ye una responsabilidá individual y coleutiva, tanto de les entidaes públiques y privaes”.

Iniciativa pol Asturianu anunció amás que vien “contautando y roblando convenios con delles empreses pa la inclusión del idioma n’ámbitos como la toponimia, la páxina web o l’etiquetaxe”. Ello ye que la organización quier afalar a les empreses a apostar pola llingua en tolos casos, entendiendo con estos exemplos que “l’asturianu nunca nun ye un pilancu o un impedimentu sinón una fonte de riqueza, un incentivu económicu y una ventaya qu’ofrez cercanía y familiaridá”.