asturnet

El prósimu xueves día 27 d’avientu, a les 20 h., na Sala Loreto, en Colunga, celebraráse un conciertu de villancicos, aguilandos y cantares ñavidiegos usaos na tradición asturiana y acompangaos con instrumentos como panderos, gaita, vigulín, bandurria, gaita rabil, sonaxes, xiblates y voces. Nesti actu, amás, presentaráse la recuperación d’un villancicu asturianu del añu 1721 y podremos ver imáxenes de dalgunes mascaraes d’iviernu.

Pa ello, contarase cola presencia de tres músicos asturianos, Pedro P. Sanjurjo, Laura Fernández y Dani García de la Cuesta, que tienen esperiencia abondo na recuperación del patrimoniu astur y que trabayen en diferentes formaciones o escueles de música.

Dixebra va echar el piesllu a la temporada d’esti añu 2012 con un conciertu na sala Tribeca d’Uviéu’l próximu domingu día 23 d’avientu (21:00 hores), con entrada de 10 euros anticipada y 12 en taquilla. Hai más de dos años que la banda avilesina nun actúa na capital asturiana, colo que s’espera un mui bon ambiente, el repertoriu que van interpretar a lo llargo de cerca de dos hores inclúi temes de toles sos époques y estilos, dándose la circunstancia de que dellos de los cantares que lu formen van desapaecer d’él, polo que probablemente va ser la última vez de poder disfrutar en vivo con ellos.

La razón nun ye otra que la renovación que van facer del «set list» pa la temporada viniente, onde van dir enxertanto pieces inédites que van formar parte del so discu nuevu, que tien prevista la salida a lo llargo del 2013.

Esti añu que ta a piques d’acabar representó pa Dixebra ún de los más granibles de la so carrera, asina empezaba cola publicación del trabayu discográficu especial tituláu XXV. 1987-2012, por cuenta del so venticinco aniversariu. Tamién foi’l tiempu del so reconocimientu y valoración como una de les bandes más importantes del panorama musical asturianu, como queda afitao col recibimientu del Premiu Amás d’Honor, la Gaita d’Oru de la Banda de Gaites L’Alborecer de Castrillón, el gallardón Acción Cultural de La Voz de Avilés, el Pegollu de los Premios Andrés Solar o la distinción de la Banda de Gaites Villaviciosa.

Amás de too ello la revista Rock Estatal escoyía a la formación como una de les cien más influyentes nel Estáu español, al llau de nomes perconocíos de la escena rockera. Por últimu, esta selmana presentábase’l llibru Un país llamáu Dixebra (Ediciones Seronda), onde’l periodista y escritor Francisco Álvarez fai un repasu pola hestoria y les lletres de la banda.

Ediciones Seronda y la Estaya de la Llingua del Conceyu d’Avilés organicen la presentación del llibru “Un país llamáu Dixebra. La historia y les lletres de la banda decana del rock n’asturianu (1987-2012)”, que va tener llugar el xueves, 20 d’avientu, a les 20 hores, nel Palaciu de Valdecarzana, asitiáu na cai’l Sol. Nel actu van intervenir Román Álvarez, conceyal de Cultura d’Avilés; Francisco Álvarez, autor del llibru, y los miembros de la banda Dixebra, qu’al acabar la presentación van protagonizar una firma de llibros.

El volume del Anuariu de la Música Asturiana correspondiente al presente añu 2012 yá ta na cai de la mano de Goxe Producciones, con él son trece los númberos consecutivos editaos d’esta publicación nacida nel 2000. Nel «Entamu» d’esta entrega nueva los responsables manifiesten el so enfotu de volver al orixe d’ella y recuperar los oxetivos colos que nació, amás d’afirmar que siguen «creyendo firmemente na necesidá d’un proyectu como ésti, no imprescindible de que la música del país tenga un órganu d’espresión, un escaparate onde amosar los sos llogros y esmoliciones, que dea una visión de conxuntu, que la refuerce interna y esternamente».

Tocántenes a los conteníos, nes sos 94 páxines, apaecen entrevistes a La Tarrancha, al grupu astur-chilenu de folk Ta Fechu o al músicu Pablo Canalís; un estudiu sobre polítiques musicales y alministración autonómica; reseñes sobre los intérpretes desapaecíos Concha’i Tresmonte y Puru; cróniques del I Sol Celta d’Avilés, el I Festival Arcu Atlánticu de Xixón, el XVI Festival Intercéltico d’Occidente de Tapia y el I Refaciendo Tradiciones de Caldones (Xixón); reportaxes fotográficos del conciertu conmemorativu del venticinco aniversariu de Dixebra y de la sesta edición del Premiu al Meyor Cantar n’Asturianu; un informe sobre la baxada de conciertos y la so repercusión ente los grupos del país; comentarios sobre los discos nuevos de Mariluz Cristóbal Caunedo, Toli Morilla o Soncai System; un diariu sobre’l procesu de creación, grabación y presentación del trabayu Llume de Xera; artículos d’opinión o sobre los músicos tradicionales nel conceyu de Salas; amás de la sección «Anuncies» con reseñes de lo más destacao nel panorama musical asturianu del añu. Too ello vien coles firmes de persones perconocíes nesta estaya de la cultura asturiana, como pueden ser Xosé Ámbas, Xandru Martino, Adolfo Camilo Díaz, Ignaciu Llope, Xicu Ariza, Alberto Álvarez Peña o Llorián García.

Aparte d’estos y otros conteníos l’A.M.A. 2012 recueye, como ye vezu, toles producciones discográfiques, bibliográfiques y audiovisuales que tienen a la música tradicional asturiana o cantada n’asturianu como protagonista y que s’editaron nos años 2011 y 2012. Nesta ocasión la sección llamada «Collecha» ye doble pola ausencia d’ella nel volume del añu pasáu, del que nun foi responsable nin Goxe Producciones nin el so director, Xune Elipe.

Otra cuestión importante ye la recuperación del discu col que s’acompañó dellos años, asina xunto cola revista regálase un cedé tituláu Esbilla sonora 2011-2012 conteniendo ventidós temes repartíos por estilos (tonada, tradicional, banda de gaites, folk, canción d’autor, rock y jazz), onde se repasen les grabaciones más importantes d’esi periodu, con grupos y artistes como Mariluz Cristóbal Caunedo, Anabel Santiago, les bandes de gaites Camín de Fierro y Llariegu, Tuenda, Pandereteres de Fitoria, Asturiana Mining Company, Tejedor, Ta Fechu, Toli Morilla, Alfredo González, Soncai System, La Tarrancha, Fala Non Caduca, Dixebra o la Big Band de Xixón.

L’Anuariu de la Música Asturiana 2012 tien un preciu de 5 euros (revista más discu) y pue adquirise nos puntos de venta oficiales: Uviéu (L’Esperteyu), Xixón (Trisquel, Llibrería Paradiso y C. S. Sestaferia), Avilés (El Cafetón y El Cabanón), Mieres (L’Abellugu, Habana y Musical Miler), Siero (El Cuévano), Tinéu (Llibrería Asturias), Villaviciosa (La Esbilla), Nava (La Naveta), Santu Adrianu (El Sabil) y La Pola Llaviana (Caparina).

Con esta entrega nueva Discos L’Aguañaz, agora integrada nun proyectu más ampliu llamáu Goxe Producciones, recupera la cabecera d’esta publicación yá tradicional nel panorama musical asturianu d’estes feches y asoleya’l so compromisu con esti sector y tolos sos integrantes.

Por cuenta de la celebración del Día Internacional de los Drechos Humanos, los Conseyos de Mocedá d’Uviéu y Asturies y Amnistía Internacional, entamen un Festival Hip Hop polos Drechos Humanos’ el 20 d’avientu a les 19 hores, na sala Tribeca d’Uviéu (Plaza de Riego). Van Actuar Dark la Eme, Matiz & Tesis, amás de dellos DJ’s. L’accesu ye llibre y de baldre.