2004

“Tengo la impresión de que la mayoría de la xente que votó ‘Nunca Máis’ como meyor canción n’asturianu nos Premios de la Música nun la conocía. Sonába-yos el títulu”. El cantautor mierense Víctor Manuel San José, que mañana regresa a Asturies pa ufrir un conciertu en Xixón xunta Ana Belén, cuestiona nesos términos la primer votación de temes n’asturianu na Academia de la Música y prepara yá un nuevu trabayu que llevará por títulu ‘Valdediós’.

“Paezme bien que s’estableza esa categoría, anque pol momentu tenga provocao alguna insatisfacción”, precisa Víctor Manuel n’alusión a la concesión, n’abril pasáu, del primer premiu al meyor cantar en llingua asturiana al autor Pepín Robles y l’intérprete Manolo Morán pol tema ‘Nunca Máis’. “Hai premios claros y dacuando otros que son absurdos, non representativos”, sentencia l’artista asturianu.

No inmediato, Víctor Manuel realcontraráse mañana col públicu xixonés, qu’eloxa como “estraordinariamente caldiu y mui receptivu” pa protagonizar un conciertu nel que van amestase temes clásicos con otros más recientes incluyíos nel so últimu discu editáu, ‘El perro del garaje’, un trabayu del que l’artista declárase satisfechu porque “diba tiempu que nun me salíen tantes canciones xuntes que pasaos meses dende la so edición siguieren prestándome”.

L’autor de canciones qu’en so día supusieron un notable emburrión a la música fecha dende Asturies, como ‘La planta catorce’, ‘El abuelo Víctor’ o ‘Asturias’ -musicada sobro un poema de Pedro Garfias- asegura que tol llabor que fai tien que ver d’algún mou con Asturies y prepara yá l’asoleyamientu d’un nuevu proyectu que tendrá por títulu ‘Valdediós’ y que, según afirma, tenía en mente hai tiempu.

Esi futuru trabayu, al igual que los anteriores, habrá abrise pasu énte una piratería musical creciente que Víctor Manuel censura porque “arrampla con too: Afecta en primer llugar a los que más venden y nun-yos dexa sacar cabeza a los qu’empiecen”, sostién.

Trabayu discretu, priváu y continuu. Los integrantes del grupu Llan de Cubel, pioneru de la música folk asturiana, trabayen dende xineru nuna base de datos na qu’incorporen pieces tradicionales en formatu mp3 col envís d’empezar a grabar pa fin d’añu el so prósimu trabayu. La banda, qu’anueche actuó na Plaza Mayor de Xixón, tien previsto embarcase en setiembre prósimu nuna xira d’once díes per Estaos Xuníos.

La recuperación de repertoriu tradicional a la que Llan de Cubel -y dedica gran parte del so llabor en 2004 cuayó yá nel rescate de rareces como grabaciones realizaes en 1939 en California, o emisiones de la cadena pública británica BBC, y complétase col repasu que los músicos tán faciendo de los sos propios discos editaos en vinilu, según precisa’l percusionista de la banda, Fonsu Mielgo.

Amás, los miembros de Llan de Cubel revisen cancioneros alternativos al d’Eduardo Martínez Torner y analicen grabaciones de pieces tradicionales que-yos faen llegar los sos siguidores, nuna xera que’l propiu Mielgo califica de “trabayu que nun se ve y que naide nun paga” y que tien por únicu oxetivu el de parir un discu “en condiciones, porque ye mui difícil facer bonos discos”.

Acordies con esa declaración de principios, la veterana banda pixueta nun tien priesa en presentar un cd nuevu nel mercáu depués del so últimu trabayu -‘Un tiempu meyor’, asoleyáu a finales de 1999 coincidiendo col 15 aniversariu’l grupu-, y plantégase culminar la grabación del que va ser el so sestu discu a lo llargo de 2005.

“Nin vivimos d’esto, nin tenemos un contratu por añu con una discográfica”, argumenta Mielgo, pa quien pretender subsistir esclusivamente gracies a la música obliga a llevar “una vida de marineru, o peor” y ye daqué al algame de mui pocos grupos y artistes.

Pesie a ello, Llan de Cubel descansará tol mes d’agostu y embarcaráse darréu nuna xira per Estaos Xuníos que va llevar a la banda asturiana por escenarios de Chicago a Cincinnati ente’l 16 y el 27 de setiembre prósimu, un ‘tour’ que taba previstu pal mes de xunu pero qu’entós foi pospuestu.

El grupu pixuetu arrincó anueche los aplausos de miles de persones aconceyaes na Plaza Mayor de Xixón, nuna potente actuación que se peslló ente bailles de los espectadores y qu’obligó a los músicos a volver por dos vegaes al escenariu pa ufrir tres bises.

Web oficial de Llan de Cubel

La Fiesta de Les Piragües empezará a ritmu de rock and roll. Les bandes Kaótiko, Silencio Absoluto y Desorden ufrirán un conciertu en Les Arriondes que pretende abrir la ‘pipa’ de les cellebraciones del 68 Descensu Internacional del Sella, que según les previsiones va aconceyar a más de 300.000 persones en Parres y Ribesella na folixa previa a la preba deportiva, na qu’esti añu participen 1.200 palistes.

El festival de rock, que tendrá llugar na sala Aipol con un preciu d’accesu de 5 euros, ta previstu pa les 22 hores del xueves 5 d’agostu, y axuntará enriba l’escenariu a los grupos vitorianu y logroñés, xunta los llocales Desorden, nun recital entamáu pola Asociación Llar de Sones y cuyos beneficios empobinaránse a sufragar llocales d’ensayu, infraestructures de grabación y la edición d’un cartafueyu.

Si se cumplen les previsiones basaes n’asistencia d’años anteriores, Les Arriondes acoyerá a partir del 5 d’agostu a más de 300.000 persones que participarán na folixa anterior al descensu, que va cellebrase dos díes depués cola presencia de deportistes d’una decena de clubes europeos de piragüismu.

Nesta edición, el Descensu Internacional del Sella hermanaráse cola ciudá gallega de Santiago de Compostela, al traviés d’un simbólicu intercambiu d’agües ente los ríos Sella y Sar -que pasa pola capital de Galicia- que se suma a la llista d’actos conmemorativos del Añu Santu Xacobéu.

Tres décades de crónica musical d’Asturies. El cantautor xixonés Carlos Rubiera, protagonista’l Surdimientu y autor de composiciones dende 1974, asoleya un llibru-cd nel que recopila tola so obra musical espardida nos últimos trenta años y que sal a la cai impregnáu de l’alcordanza del malográu gaiteru Manolo Quirós, collaciu de Rubiera y fallecíu en 2001.

Productu de tres años de plantegamientu y ellaboración, ‘Carlos Rubiera: 30 años’ publícase en fórmula d’autoedición col sellu discográficu ‘La Capitana’, depués que’l veteranu músicu xixonés decidiera xestionar los sos propios discos énte esperiencies poco satisfactories con cases editores convencionales.

Con dalgunes d’elles hubo negociar Rubiera la recuperación de los temes que grabó nes últimes tres décades, y que lu afitaron como ún de los pioneros de la canción d’autor n’asturianu. El nuevu llibru-discu llega nun momentu nel que’l cantautor llevaba casi una década ensin asoleyar nengún trabayu, ausencia rota cola publicación de ‘Viaxe al silenciu’, qu’incluyó una versión n’asturianu del ‘Viaxe a Ítaca’ del catalán Lluís Llach.

Como autor lliterariu, Carlos Rubiera algamó en 1980 el premiu ‘Juan Uría Ríu’ d’Ensayu cola obra ‘La cultura asturiana, presente y perspectives’, y asoleyó na década siguiente cerca d’una decena de títulos de narrativa y poesía.