Portada Sociedá Asoleyen un calendariu de muyeres creadores d’arte

Asoleyen un calendariu de muyeres creadores d’arte

by asturnet

Como n’años anteriores dende la Secretaria de la Muyer de la Confederación Intersindical, a la que pertenez SUATEA, fízose’l calendariu que, según espliquen “yá vien siendo una seña d’identidá dientro de la nuestra organización”.

L’oxetivu fundamental d’esti calendariu ye’l de visibilizar la obra de les muyeres en distintes facetes a lo llargo de la hestoria, tomando ún o dellos exemplos pa cada mes.

Nesta octava edición el calendariu “Tiempu de muyeres, muyeres nel tiempu” trata sobre les muyeres creadores d’arte, entendiendo l’arte nel sentíu más ampliu de la pallabra. Apaecen representaes muyeres artistes de les disciplines denominaes artes mayores (arquitectes, pintores, escultores), pero tamién s’espeya l’actividá de les artistes circenses, cineastes o de les artistes de la maxa, ente otres.

Nel calendariu refléxase la obra de muyeres bien conocíes como Camile Claudel, les artistes musicales Violeta Parra o Sinnead O’Connor, l’artista circense Pinito del Oro. Visibilízase tamién a muyeres como Matilde Ucelay que foi la primer muyer titulada n’arquitectura nel estáu español.

Amás, les efemérides céntrense n’acontecimientos relevantes pa les muyeres. Xunto al 8 de marzu y el 25 de payares apaecen feches señalaes como’l 13 de marzu de 1900 cuando les Cortes Españoles aprueben una llei que regula’l trabayu de les muyeres y los neños. El 30 de xunu de 2005 cuando la Reforma del Códigu Civil permite los matrimonios del mesmu sexu o el 13 d’agostu de 1934 cuando naz María Cascales la primer muyer que formó parte de la Real Academia de Farmacia.

El calendariu complétase con una serie d’actividaes didáctiques pa los distintos niveles educativos, que puen realizase col alumnáu nel aula. Son actividaes variaes nes que les propuestes van dende la busca d’información, pasando per actividaes de rellacionar y pintar hasta la propuesta de construcción d’una casa per aciu d’un programa d’ordenador.

El calendariu ta distribuyéndose pelos centros educativos d’Asturies y pue descargase na páxina web de SUATEA www.suatea.org

Descarga’l calendariu equí

Tamién te podria gustar