23 Conceyos participen esti añu del programa d’actividaes “Tiempu propiu”

La Directora del Institutu Asturianu de la Muyer, María Fernández Campomanes, acompañó esta selmana a les 67 muyeres de la Comarca de la Montaña Central –concretamente de los conceyos de Morcín, Riosa y La Ribera– participantes nel programa “Tiempo Propio” a la recepción ofrecida na Casa Conceyu de Xixón pola Alcaldesa, Paz Fernández Felgueroso.

“Tiempo Propio” ye un programa promovíu pol Institutu Asturianu de la Muyer que se desendolca en collaboración coles Conceyalíes de la Muyer de los Conceyos de menos de 50.000 habitantes. Dirixíu a les muyeres mayores de 50 años, ufiértase como un espaciu pa facilitar la so participación social, ameyorando’l so bienestar y calidá de vida al traviés d’actividaes d’intercambéu y formación nos ámbitos de la salú, la cultura y les nueves tecnoloxíes.

“Tiempo Propio” compónse d’una programación añal de talleres a la que se sumen a mou d’actividaes complementaries delles escursiones, organizaes al envís de consolidar les rellaciones sociales ente les propies alumnes y ameyorar la conocencia de la so contorna por aciu de propuestes culturales.

La visita a les instalaciones del Muséu del Pueblu d’Asturies forma parte d’eses actividaes. Asina, dende’l marte tes y hasta’l xueves 12 de febreru, más de 450 muyeres visitaron el mentáu Muséu.

El programa “Tiempo Propio” púnxose en marcha por primer vegada nel añu 2002 en collaboración coles Conceyalíes de la Muyer de los Conceyos de Llangréu, Mieres y Siero cola participación de 180 muyeres. Anguaño, son 23 los conceyos que collaboren nesta iniciativa y más de 1.500 les participantes d’esta séptima edición, lo que manifiesta la so consolidación como una esperiencia de participación nel nuesu territoriu.

Nel próximu mes de marzu entamen les xornaes d’intercambéu , unos alcuentros d’un día de duración nos que les alumnes de “Tiempo Propio” d’un conceyu concretu faen de guía pelos sitios más emblemáticos del so territoriu pa muyeres d’otros conceyos que participen nel programa.