asturnet

Esti mozu ribeseyanu diose a conocer cuando en 2012 y con otros compañeros del so institutu preparó “L’Equipu A-stur”, un trabayu audiovisual pa clas qu’acabó por convertise nun fenómenu na rede. Dempués la so obra púnxose seria con “Tempus” un curtiu que llegó a proyectar nel Festival Internacional de Cine de Xixón, xunto a otros proyectos. Agora platégase rematar el que sedrá’l primer llargometraxe n’asturianu. Una película que como él mesmu cuenta a Asturnews surdió de delles entrevistes que fizo sobre la figura de Bernabé, un fugáu bien conocíu nel oriente d’Asturies.

La idea surdió a raiz del documental “Xente”, que grabó va dos años. Nesi procesu, esplica, “atopo munches vegaes la figura de Bernabé y grabo dellos testimonios del personaxe cola idea de dalgún día facer daqué con ello”. Dempués del ésitu de “Tempus”, Casanueva volvió a Bernabé “pa facer un guión colos testimonios que tenía recoyíos”. Sobre la hestoria esplica que “dalgunes cosuques tán supuestes pero la mayoría del guión tien base en testimonios de xente de la zona”, anque reconoz que “ye cuasi imposible asegurar la veracidá d’estes hestories”.

Ente les dificultaes atopaes a la hora de “refacer” la vida de Bernabé tán, según esplica’l director de la película, que “la figura de Bernabé sirvió como disfraz pa muncha xente qu’atracaba o mataba en nome d’él” y que “la xente cuenta la hestoria según-y paez, unos cuenten una cosa d’una manera y otros d’otra”. El guión trata de reflexar una serie de testimonios como exemplu, reconoz, “nun ye que Bernabé ficiera esactamente lo que se va ver na película, pero ye cuasi imposible asegurar lo que fizo en realidá”.

Pa Pablo Casanueva esti proyectu audiovisual “ye un mou de mostrar les coses que pasaron nesti país nun va munchos años”. Amás, recuerda que’l tema “ta mui vivu tovía, muncha xente conoció a Bernabé ya interésense pol proyeutu, yo creo que puede tener salida, polo menos nel oriente d’Asturies, onde actuó Bernabé”, reflexona.

Pal director l’usu del asturianu como llingua de la película taba claro “dende’l primer momentu sabía que si diba facer daqué, diba ser n’asturianu, ye la llingua na que me contaron les hestories y ye la llingua na que falo”, esplica. La película faise con presupuestu cuasi cero “los medios son los mínimos, l’equipu de producción ye bien cenciellu, yo al tema de imaxe y mios pas al tema d’ambientación”, esplica.

La película, que ñació como curtiu y acabó convertida en llargometraxe nun tien sovención de nengún tipu nin ayuda económica nenguna. Casanueva esplica cómo se va faciendo “funcionamos a base de collaboraciones, una muyer déxate la cocina de so casa pa grabar, un paisanu déxate una zamarra, otru una camisa… ye too asina”. En cuantes al equipu d’interpretes Casanueva esplica que “los actores son toos amigos y conocíos, que de manera totalmente altruista tán collaborando cola película, al igual que tola demás xente”. El protagonista, y actor más implicáu nel proyectu dende un entamu, ye Fernando Martínez, qu’interpreta a Bernabé.

Yá queda poco pa poder ver esti proyectu audiovisual completáu “no que ye’l rodaxe propiamente dichu tamos na parte final, fáltennos dos o trés secuencies más o menos”, esplica Casanueva. “Calculamos que pa Mayu tará finalizada anque la distribución nun la tenemos clara tovía, si que mos prestarían facer presentaciones pa que la xente pudiera vela, pero tamién mandala a concursos y festivales”. Pablo Casanueva, Pablín pa los munchos amigos que collaboren nel so proyectu tienlo claro “de momentu vamos acabar el llabor y acabalu bien”. Pronto Bernabé, esti fugáu perconocíu nel oriente d’Asturies, volverá a la vida nes pantalles d’Asturies gracies a esi llabor de Pablo Casanueva, una de les nueves y más prometedores promeses del audiovisual asturianu.

Trailer