Hestoria Les 78 pieces más relevantes de les pelegrinaciones a Santiago resalten el papel d’Asturies nel Camín by asturnet 27 de xunetu, 2004 El protagonismu pioneru d’Asturies nos caminos a Compostela, al traviés de 78 escultures, pieces d’orfebrería y restos arquitectónicos. La ministra de Cultura, Carmen Calvo, inaguró ayeri n’Uviéu la esposición ‘Luces de peregrinación, sede real y sede apostólica’ como un repasu “escepcional” a “tantu dir y venir de persones a la gueta d’un sentíu pa les sos vides”. Y nesi camín de doble sentíu, sorrayó la ministra, Uviéu y Asturies “tienen muncho que dicir”, tomando en cuenta que l’orixe de la propia ciudá de Santiago de Compostela ye’l santuariu xacobéu fundáu nel sieglu IX pola monarquía asturiana pa destacar l’afayu del supuestu sepulcru l’Apóstol. “Dende’l sentíu de pertenencia a un llugar”, Calvo alitó a los asturianos a sentise protagonistes del mayor itinerariu cultural européu y abrió formalmente una esposición que permanecerá abierta al públicu hasta’l prósimu 21 de setiembre na sala d’amueses del Bancu Herrero n’Uviéu, allugada na cai Suárez de la Riva. Comisariada por Francisco Singul, y considerada l’estandarte del Añu Santu Xacobéu depués de la so primer inaguración n’avientu pasáu nel Muséu Arqueolóxicu Nacional y la so amuesa posterior en Compostela, ‘Luces de peregrinación’ repasa les principales rutes xacobees al traviés de talles de Santiago’l Mayor en maera policromao, relicarios ellaboraos con pedrería, cálices, capiteles y cachos de relieves de les ilesies del Camín. La esposición dedica amás un espaciu monográficu a resaltar la importacia d’Uviéu y Santiago como grandes centros de pelegrinación na Edá Media, ya inclúi una amuesa d’obres d’orfebrería donaes a la Cámara Santa uvieína y a la Catedral compostelana como ofrenda. 27 de xunetu, 2004 0 FacebookTwitterPinterestEmail
Música L’Intercélticu d’Avilés pieslla una edición “difícil de repetir” y piensa yá nel so décimu aniversariu by asturnet 26 de xunetu, 2004 “Difícil de repetir”. Casi 20.000 persones siguieron a pie de cai el VIII Festival Intercélticu d’Avilés, qu’ayeri echó’l pieslle a la meyor edición hasta’l momentu, según los organizadores del certame, y piensa yá n’entamar dalguna cellebración especial pa conmemorar el so décimu aniversariu. L’Ayuntamientu renueva l’apoyu al festival, pendiente agora d’un pactu cola Sociedá Xeneral d’Autores y Editores pa pagar drechos d’autor por difusión musical. En total, foron once díes de folixa articulaos al rodiu d’un cientu d’actos y siguíos por una media diaria de 2.000 persones los fines de selmana y d’unos mil asistentes nes xornaes llaborables, de llunes a vienres. Cifres que n’opinión de Juan Casas, presidente d’Esbardu -asociación qu’entama el festival-, demuestren a les clares que’l certame avilesín ye “imparable” y tien una continuidá “indiscutible”. Lo que nun va resultar fácil, precisa Casas, ye la planificación de la prósima edición en meyores términos que la que ta acabante rematar, “porque difícilmente se podrá repetir un festival d’esta envergadura”. Na confección del programa del añu qu’entra, l’Ayuntamientu mantendrá el so sofitu plenu al eventu, depués que’l conceyal delegáu de Cultura, Juan José Fernández, -yos asegurara a los organizadores que “esto sólo ye’l principiu”, n’alusión al saltu cualitativu que l’Intercélticu dio na so VIII edición. Magar de tou esi optimismu, nel otru llau de la moneda acusbia entá la Sociedá d’Autores. Depués d’evitar ‘in extremis’ la suspensión cautelar de gran parte de los conciertos del festival al algamar un alcuerdu a la puerta’l xulgáu, organizadores y miembros de la SXAE volverán aconceyar en setiembre pa concretar qué pieces de les interpretaes nos recitales d’esta edición xeneren drechos d’autor y cuáles non. Nesti sen, un inspector de la Sociedá Xeneral d’Autores y Editores fizo un siguimientu a los conciertos del Intercélticu col envís de tomar nota de les interpretaciones susceptibles d’obligar a los organizadores a pagar una tasa. Miembros d’Esbardu discutirán cola SXAE el porcentaxe final nuna reunión qu’inda nun tien fecha esacta pero qu’en tou casu va cellebrase de sutaque pase’l veranu. La Sociedá d’Autores retira la demanda contra l’Intercélticu y negociará un cobru a la baxa 26 de xunetu, 2004 0 FacebookTwitterPinterestEmail
Sociedá Una páxina web propón una adaptación de la grafía asturiana p’afitar la gramática del estremeñu by asturnet 26 de xunetu, 2004 Una gramática pal estremeñu basada na grafía adaptada de la llingua asturiana. La páxina web ‘Iventia.com, Noticiariu Elehtrónicu Estremeñu’, editada n’Estremadura, estudia y difunde les variedaes del dominiu llingüísticu “astur-lleonés”, del qu’inclúi un mapa detalláu hasta Huelva. El sitiu ellectrónicu resume, nun documentu de 42 páxines descargable en formatu pdf, la normativa gramatical pa la variedá llingüística estremeña a partir, ente otros estudios, de la Gramática pal asturianu publicada pola Academia de la Llingua en 2001, y alita la conservación del pallabreru autóctonu al traviés d’un breve diccionariu on-line castellanu-estremeñu. Tres de la iniciativa, qu’inclúi una portada con noticies d’ámbitu mundial y rexonal redactaes dafechu n’estremeñu, hai dos nomes propios: María Teresa Batalla, responsable’l diseñu, y Carlos Quiles, ellaborador de los conteníos, nacíu en Badajoz y titular d’un currículum qu’incorpora más d’una decena d’idiomes falaos y leyíos n’estremaos niveles. Según precisa Quiles, qu’asume el llabor d’alministrador de la páxina web, ‘Iventia.com’ céntrase nes “fales estremeñes de raigón lleonés” qu s’enserten nel dominiu “astur-lleonés”, y quier abordar l’alderique estrictamente llingüísticu más allá de les sos connotaciones polítiques. La web estremeña, que pretende abrir un discutiniu sobro la necesidá de normalizar les estremaes llingües y variedaes minoritaries -ente elles, l’asturianu-, inclúi un foru d’opinión abiertu a la participación de los internautes. Enllace a la páxina web ‘Iventia.com’ 26 de xunetu, 2004 0 FacebookTwitterPinterestEmail
Hestoria L’ampliación del Muséu Arqueolóxicu arranca llueu d’una década de trámites burocráticos by asturnet 26 de xunetu, 2004 Diez años de trámites nos despachos. Les obres d’ampliación y remocicamientu del Muséu Arqueolóxicu d’Asturies, allugáu nel vieyu monasteriu uvieín de San Vicente, arranquen formalmente güei, depués que’l Ministeriu de Cultura encamentara el primer estudiu de l’actuación en 1994. Los trabayos duplicarán la superficie del equipamientu, de los 2.700 metros cuadraos d’anguaño a más de 5.600. Presupuestaes en 6,2 millones d’euros y adxudicaes a la Unión Temporal d’Empreses Alfredo Rodríguez S.L. y ‘Técnicas de Arquitectura Monumental S.A.’, les obres habíen tar yá entamaes na pasada seronda, cuando’l Muséu Arqueolóxicu treslladó los sos fondos a un depósitu esternu pa propiciar l’aniciu de los trabayos. Magar d’esa actuación, qu’obligó a pesllar el centru museísticu al públicu, pales y obreros nun entraron al edificiu nin n’inviernu, nin en primavera. La ministra de Cultura, Carmen Calvo, peslló esta tarde na sé del muséu la caxa na que quedarán soterraos los periódicos del día como símbolu del empiezu de los trabayos, que si se cumplen les previsiones pérmitirán la inaguración del equipamientu yá meyoráu a mediaos de 2007. Nel conventu uvieín, Calvo acusbió la maqueta de l’ampliación ya interesóse polos detáis del proyectu pal muséu, de titularidá estatal pero xestionáu pol Principáu Nel trescursu de la visita de la ministra al edifiiu qu’alberga l’Arqueolóxicu d’Asturies, l’alcalde d’Uviéu, Gabino de Lorenzo, comprometióse a tramitar darréu la llicencia municipal necesaria pal aniciu de los trabayos del Archivu Hestóricu, a petición de Calvo y del presidente autonómicu, Vicente Álvarez Areces. La Conseyería y el Ministeriu de Cultura firmaron en 1995 el conveniu col que se comprometía l’ampliación y remocicamientu del Arqueolóxicu d’Asturies, cuyu proyectu museolóxicu foi redactáu tres años depués pol arqueólogu Ángel Villa. Depués de nuevos trámites técnicos, el Boletín Oficial del Estáu (BOE) publicó’l pasáu 9 de xunu l’adxudicación de les obres. El vieyu conventu benedictín de San Vicente, nel que vivió’l padre Feijóo, rellaciónase cola fundación de la ciudá d’Uviéu. Llueu d’asitiase n’estremaes sés transitories, la colección del Muséu Arqueolóxicu d’Asturies quedó a la fin allugada nel monasteriu uvieín en 1952. 26 de xunetu, 2004 0 FacebookTwitterPinterestEmail
Tecnoloxía Un fallu de seguridá en Mozilla, que tien versión n’asturianu, encamienta actualizar el software by asturnet 26 de xunetu, 2004 Nun momentu en que taba xorreciendo l’emplegu de Mozilla en llugar del Internet Explorer, que perdió nel caberu mes un ún por cientu de cuota de mercáu, un bug -fallu de seguridá- afectaba al Navegador Mozilla pa Windows, polo que ye recomendable que los usuarios qu’empleguen esti navegador de software llibre, qu’inclúi una versión n’asturianu, igüen esa versión o s’actualicen a otra más reciente. Dende’l 7 de xunetu, una vulnerabilidá de la seguridá qu’afectaba los navegadores Mozilla pal sistema operativu de Windows foi divulgada a mozilla.org por Keith McCanless. Nel mesmu día, l’equipu de seguridá de Mozilla confirmó l’informe qu’afectaba al emplegu de los navegadores de códigu abiertu y usu gratuitu Mozilla, Firefox, y Thunderbird y desendolcó la igua pal problema. El bug descubiertu afecta namái qu’a la versión de Mozilla pal sistema operativu de Microsoft Windows y nun cinca a los usuarios de Linux o de Macintosh, polo que namái tien peligru pa los qu’empleguen dalguna de les versiones de Windows, de la 9x a la reciente XP. Los usuarios de Mozilla, Firefox y Thunderbird puen instalar el parche de seguridá descargándolu de la rede y faciendo click nel botón que diz “Install Now”. Darréu nun ye preciso namái que reiniciar l’ordenador y comprobar que l’actualización se fizo correutamente, teniendo en cuenta qu’esi procesu pue nun conservar l’idioma orixinal nel que cada usuariu tien personalizáu el navegador, incluyíu l’asturianu. Los pasos a siguir descríbense perdafechu na dirección http://mozilla.org/security/shell.html Alternativu a otros navegadores como’l que proporciona Microsoft, el Mozilla incorpora un llector de corréu ellectrónicu y de noticies basáu nel motor Gecko, el mesmu qu’emplega el navegador de Macintosh, y ufierta avances talos como una mayor seguridá énte posibles fallos, bloquéu de ventanes qu’apaecen automáticamente en pantalla y una gran proyección de futuru, gracies en gran parte a la so independencia respecto a la evolución d’empreses determinaes y a l’andecha con que ye desendolcáu por parte de voluntarios con conocimientos d’informática. La versión disponible de Mozilla n’asturianu, que pue descargase gratis, ye la 1.4, cuando nel restu d’idiomes la versión yá aportó a la 1.7.1, razón pola cuala ye perimportante que se faiga l’actualización si se ta emplegando davezu como navegador la versión n’asturianu. Ente les ventayes que sorrayen los partidarios del usu’l códigu abiertu tán la posibilidá de que cualquier persona puea intervenir p’ameyorar el navegador y que queda abierta la puerta a posibles revisiones del códigu, fechu inviable n’otros navegadores comerciales y que permite atopar y pesllar ‘puertes traseres’ poles que los virus puen entrar nos equipos informáticos. Esti mes súpose por mediu del prestixosu mediu The Inquirer, que por primera vegada dende 1999 disminuyera l’usu del Internet Explorer, perdiendo un 1 por cientu’l mercáu nun solu mes. Munchos usuarios migraren a Mozilla y Mozilla Firefox por mor de los últimos problemes de seguridá del Explorer. Poro, l’usu del Internet Explorer asítiase al rodiu’l 95 por cientu, con un 4 por cientu pa Mozilla. 26 de xunetu, 2004 0 FacebookTwitterPinterestEmail
Tecnoloxía Telecable aumenta la velocidá nel so serviciu d’internet ensin coste adicional na cuota mensual by asturnet 26 de xunetu, 2004 Más velocidá pol mesmu preciu. La operadora de telecomunicaciones asturiana Telecable aplicará a partir de la selmana qu’entra una meyora nos sos servicios de conexón a internet que va duplicar el caudal nel serviciu de velocidá nominal máxima 320/160 kilobits por segundu y que nun va suponer aumentu dalu na cuota mensual que paguen los usuarios. Asina, esa mayor rapidez pa consultar internet notaráse especialmente nel serviciu qu’agora establez como velocidaes máximes contrataes los 160 kilobits por segundu al pedir información a la rede y 320 pa recibir esa información: Los veceros que cuenten con esti serviciu podrán movese a partir d’agostu a 320 kilobits por segundu al cursar peticiones a la rede -por exemplu, teclear la dirección d’una páxina web na barra de direcciones- y algamarán los 640 kilobits nel procesu recíprocu, la carga d’esa páxina. Amás d’esa meyora, Telecable anuncia l’aumentu de les actuales conexones de 640 hasta 1 megabit, y una xubida de les de 128 kilobits por segundu hasta los 160, una meyora xeneralizada que, según destaca la operadora nuna nota de prensa, produzse tres meses depués de que Telecable meyorara nun 25 por cientu les sos conexones a internet. El cambiu previstu p’agostu, informa la compañía de comunicaciones, nun va requerir nenguna actuación por parte l’usuariu, yá que la compañía activará la meyora de mou remotu. La noticia vien recoyéndose a lo llargo de la fin de selmana en cásique tolos foros teunolóxicos que-y presten atención a la conectividá n’españa. Ún de los foros davezu más críticos cola actividá de les operadores, elotrolado.net, afalagaba l’anuncia de Telecable y dexaba a les clares la importancia de la midía adoptada pol operador de cable asturianu, que se separta abondo d’otres operadores como Supercable o la vecina Retecal, de Lleón, ameyorando enforma’l serviciu d’Internet na so granible ufierta. La única operadora que sigue darréu los pasos de Telecable ye pol momentu Euskaltel, sigún anuncia’l portal Banda Ancha, la operadora vasca que namái ufierta los sos servicios n’Euskadi y qu’ufierta pasar a tolos sos usuarios de 300/300 a 1024/600, un Mega de baxada y 600 Kbits de baxada.Portal del operador asturianu Telecable 26 de xunetu, 2004 0 FacebookTwitterPinterestEmail
Música La delegación asturiana ultima’l viaxe al Festival de Lorient, nel que tendrá presencia diaria by asturnet 25 de xunetu, 2004 Esbardu, Gatos del Fornu, Muyeres, Ramón Prada y Chus Pedro Suárez. Esi ye l’orde col que los grupos y solistes integrantes de la delegación asturiana nel Festival Intercélticu de Lorient 2004 saldrán a escena nel certame bretón, qu’arranca el prósimu vienres y va prollongase hasta’l 8 d’agostu. La espedición saldrá d’Asturies na nueche’l xueves. La delegación d’unviaos asturianos ultima los preparativos del viaxe, cuyu trayectu de vuelta ta previstu pal mesmu día qu’acaba el festival y que llevará a Lorient a los encargaos de mantener altu’l pabellón un añu depués que’l certame se dedicare espresamente a Asturies. Nesta edición, el protagonista sedrá L’Acadie, una rexón canadiense que cellebra los 400 años de la so fundación. El grupu de baille Esbardu estrenará la representación activa d’Asturies nun espectáculu de dancies previstu pa primer hora de la tarde’l sábadu 31 de xunetu, nel cabaret del certame. El relevu garrarálu la banda uvieína de folk Gatos del Fornu, protagonista d’un conciertu el 2 d’agostu xunta los galegos Os Enxebres de Cacheiras y de nueu enriba les tables el 3 y el 4 d’agostu, en sendos recitales nel Palaciu de Congresos y nel denomináu ‘Espaciu festival’. Esi mesmu miércoles 4 d’agostu, el collectivu Muyeres participará nun espectáculu de música relixosa na ilesia de San Lluis, na viéspora l’estrenu del que’l delegáu del Intercélticu n’Asturies, Lisardo Lombardía, considera’l ‘platu fuerte’ de la representación asturiana: L’estrenu de la composición ‘Kelthiké’, concebida espresamente pal festival con gran presencia’l repertoriu vocal tradicional. El 6 d’agostu, vienres, sedrá’l turnu de Chus Pedro Suárez, qu’actuará acompañáu de Muyeres nel Grand Theatre, mientres qu’Esbardu volverá cobrar protagonismu nes dos últimes xornaes del certame. Completen la delegación asturiana unviada a Lorient les bandes de gaites de Candás y La Reina’l Truébano. 25 de xunetu, 2004 0 FacebookTwitterPinterestEmail
Música Stray Cats, Nervous Eaters y Ray Gelato culminen tres díes de rock internacional en Xixón by asturnet 23 de xunetu, 2004 Stray Cats pon la espuela a dos xornaes de conciertos abiertos de rock en Xixón. El II Festival Crossroad, nel que participen doce bandes y que güei cellebra’l so segundu recital collectivu, culmina mañana 72 hores de música con una folixa pa los titulares d’abonos na sala El Jardín na que tocarán dos de los participantes nel festival, Ray Gelato y Nervous Eaters. Depués d’una primer xornada seguida anueche por miles de persones na plaza de toros d’El Bibio, coles actuaciones de Buddy Guy, Kings of Leon, The Meows, Hi-Risers, Hayseed Dixie y Ray Gelato, el Crossroad tien fixada pa güei la intervención de Stray Cats, que pesllarán una nueche de rock na qu’intervendrán Trash Tornados, The Come Ons, Laika and The Cosmonauts, The Dempseys y Nervous Eaters. Amás, esta última banda y el saxofonista Ray Gelato ufrirán un conciertu de despidida mañana, na sala El Jardín, na que sedrá la folixa d’espuela del festival y a la que podrán acceder los titulares d’abonos hasta completar l’aforu del recintu. Como novedá respecto a l’anterior edición, el Festival Crossroad alluga nel interior de la plaza de toros de Xixón un mercáu integráu por diez puestos nos que tán a la venta ropa, discos y productos de coleccionismu referíos a les bandes participantes. 23 de xunetu, 2004 0 FacebookTwitterPinterestEmail
Fiestes La fiesta’l pastor y la romería vaqueira marquen un fin de selmana plenu de folixa by asturnet 23 de xunetu, 2004 Pastores n’oriente, vaqueiros n’occidente, romería nel centru. Asturies calca l’acelerador de les fiestes patronales y de raigón y somórguiase nun fin de selmana plenu de folixa nel qu’estremaes llocalidaes festexen Santa Cristina, Santiago y Santa Ana, con centros d’interés nel repartu de pación de los Picos d’Europa, na braña d’Aristébanu y en Sama Llangréu. Esta última llocalidá estrena al mediudía de güei les sos fiestes de Santiago, con un pregón a cargu de la conseyera de Presidencia’l Principáu, María José Ramos, y actuaciones previstes de los grupos Iguana Tango (domingu) y de Los Berrones, na nueche’l prósimu llunes. Na franxa occidental, el conceyu de Tinéu abre güei la ‘pipa’ de les cellebraciones cola primer xornada’l VI Campeonatu Nacional de Batéu d’Oru, que tien llugar en Navelgas, llocalidá qu’a partir de les 22 hores del sábadu acueye la final del V Certame de música folk ‘Cuartu de los Valles’. Na final d’esi concursu actuarán les bandes Nubeira (Pontevedra), Tarañu (Asturies), Feile (Vizcaya), Balbarda (Madrid) y Pintas Bandas Folk (Granada). L’apoxéu festivu na comarca pondrálu, a lo llargo de tola xornada’l domingu, la multitudinaria romería vaqueira que se cellebra na cercana braña d’Aristébanu, y cuya actividá central ye un enllaz matrimonial acordies colos ritos y los vezos de la comunidá vaqueira. Nel otru estremu d’Asturies, na Vega d’Enol, los pastores de los Picos d’Europa tienen previsto cellebrar tamién el domingu 25 de xunetu, día de Santiago, la fiesta na que se reparten la pación, nel contestu d’una folixa orixinada hai 65 años qu’inclúi el nomamientu’l Rexidor de Pación, una xinta popular y prebes de deportes tradicionales. Al marxe de grandes eventos, pequeñes llocalidaes como’l núcleu rural de Yananzanes, nel altu Ayer, lluchen esti añu por mantener vives les sos fiestes patronales de Santa Ana, que se cellebren con romería, procesión, ellaboración de panchón y una tradicional puya’l ramu de pan d’escanda. 23 de xunetu, 2004 0 FacebookTwitterPinterestEmail
Escéniques La plataforma del Arango constata un xiru na postura del Ayuntamientu, qu’estudia apoyar la reapertura by asturnet 22 de xunetu, 2004 Cambiu radical del Ayuntamientu de Xixón na so postura sobro’l teatru Arango. Eso ye lo qu’anuncien los miembros de la plataforma pola reapertura de la sala, que constaten la ‘marcha atrás’ de los responsables consistoriales na so negativa a apoyar la recuperación del teatru y anuncien soluciones pa dientro d’un mes. Integrantes del collectivu ‘espioyáronse’ ayeri énte l’Arango en rempuesta al propietariu de la sala, que se refiriera a ellos como “pioyosos”. Según apuntó Boni Ortiz, ún de los voceros de la plataforma Cultura pal Arango, el xiru na opinión de los grupos políticos municipales débese en gran parte a la iniciativa’l conceyal d’Izquierda Xunida-Bloque por Asturies Jesús Montes Estrada y pue traducise en resultaos tanxibles nun plazu aprosimáu de 30 díes, de sutaque los miembros de la plataforma accedan al interior del teatru y faigan una completa midición que permita tasar la sala del mou más cabal posible. Los responsables del collectivu pola reapertura del Arango con sofitu municipal farán esi llabor con optimismu: Abúltase-yos que’l ‘sí’ definitivu del Conceyu p’apoyar la recuperación del teatru con fines culturales ta enforma prósima porque tala recuperación ye “ambiciosa y razonable”, daqué que, sostienen, pudieron afitar en recientes alcuentros colos distintos grupos políticos de la Corporación xixonesa. Mientres llega esi decisivu xestu del Ayuntamientu, la plataforma sigue atropando firmes de los ciudadanos p’avalar la puesta en marcha de la céntrica sala como espaciu cultural públicu. Más de 3.000 xixoneses sofitaron yá cola so rúbrica les pretensiones del collectivu, que prevé cellebrar asamblees abiertes tolos xueves a les puertes del propiu teatru pa informar del estáu de les negociaciones. La primera d’elles tuvo llugar a última hora de la tarde d’ayeri y acabó col simbólicu ‘espioyamientu’ de varios miembros de la plataforma en rempuesta a ún de los propietarios del teatru, Manuel Arango, que nuna entrevista asoleyada por ‘La Voz de Asturias’ refirióse a ellos como “pioyosos”. A la consigna de “hai que s’espioyar pa dir curiosos a negociar cola propiedá, que de parásitos sabe un güevu”, integrantes del collectivu Cultura pal Arango sometiéronse a la simbólica desinfección d’un emisor de fumu, y ún d’ellos completó’l procesu con un públicu corte de pelu. 22 de xunetu, 2004 0 FacebookTwitterPinterestEmail