Asociaciones del Navia-Eo creen la Plataforma Cultural Eonaviega

Dellos colectivos de la fastera más occidental d’Asturies acaben de formalizar la creación d’una plataforma d’aición conxunta pa frenar los proyectos d’inmersión cultural gallega que sofre’l cotarru del poniente asturianu. Les asociaciones que componen esta plataforma son les que más activamente s’opusieron a la candidatura luso-gallega a la UNESCO.

La plataforma naz cola xera de frenar los intentos de proyectu cultural de la Federación d’Asociaciones del Occidente Navia-Eo, entendiendo que los sos proyectos son d’índole claramente galleguista al “defender que na fastera del navia-eo se fala gallego”.
Dende la Plataforma Cultural Eonaviega afírmase qu’ente los proyectos que la Federación quier desenvolver alcuéntrase la creación d’un Centru pa la recuperación, estudiu y divulgación de la cultura del occidente d’Asturies, nesti sen consideren que la construcción del mesmu partiría de la premisa de que la cultura del Navia-Eo ye diferente a la del restu del país.
Les asociaciones constituyeron la plataforma nun actu na casa conceyu d’El Franco. La Plataforma Cultural Eonaviega ta compuesta poles entidaes que se citen darréu: Fundación Cultural Amigos de la Historia de Veiga, la Banda Gaitas “La Reina del Truébano” de Navia, la Banda de Gaitas Marinotapiega de Tapia, l’Asociación de Bolos de Lloza de Cuaña, l’asociación cultural El Cabazo d’El Franco, asociación cultural Mezá de Bual, Xeira d’El Franco y el Grupu de Piragüísmu Onda Brava de Pezós.
Dende la plataforma críticase la esistencia d’intereses privaos que promoverían la diferenciación cultural de la fastera respectu del restu del país mediante l’adhesión a la candidatura al patrimoniu inmaterial de la UNESCO.
Pa los componentes de la Federación lo mesmo qu’el rio Navia nun fai de llende ente les cultures gallegues y asturiana, tampoco ye una raya ente la cultura de la fastera y la del restu del país.