Sociedá El ‘Príncipe’ de la Concordia reconoz el simbolismu hestóricu de les pelegrinaciones a Santiago by asturnet 6 de setiembre, 2004 Los Premios ‘Príncipe de Asturias’ 2004 ríndense a la eclosión del Camín de Santiago y apuesten otra vuelta por Europa. Les pelegrinaciones a Compostela, entamaes nel sieglu IX y alitaes pol rei asturianu Alfonso II, recibieron esti mediudía el ‘Príncipe’ de la Concordia n’atención a la so capital importancia na configuración de la identidá cultural europea, a cuatro meses de que remate un Añu Santu Compostelanu que moviliza a miles de pelegrinos. La candidatura de les pelegrinaciones a Santiago, qu’anguaño esperimenten un notable puxu nos tramos asturianos del Camín a Compostela, algamó ayeri les simpatíes de los miembros del xuráu pola so decisiva contribución a la construcción d’Europa y al caltenimientu de la conciencia europea, afitándose como un exemplu de fraternidá a lo llargo de los sieglos. Cola distinción a les pelegrinaciones xacobees, los Premios ‘Príncipe’ caminen p’hacia el fallu caberu de la so edición de 2004 -el premiu de los Deportes, cuyu ganador conoceráse la selmana qu’entra- y completen la so apuesta tanto por aspirantes de sonadía internacional yá consolidada, como por candidatures del ámbitu européu, yá que nel palmarés d’esti añu figuren amás el programa Erasmus d’intercambiu d’estudiantes (premiu de Coperación Internacional), l’escritor italianu Claudio Magris (Lletres), el guitarrista andaluz Paco de Lucía (Artes) y el periodista francoarxelín Jean Daniel (Comunicación ya Humanidaes). Al galardón de la Concordia optaben un total de 39 candidatures procedentes de venti nacionalidaes distintes. El premiu, que na edición de 2003 recayó na creadora de Harry Potter, la escritora británica Joanne Kathleen Rowling, ta empobináu a distinguir a persones o collectivos que destaquen nel ámbitu internacional nun llabor pola fraternidá, la llucha contra la inxusticia, la probitú, la ignorancia o la enfermedá. Web oficial de la Fundación ‘Príncipe de Asturias’ 6 de setiembre, 2004 0 FacebookTwitterPinterestEmail
Comunicación L’asturianu yá esiste na realidá televisiva: Sandra aporta a Gran Hermano by asturnet 5 de setiembre, 2004 Sandra, con 28 años, adientróse esti domingu 5 na casa de Gran Hermano falando asturianu dafechu y presentándose tamién en llingua asturiana nel vídiu de presentación que fai esti programa de Telecinco qu’entamaba esti domingu primeru de setiembre la so sesta edición. Sandra, que yera la segunda asturiana qu’entraba na casa de Gran Hermano d’anguaño depués del xixonés Nicky, ye un bon exemplu de munches y munchos neños que ñacieron en Francia o Bélxica y que depredieron el “castellán” que falaba so ma, que nun yera talu sinon asturianu dafechu. Nun hai más que sentir a la má de Sandra pa dase cuenta del bon acentu asturianu que tien. Un acentu que ye menos ñatural nuna rapaza qu’espolleta en Francia y vivi en Benidorm, pero a la que-y presta falar asturiano cola normalidá del que fala la llingua que más siente. La entrada de Sandra foi un torbellín nel que dexó bien nidio que l’asturianu esiste y ye una llingua de comunicación con frases costantes de costrucción asturiana. Nel vídiu de presentación, depués de pedir una botellina sidra nel chigre que tien so má en Benidorm, dexó bien claro que fala asturianu: “Tamos equi na sidrería la mio má en Benidorm onde voi a tomar la mio sidrina”, anque la ma dexó bien nidio qu’a lo que diba yera “a moñase colos amigos y a ayudar a mamá pa na”. Sandra respuende perfectamente al perfil de la mocedá asturiana: gayolera, galana y coles idegues mui nidies: “Nun trabayé nunca… Consiguiéronme siempre tolos mis caprichos… porque soi mui caprichosa”. La programación televisiva de la seronda va tener una bona riestra de protagonistes asturianos, depués de qu’esti domingu entrara tamién Nicky na casa de Gran Hermano y de qu’ún de los más afamaos cocineros asturianos, Jose, s’anunciare como’l nuevu Arguiñano de la televisión pública. Dende esti domingu día 5 de setiembre pela nueche, Nicky sedrá l’otru protagonista asturianu y darréu d’ello de l’actualidá del corazón n’Asturies por mor de la so participación en “Gran Hermano” . Nicky ye un rapaz de Xixón qu’enantes foi rapaza y que gracies a la melecina y a munches operaciones ye agora un home, sigún desplicó elli mesmu nun vídiu de presentación. La entrada de Nicky na casa de Gran Hermano garantiza la presencia constante d’esti xixonés y de Sandra, l’asturiana de fala y de corazón, anque viva en Benidorm, nos medios audiovisuales y na prensa a lo llargo d’esti mes de setiembre. Artículu d’opinión: “Tiémblenme les pates” 5 de setiembre, 2004 0 FacebookTwitterPinterestEmail
Plástiques Xixón analiza nunes xornaes los efectos de les nueves conexones ente arte y tecnoloxía by asturnet 5 de setiembre, 2004 Arte y tecnoloxía danse la mano en Xixón. L’Antiguu Institutu Xovellanos acueye dende güei y hasta finales d’ochobre, baxo la coordinación del caderalgu José Ramón Alcalá, unes xornaes y una esposición consagraes a delimitar les interferencies que l’usu de les nueves tecnoloxíes provoca na reconocencia de les identidaes de persones y pueblos. Primero abriráse l’alderique. Les Xornaes Observatoriu Orbital de lo Humano llevarán a la ciudá, hasta’l prósimu 17 de setiembre, a los espertos Fred Adam, Peter Bosch, Álvaro Rey y Federico Muelas, nuna sucesión de debates y talleres bautizaos baxo l’epígrafe xeneral ‘Práctiques del arte ellectrónicu como estratexes pa una cartografía de la interculturalidá contemporánea’. De sutaque se piesllen eses xornaes, abrirá les sos puertes la esposición ‘Arte interactivu pa una cartografía de la interculturalidá’, una amuesa que va allugase na sala númberu 2 del Centru de Cultura Antiguu Institutu y aconceya trabayos recientes d’artistes mozos que, desendolcando los dispositivos ellectrónicos basaos na dixitalidá, la multimedialidá y la interactividá, afitaron espacios pa la reflexón sobro la identidá del individuu al entamar el tercer mileniu. Nel trescursu de les xornaes sobro arte tecnolóxicu, que la conceyala xixonesa de Cultura, Mercedes Álvarez, presentó esta mañana, cellebraráse amás una sesión d’ellectroacústica y proyecciones en directu na sala Albéniz, a cargu de VJ’ Calpurnio y DJ’ Sr.Imbécil. 5 de setiembre, 2004 0 FacebookTwitterPinterestEmail
Escéniques El calendariu de xira y la dificultá’l montaxe impiden posponer el recital de Les Luthiers suspendíu n’Uviéu by asturnet 5 de setiembre, 2004 Nun habrá nueva fecha, a lo menos a curtiu plazu. El recital que’l conxuntu arxentín Les Luthiers tuvo que suspender anueche n’Uviéu por mor d’una gran tormenta previa al espectáculu nun podrá ser treslladáu a feches prósimes tanto pola singularidá’l montaxe -que moviliza a una orquesta sinfónica- como pol calendariu de los artistes, que rematen mañana la so xira en cursu y prevén regresar a España en payares, pero con un espectáculu distintu. Asina, Les Luthiers tien fixáu un ritmu de trabayu de casi una función diaria en Salamanca, Granada y Madrid -sucesivamente- ente los prósimos 14 de payares y 3 d’avientu, pa poner n’escena ‘Todo por que rías’, un montaxe que yá foi representáu nel teatru Xovellanos de Xixón y que traerá otra vuelta a los cómicos arxentinos a España p’actuar, como ye habitual nellos, n’espacios pesllaos. Lo contrario, la decisión municipal d’allugar el recital previstu p’ayeri nel recintu esterior de les pistes de San Llázaru, obligó al Ayuntamientu y a la promotora de los artistes a suspender l’espectáculu momentos antes de la hora prevista d’aniciu, les 10 de la nueche, énte la gran torbonada d’agua, troníos y aparatu elléctricu que descargó enriba Uviéu a partir de les 21,30 hores. Les más de 5.500 persones que mercaren yá la so entrada y agotaren l’aforu previstu nun llegaron siquiera a acceder al recintu y recibieron la noticia oficiosa de la cancelación mientres esperaben nuna llarga fila. Dase la circunstancia de que Les Luthiers taben acabante suspender tamién la so actuación previa, prevista en Ponferrada na nueche’l sábadu, por mor de les tormentes. Los espectadores que diben asistir al espectáculu n’Uviéu podrán recuperar a partir de güei les perres de les sos llocalidaes nos hipermercaos d’El Corte Inglés y na oficina municipal de turismu L’Escorialín, asitiada nel Campu San Franciscu. 5 de setiembre, 2004 0 FacebookTwitterPinterestEmail
Cine Un documental ensalza’l conflictu llaboral de Duro Felguera como una hestoria “épica y única n’Europa” by asturnet 5 de setiembre, 2004 Una hestoria “apasionante, épica y única n’Europa”. Nesos términos concibe la directora llangreana Lucinda Torre el llargu conflictu llaboral que protagonizaron 232 trabayadores de la constructora de bienes d’equipu Duro Felguera, argumentu’l documental ‘Tiempo de resistencia’, que la realizadora prevé estrenar a primeros de 2005. “Nun un mundu globalizáu, nel que’l fantasma de los despidos amenaza’l futuru de miles de trabayadores, unos pocos dixeron ‘non'”, resume la sinopsis de la cinta, un trabayu ellaboráu por un equipu técnicu de 25 persones y ensin sofitu dalu de l’Alministración autonómica, pesie a cursar la pertinente solicitú hai agora un añu. Según Torre, afincada en Madrid y nominada al Premiu Goya al meyor curtiumetraxe por “El Beso de la tierra”, el silenciu alministrativu col que s’atopó al demandar el sofitu institucional amuesa una “incapacidá” pa ver el cine como industria y lleva a pensar, xunta otras consideraciones, si en verdá “podemos dicir qu’esiste un cine asturianu”, más allá, entiende Torre, de “los bonos profesionales asturianos que faen cine”. De sutaque se ponga de llargu cola so proyección en varios festivales, según les previsiones de la directora asturiana y el so equipu, ‘Tiempo de resistencia’ narrará nes pantalles la hestoria d’una engarradiella que se prollongó una década a partir de 1993 -fecha de los despidos qu’orixinaron el conflictu- y que foi perpetrada por “homes y muyeres que nunca nun se rindieron, que se rebelaron contra’l so despidu y que fueron quien a recuperar la so dignidá, los sos trabayos y los sos talleres”, asegura Lucinda Torre, que defende amás l’exemplu de los trabayadores de Duro como una guía pa entender muncho de lo qu’anguaño ta ocurriendo n’Europa. Nesti sen, la cineasta llangreana reivindica’l gran “potencial cinematográficu” d’Asturies, tanto n’hestories como en personaxes: “Somos una sociedá enforma plural, mui rica, pero amás vivimos procesos hestóricos y económicos únicos nel mundu, fuimos protagonistes y tuvimos na vanguardia en delles ocasiones”, sostién Torre. La llucha de los operarios de Duro Felguera por caltener los sos puestos de trabayu motivó, ente otres movilizaciones, un llargu encierru na catedral d’Uviéu, una fuelga de fame y un tema’l grupu de rock Dixebra, ‘Nun llores’, que xeneró’l primer videoclip de la banda. 5 de setiembre, 2004 0 FacebookTwitterPinterestEmail
Sociedá El Principáu edita ‘in extremis’ cartelos y programes n’asturianu del 8 de Setiembre pa los actos de Mieres by asturnet 5 de setiembre, 2004 L’asturianu tará presente na propaganda institucional del Día d’Asturies de forma parcial y sólo depués d’un arreglu d’última hora. El Gobiernu autonómicu ta acabante editar n’esi idioma cartelos y programes de les actividaes del 8 de setiembre en Mieres, mientres la promoción de los actos institucionales de mañana mantiénse dafechu en castellán. Una quexa de la Oficina de Política Llingüística propició la igua ‘in extremis’. La selmana pasada, en viéspores de les cellebraciones y diez díes depués d’una primer presentación en Xixón de los actos del 8 de setiembre con publicidá sólo en castellán, el director de la Oficina, Ramón D’Andrés, elevó un escritu a los sos superiores de la Conseyería de Cultura, Comunicación Social y Turismu nel qu’avisaba del ‘escaezu’ institucional y alertaba de qu’esi olvidu “dexaba en mal llugar” el compromisu’l Gobiernu cola promoción y normalización del asturianu. Hores depués, l’Executivu autonómicu encamentó-y a la Oficina de Política Llingüística la torna al asturianu de la propaganda de los actos del día 8, y la propia conseyera, la socialista Ana Rosa Migoya, anunció la presencia de la llingua asturiana na publicidá editada pol Gobiernu. Los cartelos y programes tán acabante salir de la imprenta. Magar d’esa igua parcial, que mantién dafechu en castellán les invitaciones pal actu solemne nel que mañana s’entregarán les Medalles d’Asturies, dos de los tres partíos qu’integren la coalición que gobierna’l Principáu, Izquierda Xunida y Bloque por Asturies, afondaron güei el so distanciamientu de les cellebraciones oficiales ya insistieron na necesidá de que l’asturianu tenga una mayor presencia institucional. Asina, mientres Izquierda Xunida llamó güei a “influyir nel Gobiernu, empobinándolu phacia posiciones muncho más identificaes cola llingua” y reivindicó la inclusión de la coficialidá na inminente reforma del Estatutu d’Autonomía, el Bloque por Asturies faló abiertamente d’escaezu “sistemáticu” de la llingua asturiana nel Executivu autonómicu. Dambes formaciones cellebrarán el 8 se Setiembre nel parque Los Pericones de Xixón. La presencia del asturianu nel 8 de Setiembre divide a los tres partíos que gobiernen el Principáu 5 de setiembre, 2004 0 FacebookTwitterPinterestEmail
Sociedá El programa’l 30 aniversariu de Conceyu Bable plantega más d’una decena d’actos en cinco ciudaes by asturnet 5 de setiembre, 2004 Más d’una decena d’actos, ente conciertos, esposiciones, presentaciones lliteraries, actividaes relixoses y manifestaciones artístiques. Esa ye la cifra d’eventos que proyecten los organizadores de la conmemoración del 30 aniversariu de Conceyu Bable, que se desendolcarán ente’l 22 y el 26 de payares n’estremaos puntos d’Asturies y culminarán, según el programa provisional, nuna espicha y un menifiestu finales. Magar que la llista d’actos entá tien calter provisional y depende d’algamar el preste de les instituciones y entidaes implicaes, esi programa afita un conciertu’l cantautor Carlos Rubiera en Xixón como l’apertura de les cellebraciones, qu’entamaríen tamién con una esposición de pegatines n’asturianu. Na parte musical, los organizadores de los actos -alitaos dende la Oficina de Política Llingüística’l Principáu- prevén un conciertu de tonada na Cuenca’l Nalón, un recital folk na del Caudal y un festival rock n’Avilés, amás d’un conciertu caberu d’intérpretes del denomináu Nuevu Canciu Astur n’Uviéu. Esi sedría’l pieslle de les cellebraciones, que remataríen con un actu d’homenaxe a los miembros desapaecíos de Conceyu Bable y una espicha y un manifiestu finales. Ente los propósitos del grupu de persones qu’entamen los eventos del anivesariu del hestóricu collectivu fundacional del asturianismu figuren amás la realización de varios actos lliterarios, la fechura d’actividaes vinculaes al ámbitu relixosu y un siguimientu informativu especial, como yá adelantara Asturnews, por parte’l centru territorial de Televisión Española n’Asturies. TVE estudia entamar una programación especial pa conmemorar los 30 años de Conceyu Bable 5 de setiembre, 2004 0 FacebookTwitterPinterestEmail
Emigración El Serviciu dAtención a los Asturianos residentes na Arxentina reanúdase’l llunes 13 de setiembre by asturnet 4 de setiembre, 2004 El Serviciu dAtención a los Asturianos residentes na Arxentina reanudarase a partir del llunes 13 de setiembre, depués del períodu vacaciones y coincidiendo cola parte final del plazu pa solicitar les Ayudes técniques a asturianos o descendientes de nueso discapacitaos que final 30 de setiembre. LAxencia Asturiana dEmigración de la Conseyería de Xusticia, Seguridá Pública y Relaciones Esteriores del Gobiernu del Principáu dAsturias ya punxera esti Serviciu dAtención a los Asturianos residentes na Arxentina lañu pasáu, poniendo al frente del mesmu a la trabayadora social Rosana Vega García. Los servicios que se tan enxertando nesti Serviciu dAtención a los Asturianos residentes na Arxentina y que van continuar ufiertándose dende llunes 13 de setiembre son los de sofitu y asesoramientu a los asturianos residentes na Arxentina, dinformación y orientación sobro les problemátiques sociales, de desendolcu y execución de programes del gobiernu del Principáu dAsturies, de sofitu y asesoramientu sobrol retornu, dinformación sobro les ayudes quufrel gobiernu del Principáuo, y dotros trámites de interés pala Comunidá Asturiana. Los servicios ufrense, previa solicitú de entrevista nel Centru Asturianu allugáu na Cai Solis, 475 de Buenos Aires (teléfonu 43835122) de llunes a xueves y de 9 a 14 hores, y nel Campu Cuadonga del Centru Asturianu que salcuentra allugáu na Avenida del Libertador, 1081, tamién de Buenos Aires, los vienres a les mesmes hores. 4 de setiembre, 2004 0 FacebookTwitterPinterestEmail
Comunicación Les emisores llibres piden collaboración pa ufiertar más programación n’asturianu by asturnet 3 de setiembre, 2004 Les emisores radiofóniques de cálter llibre qu’ufierten programación n’asturianu davezu tan faciendo llamamientos a tolos interesaos pa que propongan proyectos de programes qu’incluir na nueva programación d’esti añu. Tanto Radio Sele n’Uviéu como Onda Peñes en conceyu Gozón faen abierta esa convocatoria, que tien a la llingua de nueso como referente cimeru. “Onda Peñes. Facer Radio” ye una emisora que punxera en marcha hai tiempu la Asociación Cultural El Gaxarte y tolos años llama a los interesaos en facer radio a presenta-yos proyectos de programes pa preparar la so programación de seronda, inviernu y primavera. Esti añu, como ya asocediera nel anterior van tener preferencia los que tean n’asturianu y los que nun seyan exclusivamene musicales y dan de plazu hasta’l 15 de setiembre. Los interesaos puen unviar los proyectos al Apartáu de correos 94, 33440-Lluanco o al corréu elletrónicu ondes@gaxarte.com. Les consultes puen facese tamién al teléfonu 985882626. Y lo mesmo ta faciendo Radio Sele, que fai un brinde a tolos interesaos en facer radio n’asturianu a ponese en contactu con ellos cola fin de preparar la parrilla d’esta temporada que vien. Nel casu de la única emisora llibre dafechamente n’asturianu qu’entamara a emitir n’Asturies, ye requisitu que’l proyectu de programa tea empobináu a la normalización del asturianu. Pue llamase al so teléfonu, 984211684 y dexar una forma de contactu si nun tan. Tamién se pue unviar un fax al mesmu númberu o un corréu elletrónicu a radiosele@asturies.org . La so páxina web ye www.radiosele.net. 3 de setiembre, 2004 0 FacebookTwitterPinterestEmail
Patrimoniu Los arqueólogos de La Carisa enfótense en retomar les escavaciones na prósima temporada de veranu by asturnet 3 de setiembre, 2004 Hai una “necesidá manifiesta” de que les escavaciones nel yacimientu romanu de La Carisa, na llende ente L.lena y Ayer, continúen na prósima temporada de veranu. Asina lo mantienen los arqueólogos responsables de los trabayos, qu’esperen un alcuerdu a lo llargo de los prósimos meses ente Caxastur y el Principáu que permita sufragar una prollongación de la investigación. Un día depués de la vista que cursó al yacimientu el director xeneral de Promoción Cultural y Política Llingüística, Carlos Madera, quien alitó a los ayuntamientos d’Ayer y L.lena a tramitar la declaración de Bien d’Interés Cultural pal complexu arqueolóxicu, los responsables del llabor nel picu Curriel.los destaquen la importancia de los afayos más recientes, ente ellos una fortificación. Según precisó Jorge Camino, qu’integra l’equipu d’arqueólogos de La Carisa xunta Yolanda Viniegra y Rogelio Estrada, los restos del gran campamentu romanu atopáu na cordal de Carracéu ocupen una superficie de 15 hectáries y evidencien que na zona esistió un “teatru bélicu” de gran importancia, polo que llamen a les instituciones a mantener el sofitu que-y vienen dando al so llabor dende’l descubrimientu’l yacimientu, hai agora dos años. Los directores de les escavaciones na llende ente Ayer y L.lena, qu’asoleyaron monedes y otros oxetos dataos nel sieglu I antes de Cristu, completen agora xeres de documentación y estudios xeolóxicos, y enfótense na posibilidá d’entamar una esposición coles pieces afayaes, si bien “ye una idea subyacente que nun sabemos bien cuándo se concretará”, matizó Camino. L’Ayuntamientu de L.lena ta acabante aprobar en Plenu la propuesta de solicita-y a la Conseyería de Cultura, Comunicación Social y Turismu la declaración de Bien d’Interés Cultural pa los restos afayaos na cordal de Carracéu, que respuende al deseyu de l’Asociación d’Amigos de La Carisa, collectivu constituyíu pa defender la promoción y conservación del yacimientu. Madera apoya la reconocencia del yacimientu romanu de La Carisa como Bien d’Interés Cultural 3 de setiembre, 2004 0 FacebookTwitterPinterestEmail