2018

“El 8M les periodistes tamién paramos y salimos a la cai”, depués de que más de 6.400 muyeres periodistes firmaron yá’l manifiestu escontra´l machismu nel sector que pue lleese n’asturianu.

Desiximos a los medios de comunicación y empreses periodístiques qu’atiendan les nueses vindicaciones, ente les que destaquen la fienda salarial, el techu de cristal o la precariedá.

El manifiestu espublizáu en toles llingües del Estáu, ente les que s’alcuentra la llingua asturiana, entama diciencdo que muyeres periodistes de decenes de medios y axencias de comunicación, gabinetes de prensa y, polo xeneral, trabayadores de medios y empreses periodístiques sofien la fuelga xeneral feminista convocada pa esti 8 de marzu. Y del mesmu mou, encamienten a toles compañeres a sumase a les aiciones na midida de les sos posibilidaes y circustancies.

Como se diz nel manifiestu “toes sufrimos el mesmu machismu que les muyeres del resto de sectores –precariedá, inseguridá llaboral, fienda salarial, techu de cristal, acosu sexual o menospreciu- pero coles particularidaes asociaes al nuesu oficiu. Somos conscientes de la relevancia social del nuesu trabayu y, por eso, amosamos tamién la nuesa esmolición pola visión parcial de la realidá que tantes vegaes ufren los medios y na que falta la presencia y les aportaciones de les muyeres. El feminismu tamién ye necesariu p’ameyorar el periodismu”.

Poro, nesti 8 de marzu desixens a los medios de comunicación y empreses perioístiques qu’atiendan les son vindicaciones que son recoyíes nel mentáu manifiestu y que son les que vienen darréu:

1. La fienda salarial ye una realidá nel nuesu sector. Desiximos a les empreses tresparencia salarial y una revisión de categoríes, complementos y criterios profesionales que fagan posible finar con ella.
2. Techu de cristal. Les direiciones de los medios y empreses periodístiques tan copaes por homes. Vindicamos el nuesu drechu a ocupar puestos de poder y responsabilidá y a que se mos tenga en cuenta nes promociones profesionales pa puestos entemedios.
3. Precariedá. Sufrimos niveles de temporalidá superiores a los de los nuesos compañeros. De igual mou denunciamos la inestabilidá llaboral de les compañeres freelance y de les falses autónomes, una situación de precariedá que ye vezu nos caberos años.
4. Corresponsabilidá y curiaos. Denunciamos que les dinámiques de trabayu prioricen el presentismu y la llibre disposición y son ayenes a les necesidaes del curiáu que tienen toles persones. Camentamos que la corresponsabilidá y la flexibilidá nun tien de ser un asuntu de bona voluntá sinón una prioridá que les empreses han d’asumir pa qu’estos llabores seyan repartíos por igual ente muyeres y homes. Como n’otros sectores, una ausencia de conciliación real perxudica más a les muyeres, qu’acaben modificando o retayando los sos horarios pa poder curiar, ya inclusive lleguen a abandonar el so emplegu o camudar de profesión.
5. Acosu sexual y llaboral. Son munches les periodistes que sufren per parte de compañeros y superiores, pero tamién de fontes, situaciones d’acosu llaboral. Otramiente, el nengunéu, la condescendencia, el paternalismu y los mansplaining tan a la orde’l día nes redaiciones y fuera d’elles, na nuesa actividá diaria. Como profesionales de la comunicación sufrimos acosu online, arriendes de comentarios violentos y machistes nes nueses pieces.
6. Los espacios d’opinión y los alderiques tan masculinizaos. Hai muyeres periodistes y espertes abondo pa equilibrar esos espacios.
7. Mirada parcial y esmolición polos enfoques. Toes estes fendedures que sufrimos les periodistes tienen consecuencies, tamién nos conteníos y nos enfoques de los medios de comunicación. La visión de la realidá que tresmiten ye les más de les vegaes parcial y ta sesgada porque nun tien en cuenta na mesma midida les esperiencies , los rellatos y les vivencies de les muyeres que, davezu, son trataes como personaxes secundarios o con estereotipos. Un exemplu ye’l tratamientu de la violencia machista, qu’en munches ocasiones sigue culpabilizando a la víctima. Les primeres páxines, les apertures de medios ya informativos son dicidíes por homes.

Les muyeres periodistes del país encamienten a l’audiencia y a les y los llectores que seyan “cómplices de les nueses demandes. Les muyeres firmantes d’esti manifiestu fáenlo a títulu individual y nun queremos que nengún partíu políticu, sindicatu o mediu de comunicación s’apropie de les nueses vindicaciones”.

Pa finar, tamién llamen a la llectura d’esti manifiestu’l 8 de marzu a les 12:30 na plaza de Callao de Madrid y anime a que s’entamen llectures n’otres ciudaes del Estáu.

El testu completu ta nesti enllaz: https://lasperiodistasparamos.wordpress.com/manifestu-8m-asturiano/