Uviéu recibe un premiu nacional pol procesu de participación ciudadana nel Bulevar

El conceyal d’Urbanismu y Mediu Ambiente nel Conceyu d’Uviéu, el conceyal de Somos Uviéu Ignacio Fernández del Pandorial, recoyó esta mañana del miércoles en Madrid un premiu al fomentu de la participación ciudadana pol procesu lleváu a cabu pal tresformamientu de l’antigua autopista “Y” en Santuyano, en collaboración colos vecinos arrexuntaos nel colectivu “Imaxina un Bulevar”.

Tratase del VII Premiu a les Bones Práctiques Locales Pol Clima que la Federación Española de Conceyos y Provincies (FEMP) decidió apurrir anguaño al Conceyu d’Uviéu na categoría “Fomento de la participación ciudadana”.

La entrega del Premiu realizóse nel marcu del Congresu Nacional de Mediu Ambiente (CONAM 2018) y l’actividá “Economía Circular y Cambéu Climáticu”. Ignacio Fernández del Pandorial destacó en Madrid l’apueste decidíu del Conceyu d’Uviéu pola participación ciudadana, cola creación d’una Conceyalía específica, y punxo como exemplu de bones práctiques el proyectu premiáu, el del Bulevar. “Uviéu ye agora una referencia pal restu de conceyos d’España en proyectos de Participación y de Mediu Ambiente, lo que ratifica’l bon trabayu fechu estos postreros trés años, tou un retu porque otros empezaron venti años antes. Demostremos qu’a pesar de les faltes, gracies a la implicación de los colectivos ciudadanos, de los vecinos, como’l que desenvuelve Imaxina un Bulevar, puédense non solo suplir les faltes, sinón ser amás vanguardia”, manifestó.

Amás, Fernández del Pandorial incidió en que’l premiu “déxanos un gran prestu porque de dalguna manera reconoz l’esfuerzu de la ciudadanía por crear canales de comunicación cola alministración pa espresar les sos necesidaes. Hai enforma trabayu y esfuerzu nel procesu de participación ciudadana que precedió al proyectu del bulevar, hasta’l puntu que foi determinante por que la Unión Europea premiara tamién la iniciativa con 10,3 millones d’euros de financiamientu”, esplicó’l conceyal. “Los vecinos y vecines de los barrios trevesaos per esi gran repulgu que ye l’autopista alzaron la voz y movilizáronse pa reclamar un bulevar que ponga fin a años de contaminación atmosférica y sonora nos sos llugares de residencia. Gracies a el so esfotu güei tenemos un proyectu y financiamientu pa desenvolvelo”, manifestó’l conceyal d’Urbanismu y Medio Ambiente na recoyida del galardón.