2004

Los conceyos que quieren promover l’usu de la llingua asturiana bien puen mirase nel espeyu de Xixón. La presidenta de L’Academia de la Llingua Asturiana, Ana Cano, sostuvo güei esi argumentu na firma d’un conveniu cola alcaldesa de la ciudá, la socialista Paz Fernández Felgueroso, qu’alitará una mayor presencia del asturianu na vida municipal y nel que Cano ve que l’Alministración llocal va más rápido que l’Autonómica na normalización llingüística.

O dicho n’otres pallabres, tamién de la presidenta de L’Academia, la sociedá civil va per delantre de les instituciones na promoción y usu de la llingua asturiana, nun contestu nel que, insistió Cano, el reconocimientu de la coficialidá ye cada vez más imperativa y “lo contrario ye pura retórica”.

Ana Cano firmó esta mañana nel Ayuntamientu de Xixón un conveniu que tien vixencia pa 2004 -pero prorrogable añalmente- y cuyes aplicaciones práctiques resumió l’Alcaldesa nel asesoramientu na retulación de topónimos nos indicadores viales, el conseyu académicu nel usu cotidianu del asturianu na vida municipal, la inclusión de L’Academia nel conseyu asesor de la Oficina Municipal de la Llingua y la presencia de miembros de la institución nos xuraos de premios lliterarios entamaos pol Consistoriu xixonés.

Pol so llau, la conceyala delegada d’Educación, Carmen Rúa (Izquierda Xunida-Bloque por Asturies), artífice del conveniu xunta la directora de la Oficina de la Llingua, María Xosé Rodríguez, comprometióse a mirar pol cumplimientu del alcuerdu y evitar que’l testu firmáu esta mañana “seya papel moyao”.

“Una prueba de fondu, non de velocidá”. Asina interpreta’l conseyeru de Xusticia, Seguridá Pública y Relaciones Esteriores, Francisco Javier García Valledor, la definición del puxu final de les señes d’identidá d’Asturies nel procesu de reforma autonómica qu’entama a nivel estatal. Valledor participó güei na cellebración del 8 de Setiembre qu’Izquierda Xunida-Bloque por Asturies organizaron en Xixón al marxe’l so sociu nel Gobiernu’l Principáu, el PSOE.

Nel “debate ampliu” que s’avecina, sostién el conseyeru de Xusticia, fai falta buscar un consensu lo más ampliu posible, en particular pa garantizar la declaración del asturianu como llingua coficial na inminente reforma del Estatutu d’Autonomía, reivindicación que pol momentu namás plantega IX-BA d’ente los tres grupos políticos con representación na Xunta Xeneral y capacidá final de decisión al respectu.

Magar del silenciu que PSOE y PP mantuvieron sobro la llingua asturiana nos sos discursos del Plenu institucional del Día d’Asturies, cellebráu ayeri n’Uviéu, Valledor interpreta que tala omisión amuesa que nun hai una oposición esplícita a la coficialidá por parte de socialistes y populares, polo que, entiende’l conseyeru, “ábrese’l camín al diálogu pa poder avanzar”.

Baxo’l lema ‘Un estatutu pa un país dende la izquierda’, Izquierda Xunida-Bloque por Asturies entamó les sos cellebraciones estremaes del 8 de Setiembre nel parque xixonés de Los Pericones con una espicha, xuegos pa neños, bailles tradicionales y l’actuación de la intérprete de tonada Mari Luz Cristóbal Caunedo.

Uviéu foi otru de los escenarios de les conmemoraciones del 8 de Setiembre. La formación Andecha Astur cellebró una manifestación y una espicha na ciudá col lema central ‘Asturies tamién tien drechos’. Izquierda Asturiana, pol so llau, escoyó’l conceyu de Piloña pa realizar la so espicha conmemorativa.

Lo asturiano, primero; el frenu a la emigración por motivos llaborales, envís prioritariu; Don Pelayo, artífice de la Europa d’anguaño. Con esi ideariu básicu estrenaron güei en públicu el Partíu Asturianista (PAS) y la Unión Renovadora Asturiana (URAS) el so proyectu políticu en comuña, qu’anunciaron como antídotu a la “humillación continua” a la que someten a Asturies los partíos “centralistes” al despreciar les sos señes d’identidá.

Nuna ofrenda floral al caudillu Don Pelayo materializada na estatua allugada na xixonesa plaza’l Marqués, los presidentes del PAS y la URAS, Xuan Xosé Sánchez Vicente y Sergio Marqués, respectivamente, presentaron la so confluyencia d’intereses como una ufierta “d’asturianía” empobinada a los ciudadanos “qu’entienden que hai dalgo más que facer que permanecer a la espectativa”.

A la solombra del monumentu a Pelayo, que Sánchez Vicente reivindicó como inagurador d’Asturies como realidá política y al mesmu tiempu creador de la Europa d’anguaño, el cabezaleru asturianista fizo un llamáu a qu’Asturies vuelva ser “un país importante” y alitó a evitar “que los nuesos fíos nun tengan que salir corriendo a buscar el pan fuera”.

Un argumentu nel qu’insistió Marqués, ex presidente autonómicu col PP y cabezaleru del desalcuentru con Francisco Álvarez-Cascos que derivó na creación d’URAS como escisión de los conservadores, sorrayando’l calter pioneru de Pelayo -“qu’empezó esti maraviellosu suañu”- y destacando que la nueva xuntanza política pondrá l’amor por Asturies “penriba de tolo demás”.

L’homenaxe a Pelayo con ocasión del 8 de Setiembre abrió esta mañana yá dafechu les puertes al nacimientu d’una nueva opción política asturianista, que Marqués anunció “sosegada” y que concretará les cuestiones de denominación, programa y llideralgu nos prósimos meses.

Completar la retulación n’asturianu de topónimos na rede viaria, alitar publicaciones en llingua asturiana y supervisar la ‘visibilidá’ d’esi idioma nel conceyu más populosu d’Asturies. A too ello quier contribuyir de forma decisiva el conveniu que l’Ayuntamientu de Xixón y L’Academia de la Llingua Asturiana firmarán mañana nel Consistoriu xixonés, pactu qu’abre un nuevu escenariu municipal de posibilidaes pal espoxigue efectivu del usu del asturianu.

L’alcaldesa de Xixón, la socialista Paz Fernández Felgueroso, y la presidenta de L’Academia, Ana Cano, tienen previsto rubricar un alcuerdu que-y dea puxu a la promoción y dignificación ‘dende arriba’ del emplegu de la llingua asturiana a tolos niveles, d’aplicación tanto nel cascu urbanu como na zona rural y como desendolcu de la Llei d’Usu y Promoción, aprobada hai agora seis años.

Com primeros resultaos concretos del pactu, L’Academia de la Llingua asesorará directamente al Consistoriu n’asuntos de toponimia, participará nos xuraos de los premios lliterarios convocaos pol Ayuntamientu p’alitar la creación n’asturianu y dará-y una atención especial a Xixón na difusión de les sos actividaes editoriales, formatives y culturales.

Nel so llabor, L’Academia trabayará coldu a coldu cola Oficina Municipal de la Llingua de Xixón, organismu qu’echó a andar en xineru pasáu y qu’acumula una llarga llista de tornes al asturianu yá realizaes tanto pa servicios municipales como pa empreses y particulares.

Col conveniu ente Ayuntamientu y Academia, Xixón afítase como la punta de llanza de la eclosión a nivel municipal de la promoción de la llingua asturiana, yá qu’amás prevé tener ellaboráu antes de fin d’añu un estudiu sociollingüísticu dirixíu pol caderalgu Francisco Llera Ramo que, según adelantó Asturnews, basaráse en 600 entrevistes y permitirá asoleyar los primeros resultaos nel mes d’ochobre.

L’estudiu sociollingüísticu de Xixón basaráse en 600 entrevistes y tará llistu pa fin d’añu

“Nun van ser les denominaciones de ‘hestóriques’ les que provoquen esmolición ente nosotros; nun pensamos qu’haiga comunidá ensin hestoria, en tou casu con otra hestoria”. Con esa frase resumió esta tarde’l voceru parlamentariu’l PSOE, Fernando Lastra, nel Plenu institucional del 8 de Setiembre, la opinión de los socialistes sobro’l nuevu debate al rodiu l’Estáu de les Autonomíes, nel que’l PSOE defenderá que los asturianos “somos distintos, nunca meyores o más importantes”.

Na sesión estraordinaria cola que los tres grupos políticos con representación na Xunta Xeneral del Principáu abrieron güei les cellebraciones del Día d’Asturies, Lastra empezó citando al escritor Xuan Bello -que citaba a so vez a José Ortega y Gasset pa dicir que los primero que se ve d’Asturies al entrar per Payares “ye que nun se ve”-, acabó llamando a “olvidanos de los nuesos problemes por unes hores y cellebrar la romería”, y afitó l’alcuerdu y el consensu como los dos pegollos nos que, na so opinión tien que s’apoyar la inminente redistribución del poder efectivu de les comunidaes autónomes.

Pa ello, entiende’l voceru socialista acordies colo asoleyao en díes pasaos por otros cabezaleros del PSOE asturianu, la llende de les reclamaciones autonomistes ta en que “nenguna singularidá o particular característica hestórica o cultural suponga privilexos o discriminaciones” ente los ciudadanos del Estáu español.

Poro, les cuestiones identitaries nun paecen tar na axenda inmediata de los socialistes asturianos: “Falamos más de la patria que de les coses que nos faen tar a gustu nella”, sentenció Lastra, n’alusión a servicios como l’emplegu, la educación y la sanidá.

El PP opina lo mesmo, yá que casi en términos esactos pronuncióse’l voceru’l Partíu Popular na Xunta Xeneral, Juan Morales, pa quien lo fundamental nun ta en facer del Principáu “una nacionalidá hestórica, que ya lo ye, sinón una Asturies de primer nivel de riqueza, emplegu y perspectives de futuru, más allá de debates terminolóxicos.

La oficialidá como obligación

Nesi escenariu de declaración d’intenciones énte’l prósimu discutiniu del nuevu modelu autonómicu, el tercer partíu en representación nel Parlamentu asturianu pero sociu de Gobiernu de los socialistes, Izquierda Xunida-Bloque por Asturies, foi l’únicu en destacar “la obligación irretrucable del reconocimientu de la oficialidá de la llingua asturiana, non sólo como garantía de drechos básicos sinón amás, y ensin complexos, como una de les nuestres aportaciones más singulares al patrimoniu cultural español y européu.

La vocera de la coalición, Noemí Martín, que lleó’l so discursu institucional dafechu n’asturianu, reivindicó asinamesmo “la bayura cultural como daqué arriquecedor y positivo, daqué a afitar y compartir”.

Pol so llau, la presidenta de la Xunta Xeneral, María Jesús Álvarez, que peslló’l Plenu institucional, defendió’l calter “precursor” d’Asturies na reivindicación de la so autonomía y evocó el “exemplar rexonalismu asturianu” definíu tamién por Ortega y Gasset nun mitin cellebráu en 1932 nel Teatru Campoamor d’Uviéu.