Ábrese’l plazu de presentación de candidatures pa la Reconocencia al Llabor Voluntariu 2016 d’Avilés

La  XIII edición de los premios a la Reconocencia al Llabor Voluntariu colos que’l Conceyu d’Avilés reconoz el llabor d’entidaes y persones que desenvuelven la so actividá de manera desinteresada na ciudá tien abiertu’l plazu presentación les candidatures  hasta’l 31 d’ochobre. 

El Conceyu d’Avilés abrió’l plazu de presentación de candidatures pa la Reconocencia al Llabor Voluntariu. Un galardón que cumple’l so décimu tercer edición y col que pretende faese visible’l llabor que munches persones y entidaes realicen de forma desinteresada n’Avilés, fomentando la convivencia y participando nel tresformamientu de la ciudá.

Cola fin d’evaluar les candidatures que se presenten, formóse una Mesa de Selección compuesta por entidaes de voluntariáu que, al pie de representantes de los grupos municipales, va decidir ente les candidatures propuestes les reconocencies del añu 2016.

Los aspirantes tendrán de rellenar una ficha de presentación de candidatura, na que van figurar, xuntu colos datos de la persona o entidá en cuestión, una descripción de l’actividá de la mesma, según los motivos polos cualos propónse dicha candidatura.

A lo llargo de los dolce ediciones anteriores premióse a 54 persones, entidaes o actividaes dedicaes al voluntariáu na ciudá. Na última edición reconociéronse les acciones tantu del grupu de voluntariáu del programa de “Atención soporte a la integración” de Cruz Roja Avilés, como d’integrantes de l’asociación Astarte Borrafes Solidaries.

Tola información y les fiches d’inscripción atópense disponibles nos enllaces que vienen darréu:

Formulariu de presentación de candidatures online
Bases de la Reconocencia al Llabor Voluntariu