2004

La Delegación del Gobiernu n’Asturies qu’empobina el socialista Antonio Trevín tien abiertu un espediente sancionador contra ocho militantes de la Xunta pola Defensa de la llingua que se manifestaron el pasáu 8 de Setiembre en Cuadonga énte les autoridaes institucionales d’Asturies. Los militantes de la Xunta reivindicaben énte la comitiva encabezada pol presidente del Principáu Vicente Álvarez Areces la reconocencia de la oficialidá pal asturianu.

L’apertura del espediente sancionador a los miembros de la organización en defensa de la llingua podía llevar a la Delegación del Gobiernu a impone-yos una multa administrativa por manifestase illegalmente y en presencia de les másimes autoridaes del gobiernu asturianu.

Una de les formaciones integrantes del executivu presidíu por Areces, el Bloque por Asturies, acaba emitir un comunicáu nel qu’espresa el so “plasmu” ente la iniciativa sancionadora de la Delegación del Gobiernu central y acusa a los responsables de l’acción entamada contra la Xunta de pretender “amenorgar o silenciar una hestórica reivindicación que fai propia más del 60% de la población asturiana”. Nel so comunicáu el Bloque considera “escandaloso y provocador esti intentu de criminalizar a un movimientu y en concreto una reivindicación dafechu pacífica comomo fue y son toles que lleva a acu na cai la Xunta pola Defensa la Llingua”. Los socios minoritarios del gobiernu de coalición asturianu rematen afirmando qu’esta organización política “asume y defende como propia la reivindicación d’oficialidá del asturianu” fecha pola Xunta y caltién que mentantu nun s’igua esta situación llegal: “nun podemos falar d’otra cosa que de la privación, el secuestru o el robu de los nuesos derechos civiles”, dalgo que’l Bloque por Asturies considera “nun-y ta consentíu a nenguna institución pública, gobiernu o gobernante democráticu”.

El profesor David Heat de la universidá canadiense de Western Ontario aprovechó la so conferencia ‘Las encuestas del ALPI en Asturias’ na segunda sesión de les Xornaes Internacionales d’Estudiu de l’Academia pa reivindicar el llabor desenvueltu polos investigadores de la escuela de Menéndez Pidal. Filólogos como Navarro Tomás, Sanchis Guarner o l’asturianu Rodríguez Castellano vieron interrumpíu el so trabayu pola guerra civil y munchos d’ellos sufrieron la represión franquista como toa una xeneración d’intelectuales de la II República. Heat pidió pa estos homes la rehabilitación hestórica del so nome y el so trabayu, “fundamental y un exemplu de rigor pa les xeneraciones modernes de filólogos”, en palabres del canadiense.

El profesor Heat venía a les Xornaes pa falar de les encuestes referíes a Asturies del Atlas Lingüístico de la Península Ibérica (ALPI), entamáu por Menéndez Pidal y los sos discípulos del Centru d’Estudios Hestóricos. La ciudá d’Uviéu, sé d’esti conceyu añal de la filoxía asturiana, tenía, sicasí un significáu especial pal morfólogu canadiense: ende, va malpenes tres años protagonizó un afayu que llevaba más d’una década tentando consiguir. N’Uviéu atopó una parte bien significativa de los orixinales del ALPI, hasta entós ensin paraderu conocíu, nel archivu personal de Lorenzo Rodríguez Castellano, heriedáu pola so familia tres la muerte del investigador asturianu. En palabres de Heat esi foi “el descubrimientu más importante de tola mio carrera”, l’afayu d’un material que nun duldó en calificar de “auténticu tesoru, una mina bayurosa d’información” sobro l’estáu de les llingües falaes na Península Ibérica na dómina en que se desenvolvió el llabor de recopilación de datos del ALPI y que comprende un periodu importante del sieglu XX.

David Heat ye un de los másimos espertos nel Atlas Llingüísticu promovíu por Menéndez Pidal y empobináu por Navarro Tomás hasta’l so esiliu tres la guerra civil. Desque tuvo nel so poder los orixinales de Rodríguez Castellano y bien lluego el restu de los documentos esistentes, atopaos en Santiago de Compostela, dedicó’l so esfuerzu a ponelos a disposición de cualquier investigador interesáu. Anguaño esta información ta disponible nuna páxina web d’accesu llibre: www.alpi.ca na que se pueden consultar los orixinales, xunto al restu del material conserváu del proyectu entamáu polos investigadores del Centru d’Estudios Hestóricos.

L’afayu del archivu de Rodríguez Castellano n’Uviéu foi un de los últimos episodios de la hestoria d’un llabor que dende 1900 cuando lu concibió Menéndez Pidal foi viviendo les más diverses vicisitues, casi al empar del cursu hestóricu de la España del sieglu pasáu. La mayoría de les encuestes ficiéronse a lo llargo de la década de los años 30 y cola guerra civil y l’esiliu del so principal empobinador Navarro Tomás, los materiales acaben siguiendo’l camín del investigador a Nueva York. Les encuestes reanúdenles en 1947 los investigadores del equipu orixinal que siguen n’España y en 1950 el mesmo Navarro Tomás cede al Centru Superior d’Investigaciones Científiques (CSIC) los materiales nel so poder. El primer tomu apaez publicáu en 1962, el segundu enxamás diba publicase. Hasta’l descubrimientu del profesor Heat y la puesta en rede de la so páxina web los archivos orixinales del ALPI tuvieron pigazando nun olvidu casi completu. Esti olvidu real nun impidió que dalgunos filólogos ‘oficiales’ del réxime usaran y abusaran del material guardáu nel CSIC pa los sos propios trabayos, como reconoció Heat a preguntes del so presentador nes Xornaes, el profesor García Arias.

Heat destacó el detallismu y minuciosidá de los cuestionarios fechos polos redactores del ALPI, que nel casu d’Asturies amuesen un conxuntu de datos bien curiosu en proporción a la relevancia demográfica del nuestru país y a les sos dimensiones xeográfiques. Esti rasgu de minuciosidá que presenten les encuestes d’Asturies foi consecuencia del interés especial que Menéndez Pidal sentía dica l’ámbitu llingüísticu astur-lleonés, el de los sos propios oríxenes familiares. Tamién la presencia relevante nos trabayos del ALPI del asturianu Lorenzo Rodríguez Castellano hubo influir nel detallismu de la información tocante a la llingua asturiana. Rodríguez Castellano ye autor ente otros trabayos, de dalgunos fundamentales dedicaos al asturianu, especialmente al so dialectu occidental.

Les Xornaes de l’Academia finen güei cola presencia de la profesora y escritora asturiana Paquita Suárez Coalla de la City University of New York(CUNY).La última sesión de les XXIII Xornaes Internacionales d’Estudiu principia a les 16,30 cola conferencia de Roberto González-Quevedo ‘Símbolos de sangre’, darréu van presentar comunicaciones el periodista y director d’ASTURNEWS Próspero Morán: “Periodismu alternativu y llingües minorizaes: weblog y la economía de l’antención”, y van siguilu Rafael Rodríguez, Xosé Lluis Campal, Xuan Porta y Aníbal González, Hermenegildo Bardio y Javier Irigoyen.

El profesor Emilio Ridruejo de la Universidá de Valladolid pronunció la primer conferencia de les XXII Xornaes Internacionales d’Estudiu de l’Academia de la Llingua Asturiana. Na ponencia titulada: “El aprovechamiento de los mecanismos analógicos en los procesos de estandarización de las lenguas. El ejemplo del asturiano”, Ridruejo remembró que’l procesu de fixación de la llingua asturiana entamáu pola Academia sigue les pautes xenerales de procesos similares y calterizase por una combinación de rigor filolóxicu y curiáu énte un posible rechazu social al estándar ellaboráu.

El profesor de la Universidá de Valladolid emponderó’l llabor desenvueltu pola Academia de la Llingua en procuru d’un modelu común pal asturianu comparándolu coles situaciones vivíes por otros idiomes minorizaos. “En toles sociedaes hai un grupu cabezaleru y de prestixu que fixa l’estándar llingüísticu y non siempre lu acaben aceptando los propios falantes”, aseguró Ridruejo, que punxo’l casu del swahili en Kenia, consideráu artificiosu y estrañu pola propia población. El prestixu social del grupu cabezaleru ye esencial nesos procesos, a xuiciu del autor de la conferencia, “inda a veces son otros factores los qu’influin, mesmo l’azar o razones de tipu prácticu, como sucede en Singapur, onde la fixación del estándar del malayu empobínalu la Cámara de Comercio, guiándose pola fala de los sos propios empleaos o de los empresarios locales” afirmó Ridruejo.

Nuna conferencia na que’l filólogu vallisoletanu empezó evocando el so primer contactu cola llingua asturiana nos sos años d’estudiante al través de los trabayos dialectolóxicos de Zamora Vicente, Lapesa y otros autores, foi desgranando los mecanismos pelos que s’avecen formar los modelos xenerales de les llingües. Aparándose nel casu del asturianu Emilio Ridruejo destacó les singularidaes que presentaba la normativización de la nuestra llingua, un procesu nel que s’apostara por preservar bien de rasgos de les variantes “probablemente -barruntó- por razones de calter sociollingüísticu en gran parte, pa evitar un posible rechazu social de los propios falantes o de los grupos roceanos al procesu”. Dende una óptica esterna a la realidá asturiana Ridruejo acolumbró per un llau la esistencia bultable d’una situación de diglosia y per otru de variantes fondamente arraigaes en comunidaes pequeñes y conservadores, productu del islamientu xeográficu. Reconoció qu’énte una situación tala el llabor entamáu pola Academia de la Llingua nun hubo ser fácil, sobremanera teniendo en cuenta que “nun se cuntaba con una tradición normalizadora anterior y los modelos d’otres realidaes non siempre tienen aplicación xeneral”.

El profesor de la Universidá de Valladolid terminó la so conferencia alendando a los sos colegues de l’Academia asturiana nel so trabayu normativizador y remató afirmando que “si esi llabor non siempre yera comprendíu pola sociedá o remanecía dalguna posible reacción de rechazu polos falantes, yera lo natural y una amuesa de que la llingua asturiana taba viva”, na so opinión: “namás les llingües que nun provoquen nenguna reacción nin favorable nin contraria tan muertes, namás eses son llingües artificiales”.

Na sesión inaugural de les Xornaes intervinieron tamién con comunicaciones Miguel Ramos Corrada, Xosé Lluis García Arias, Héctor García Xil, Liliana Díaz Gómez y Xulio Viejo. La profesora Carmen Muñiz Chacón de la Universidá d’Uviéu punxo pieslle a la xornada cola conferencia: “La entonación y el conxuntu de rasgos prosódicos ba carauterización d’una llingua”.

Les Xornaes d’Estudiu siguen güei a les 16,30 con una ponencia del americanu David Heap alrodiu de les encuestes del Atlas Llingüísticu de la Península Ibérica n’Asturies y comunicaciones d’Ana Cano, Esperanza Mariño, Pilar Fernández, Mª del Mar Martín y Xuan Santori.

David Heap, de la Universidá de de Western Ontario, nos Estaos Xuníos y Paquita Suárez Coalla, de la City University of New York, van ser los espertos cimeros de les XXIII Xornaes Internacionales d’Estudiu que s’inauguren güei y van cuntar cola participación de munchos otros espertos como Emilio Ridruejo, Carmen Muñiz, Roberto González-Quevedo y el direutor d’Asturnews, Próspero Morán,ente otros.

El profesor de la Universidá de de Western Ontario David Heap va falar nes Xornaes sobro ‘Las encuestas del ALPI para Asturias’ y Paquita Suárez Coalla de la City University of New York va disertar alrodiu de La experiencia de la escritura dende dos llinguas marxinadas:l’asturianu y el castellanu

Na programación de les xornaes, amás d’estes conferencies tan previstes otres del académicu de la llingua asturiana Roberto González-Quevedo sobre Símbolos de Sangre;, otra de Carmen Muñiz Cachón, de la Universidá d’Uviéu, sobro La entonación y el conxuntu de rasgos prosódicos na carauterización d’una llingua; y d’Emilio Ridruejo, de la Universidá de Valladolid, sobro ‘El aprovechamiento de los mecanismos analógicos en los procesos de estandarización de las lenguas. El ejemplo del asturiano’.

Comunicaciones estremaes

Amás de la participación del Profesor de Periodismu de la Universidá Carlos III de Madrid y académicu de la llingua asturiana, Próspero Morán que falará sobro ‘El periodismu alternativu y les llingües minoritaries’, presentaránse nes Xornaes comunicaciones d’Ana Cano González ‘L’álbum de Josefina Pérez Ayala’; Xosé Lluis Campal ‘Sobre el bable (1902), una reflexón d’un interesante artículu periodísticu de fai más d’un sieglu apaecíu por entregues en El Carbayón’, Xosé Lluis García Arias ‘Galicismos’; Miguel Ramos Corrada ‘Dalgunos casos de yeísmu n’asturianu’ o Xulio Viejo Vázquez ‘Valoración, intercomunicación y dialectoloxía: la vivencia de la llingua nel Quirós tradicional’. Xunta estos espertos presentarán comunicaciones otros como Liliana Díaz Gómez, María del Pilar Fernández González, Héctor García Gil, Esperanza Mariño Davila, María del Mar Martín Martín, Xuan Porta Allende, Rafael Rodríguez Valdés, Xuan Santori Vázaquez, Aníbal González Miyares, Hermenegildo Bardio Díaz y Javier Fernández Irigoyen.