Ámbitu estrena la primer webserie n’asturianu

La productora d’Ámbitu, editora del diariu Les Noticies, ta acabante asoleyar los trés primeros capítulos de “Chatarrona”, la primer comedia de situación n’asturianu a costafecha pa la rede. La páxina web chatarrona.com acueye yá los trés capítulos primeros, de diez minutos caún. La serie ta escrita por Alberto Suárez y tien como actores a Masokhna Diop, Pedro Durán, Juana Marrón y Alberto Rodríguez.

La producción de Chatarrona pue calificase según la propia productora como “de low cost”, porque se fizo con un presupuestu baxu pa lo que suelen costar esti tipu de productos audiovisuales. Sicasí, espliquen que se llevó alantre “dafechamente con profesionales”.

Chatarrona ye una comedia gris, urbana y contemporánea, que cuenta la hestoria de dos amigos nuna situación desesperada: Chuso (Alberto Rodríguez) y Esteban (Pedro Durán) viven nun apartamentu propiedá de los padres de Chuso que yá nun usen porque compraron un pisu meyor. Al ser una vivienda de la familia, nun paguen renta, namás los gastos, pero entrambos dos tán al paru y yá nun tienen drechu a prestaciones económiques, así que Chuso decide que la meyor manera de sacar perres ye poner un anunciu pa garrar posaderos que quieran compartir pisu y, de pasu, aprender un idioma, l’asturianu. Un negociu basáu nos típicos programes internacionales, pero aplicáu a Asturies. L’arribada al pisu de Malik (Masokhna Diop), un inmgrante que trabaya nun chigre, y de Carolina, una asturiana qu’acaba de torna de vivir fuera, xeneren el conflictu de la serie.