Amieva, Corvera, Grau y Noreña ya tienen Toponimia oficial

El Conseyu de Gobiernu del Principáu d’Asturies aprobó na so reunión d’esta mañana los Decretos polos que se reconocen los topónimos oficiales de cuatro conceyos que s’alcontraben a la espera d’esti caberu trámite: Amieva, Corvera, Grau y Noreña. Los Decretos aprobaos recueyen la toponimia de pueblos y llugares d’estos conceyos d’alcuerdu cola revisión que ficieren los conceyos y la Xunta Asesora de Toponimia del Principáu d’Asturies. Corvera ya entamare la retulación de la so toponimia hai díes.

Los cuatro nuevos conceyos con Toponimia Oficial vienen a xuntase a los 11 que ya l’aprobaren primero, ente los que s’alcuentren Xixón, Carreño, El Franco, Llanes, Gozón, Llangréu, L.lena, Villaviciosa, Sariegu, Bimenes, Cabranes y Nava.

D’esnte los cuatro qu’agora vieren aprobada la so toponimia de manera oficial, el de Corvera ye’l que más avanzada tien la so normalización social. Dende’l 4 de xineru Corvera ta instalando la so señalización n’asturianu nos más de 150 núcleos habitaos del conceyu. Sicasí la primer fase, que yá ta en funcionamientu, d’esta campaña de rotulación sólo va afectar a 29 de los llugares del conceyu.

Los topónimos que se tan actualizando a la denominación tradicional son: El Castiellu, Los Espinos, La Sierra, El Molín, La Peruyal, El Moncó, La Estebanina na parroquia de Molleda; na parroquia de Cancienes los topónimos afectaos pola actualización serán La Peluca, La Cabaña, La Pedrera, La Rebollada, Moriana, Bango, Taúxu, El Campu la Vega y Cancienes de Riba; na parroquia de Les Vegues l’adecuación toponímica entamará por Molleda de Riba; y na parroquia de Solís Taraño, Casal, Santa Mariña y El Pontón tendrán la so toponimia oficial visible. La campaña con un presupuestu d’alredor de 4000€ tien una subvención de la Conseyería de Cultura de 3500, aportando’l restu’l conceyu de Corvera.