365 power points al añu en llingua asturiana

“Hai xestos que cambien el mundu. La xente que ta enfotao en recuperar esi inmensu patrimoniu cultural que ye la llingua asturiana echa a andar esta campaña na que buscamos esparder testos y más testos en llingua asturiana que como granos echen sementera y espoyeten quién sabe cuándo, como una botella echada al mar con un mensaxe: Que nun muerra una llingua con más de mil años d’historia y que los nuestros descendientes puedan escuchar les pallabres que nosotros escuchemos de los nuestros mayores.” Asina entama una campaña que quier aportar un Power Point creáu en llingua asturiana a los correos de los que sienten la falta d’oficilidá de la llingua asturiana.

Los promotores de la campaña aseguren que “durante esti añu vamos mandar diariamente un power point en llingua asturiana. Namás que tienes que rebotalu a tolos contactos que la llingua asturiana siga teniendo presencia na rede.” Veremos si hai tiempu pa cumplir cola xera y si hai abondos interesaos en recibir esta mena de correos, tan populares ente los más mozos.

Si te quies suscribir a esta campaña manda un mail a “nasturianuprestamasarrobayahoo.es” poniendo de tema ALTA.