Emigración Lausana y Xinebra piesllen la visita institucional de Valledor a Suiza by asturnet 14 de payares, 2004 Lausana y Xinebra piesllen la visita institucional del Conseyeru de Xusticia, Francisco Javier García Valledo, y el direutor de l Axencia Asturiana de Emigración del Principáu dAsturies, Luis Miguel fernández, a Suiza quentamaren el vienres inaugurando les nueves instalaciones del Centru Asturianu de Berna. Esti sábadu, día 13, la comitiva’l Principáu desplazóse a Lausana, ciudá na que permaneció hasta les 21 hores de la nueche, momentu nel que dio por finada la so visita a los emigrantes d’esa llocalidá y partió pa Xinebra. Nesta ciudá trescurrirá la xornada’l domingu 14, día caberu de la visita que la representación institucional asturiana col conseyeru de Xusticia, Francisco Javier García Valledor, a la testa ta faciendo esti mes de Payares a Suiza. Pa esti domingu 14 ta previstu un alcuentru al mediudía cola colonia asturiana afitada en Xinebra. La colonia asturiana en Suiza inaguraba con esta visita y de forma oficial nueves dependencies en Berna y conocía de primer mano los planes del Gobiernu’l Principáu pal collectivu emigrante. Una representación institucional del Executivu, encabezada pol conseyeru de Xusticia, Francisco Javier García Valledor, aniciaba nesa ciudá una visita de tres díes al país helvéticu qu’incluyía alcuentros nos Centros Asturianos de Xinebra y Lausana. Cumpliendo’l programa previstu la primer etapa de la visita foi a la ciudá de Berna, onde Valledor inaguró les instalaciones del Centru Asturianu d’esa llocalidá a les 19 hores del vienres. L’axenda del conseyeru pa esa xornada axuntó amás un alcuentru col embaxador d’España. El Director de l’Axencia asturiana de la emigración Luis Miguel Romero y el Conseyeru d’Asuntos Esteriores Javier Valledor protagonizaron lactu central en Berna que cincaba a la inauguración desa sede del Centru Asturianu de Berna, sofitada con una ayuda económica de 24.000 euros de l Axencia Asturiana de Emigración del Principáu dAsturies. Na semeya que fai compaña a estes llínees pue vese a Luis Miguel Fernández, direutor de l’Axencia Asturiana d’Emigración; Joaquín Hernández, presidente del Centru Asturianu de Berna; el Conseyeru Francisco Javeir García Valledor y Rosario Iniesta de Bricio, de la Conseyería de Trabayu de Berna. 14 de payares, 2004 0 FacebookTwitterPinterestEmail
Patrimoniu Mieres busca financiación pa crear rutes montunes con diez grandes escultures de seres mitolóxicos by asturnet 12 de payares, 2004 Diez grandes figures en bronce de xanes, cuélebres y busgosos. L’Ayuntamientu de Mieres quier da-y más puxu turísticu al valle de Cuna y Cenera cola creación de tres rutes montunes al rodiu de la mitoloxía esculpida, un proyectu que güei se presenta al públicu na so versión orixinal en maera, pero que tovía nun tien la financiación necesaria. Pa poder llevalu alantre, los responsables municipales de Mieres buscarán implicar a conceyos prósimos y prevén la posibilidá d’executar la iniciativa por fases pa evitar un gran desembolsu económicu d’una sola vegada. Si a la fin s’algama el dineru necesariu, les biesques de Cuna y Cenera tarán ‘habitaes’ por diez escultures d’otros tantos seres mitolóxicos cuyes dimensiones variarán de forma proporcional a los personaxes, hasta los cinco metros d’altor de la representación del cuélebre. De forma adicional, el proyectu, idegáu pol escultor llocal José Antonio Llonguera, inclúi l’allugamientu d’otres tres figures, una d’elles alegórica a los estudiosos de la mitoloxía, otra n’homenaxe a Valentín Villar en Cenera y una tercera n’alcordanza d’Aurelio de Llano nes inmediaciones del Muséu Etnográficu de Gallegos. La iniciativa complétase cola creación d’un puntu d’interpretación pa esplicar el paisaxe y la cultura del conceyu y, mui especialmente, cola recuperación del pueblu abandonáu de Foz, onde’l Consistoriu proyecta escenificar actividaes populares tradicionales como la recoyida’l maíz o la mazana, abiertes a la participación de los visitantes. Too ello son futuribles. Pol momentu, el públicu pue agüeyar a partir de güei nel Hotel de Mieres, allugáu na cai Oñón, los diseños orixinales de les escultures en maera. L’amuesa quedará inagurada, baxo’l títulu ‘Bosque Encantáu’, a les 19,30 hores pol alcalde de la villa, Luis María García. 12 de payares, 2004 0 FacebookTwitterPinterestEmail
Música L’uvieín Ramón Melendi completa l’añu del so despegue musical grabando’l villancicu de la Vuelta by asturnet 12 de payares, 2004 Ramón Melendi remata el so añu triunfal. L’intérprete uvieín, que lleva más de 200.000 copies vendíes del so discu d’estrenu, ‘Sin noticias de Holanda’, y qu’ocupó durante selmanes los primeros llugares nes llistes de ventes, pesllará 2004 con otru ‘güelpe’ de gran difusión: El músicu grabará el llunes el villancicu promocional de la Vuelta Ciclista a España xunta varios corredores profesionales. El nome de Melendi yá s’asociaba dafechu a la competición ciclista, depués que’l so tema ‘Con la luna llena’ -y pusiera la sintonía a la Vuelta y el músicu uvieín grabara un anunciu promocional xunta’l ciclista Abraham Olano. Esa iniciativa upó al intérprete asturianu en poques selmanes al númberu ún nes llistes musicales de ventes del Estáu. La segunda de les grandes cites que Ramón Melendi tien previstes pa rematar l’añu ye un conciertu el prósimu 22 d’avientu nel Palau Sant Jordi de Barcelona, un equipamientu polivalente emblemáticu de la Ciudá Condal y con un aforu pa más de 13.000 espectadores. Nacíu n’Uviéu en 1979, Melendi ta consideráu como ún de los cantantes revelación del añu, depués d’ufrir 70 recitales per tol Estáu na so xira de veranu. En febreru de 2003, el cantautor asturianu asoleyó el qu’hasta agora ye’l so únicu trabayu nel mercáu, ‘Sin noticias de Holanda’. 12 de payares, 2004 0 FacebookTwitterPinterestEmail
Sociedá Un artículu pioneru define, na revista ‘Asturies’, la singularidá xenética del gochu celta by asturnet 12 de payares, 2004 El gochu celta como especie xenéticamente estremada. El nuevu númberu de la revista ‘Asturies’, qu’anueche se presentó n’Uviéu, incorpora un artículu pioneru qu’afonda na singularidá d’esa variedá porcina y rescata pal públicu xeneral les pieces d’orfebrería del llamáu ‘conxuntu de Vega de Ribadeo’. La Fundación Belenos ultima yá sendos artículos sobro cuernes y l’abedul pal prósimu númberu, que saldrá antes de fin d’añu. Según destacó Ástur Paredes, coordinador y diseñador de la revista, el testu al rodiu’l gochu celta, ellaboráu pol estudiosu de les races autóctones asturianes Antón Álvarez Sevilla, supón la primer definición de la singularidá xenética de la especie y apaez nes páxines de ‘Asturies’ de forma paralela al so unvíu a un congresu internacional especializáu. Asinamesmo, el númberu 17 de la publicación semestral incorpora estudios monográficos sobro la construcción mitolóxica del Busgosu, l’usu de los aguyones nel llevantamientu d’horros, la muria d’Avilés y la obra d’Alejandro Casona, ente otros testos. La Fundación Belenos, editora de la revista dende la so creación, en 1996, trabaya yá nos conteníos del prósimu númberu de la publicación periódica, que verá la lluz antes de fin d’añu y qu’incluyirá un estudiu centráu nel usu tradicional de les cuernes como cacíos, oxetos d’arte tradicional ya incluso elementos asociaos a la superstición popular. Asina, el númberu 18 de ‘Asturies’, que tamién abordará la hestoria gráfica de Candás y la implantación de l’abedul nel Principáu, mantendrá l’habitual apuesta de Belenos por “competir dende’l puntu de vista visual” y siguirá asoleyando una tirada de mil exemplares, adaptada, al xuiciu de Belenos, a la realidá asturiana. “Si tuviéremos en Cataluña, a lo meyor tirábemos 12.000”, precisó Paredes. 12 de payares, 2004 0 FacebookTwitterPinterestEmail
Sociedá Los neños tendrán por primer vegada accesu destacáu a la llingua asturiana nel salón Mercaplana by asturnet 12 de payares, 2004 Los neños podrán lleer y falar n’asturianu nel Salón d’ociu navidiegu Mercaplana, que nes últimes ediciones atraxo a una media de 80.000 visitantes. La Oficina de la Llingua de Xixón, que ta acabante repartir 670 axendes pa difundir l’usu del asturianu ente los escolinos del conceyu, rexentará un puestu nel que por primer vegada la llingua asturiana tendrá una presencia destacada nel certame infantil y xuvenil. A partir del 22 d’avientu y hasta’l 4 de xineru, responsables de la Oficina Municipal de la Llingua pondrán a disposición de los neños qu’accedan a Mercaplana, salón habilitáu nel recintu ferial de Xixón, dos esposiciones interactives en tornu a dos llibros infantiles: ‘La estrella que subiere al cielu’, de Xuan Xosé Sánchez Vicente, y ‘Trasgu’, obra de Reyes Tuero con illustraciones de Berto Álvarez Peña. Amás de les actividaes asociaes a la llectura d’eses obres, los visitantes podrán tomar parte d’otres iniciatives programaes pola Oficina de la Llingua nel so ‘stand’ del salón infantil y xuvenil, ente les que destaquen sesiones de cuentacuentos n’asturianu. L’organismu municipal de promoción de la llingua asturiana del Ayuntamientu de Xixón dará-y asina continuidá a la so difusión del idioma ente los ciudadanos más mozos, yá que ta acabante distribuyir un total de 670 axendes n’asturianu ente los estudiantes y profesores de Llingua nos niveles d’Educación Secundaria Obligatoria y Bachilleratu, y los mayestros d’asturianu en Primaria. Nuna tirada de mil exemplares, el documentu repartíu ente docentes y escolinos pol departamentu que dirixe María Xosé Rodríguez, facilita espacios p’anotaciones a partir d’un calendariu del cursu escolar y con pequeños testos didácticos, ente los que figuren conseyos pa estudiar. 12 de payares, 2004 0 FacebookTwitterPinterestEmail
Sociedá La llegada de la seronda baxó los precios de la cultura n’Asturies, según l’Institutu d’Estadística by asturnet 12 de payares, 2004 Los productos y servicios culturales siguen conteniendo l’aumentu xeneralizáu de los precios. Conforme asoleyó esta mañana l’Institutu Nacional d’Estadística (INE), les tarifes de la cultura baxaron un puntu n’Asturies durante’l mes d’ochobre y compensaron la xubida xeneral de precios, que foi del 1,2 por cientu. La proyección de datos del Institutu d’Estadística amuesa, amás, que los asturianos paguen agora un 1 por cientu menos qu’hai un añu por consumir cultura, mientres que l’indicador d’inflación acumulada -perda progresiva del valor del dineru no que va d’añu, manifestada nel aumentu de los precios-, allúgase pa la estaya d’ociu y cultura nel valor negativu del 1,2 por cientu, ye dicir, que les tarifes son agora un 1,2 por cientu más barates qu’en xineru. A la vista de talos datos, la cultura afítase n’Asturies como un sector que contién l’aumentu xeneral de los precios, yá que sólo los precios d’alcohol, tabacu, comunicaciones y hostelería baxaron n’ochobre, pero toos ellos en términos casi impercibibles que nun superaron el 0,2 por cientu. Con calter xeneral, los asturianos padecieron nel mes pasáu un notable incrementu nes tarifes del vestíu y el calzáu, un 9,2 por cientu, principal causante del aumentu del IPC nel Principáu xunta les más discretes xubes rexistraes na enseñanza, el tresporte y la vivienda, ente’l 1,2 y el 1,7 por cientu. Datos íntegros na web del Institutu Nacional d’Estadística 12 de payares, 2004 0 FacebookTwitterPinterestEmail
Emigración La colonia asturiana en Suiza inagura dependencies na ciudá de Berna by asturnet 11 de payares, 2004 La colonia asturiana en Suiza inagurará de forma oficial nueves dependencies en Berna y conocerá de primer mano los planes del Gobiernu’l Principáu pal collectivu emigrante. Una representación institucional del Executivu, encabezada pol conseyeru de Xusticia, Francisco Javier García Valledor, anicia una visita de tres díes al país helvéticu qu’incluyirá alcuentros nos Centros Asturianos de Xinebra y Lausana. Si se cumple’l programa previstu, la primer etapa de la visita sedrá la ciudá de Berna, onde Valledor inagurará les instalaciones del Centru Asturianu d’esa llocalidá a les 19 hores de mañana, vienres. L’axenda del conseyeru pa esa xornada prevé amás un alcuentru col embaxador d’España. El sábadu, la comitiva’l Principáu desplazaráse a Lausana, ciudá na que permanecerá hasta la nueche, yá que a les 21 hores la delegación asturiana dará por finada la so visita a los emigrantes d’esa llocalidá y treslladaráse a Xinebra. Ehí trescurrirá la xornada’l domingu, día caberu de la visita a Suiza, con un alcuentru al mediudía cola colonia asturiana de la ciudá. Valledor entamó’l so recorríu hacia Centroeuropa con una escala en Barcelona, onde mantuvo una xuntanza de trabayu col conseyeru de Relaciones Institucionales de la Generalitat, Joan Saura, na que dambos dirixentes conversaron sobro la inminente reforma de los Estatutos d’Autonomía, un procesu que quier liderar Cataluña. 11 de payares, 2004 0 FacebookTwitterPinterestEmail
Gastronomía Samartín del Rei Aurelio propón homoxeneizar la imaxe de los chigres a partir de la tradición by asturnet 11 de payares, 2004 Chigres de diseñu enraigonaos nes costumes populares. Esi ye l’oxetivu que persigue l’Ayuntamientu de Samartín del Rei Aurelio, promotor d’una campaña d’homoxeneización de la imaxe de les sidreríes que-yos ufierta un estudiu de diseñu gratuitu a los titulares d’actuales y futuros chigres. El conceyu cellebra a partir de güei la Fiesta Gastronómica de los Nabos con tonada, pasucáis y folclore internacional. L’envís del municipiu de la cuenca’l Nalón pasa por facer de les sidreríes llocales con una seña d’identidá propia, y pa ello propón diseñar y decorar los establecimientos hosteleros d’esi tipu con elementos de la cultura ya hestoria asturianes y un ambiente “acoyedor”. L’exemplu: El llocal ‘El chigre d’Aurelio’, concebíu como bar pero con posibilidaes adicionales de funcionar como restaurante y tienda. Samartín del Rei Aurelio somórguiase güei na cellebración de la Fiesta de los Nabos, cuyu programa d’actos ta amenazáu pol mal tiempu. Pa esta tarde tán previstos un recital de tonada asturiana a les 18 hores na Plaza Ramón y Cajal, el pregón y la entrega’l ‘Nabu d’Oru’ a la Banda de Música del conceyu. El programa festivu siguirá mañana, vienres, con pasucáis y l’actuación d’un grupu de folclores tradicional húngaru, y tendrá continuidá nel fin de selmana cola animación d’agrupaciones musicales d’Asturies, Galicia y Murcia (sábadu), mientres que’l domingu cellebraráse una feria monográfica de la miel. Con epicentru en Sotrondiu, la Fiesta de los Nabos entamóse nos años setenta, cuando un grupu de vecinos decidieron creala n’homenaxe a un productu cultiváu nel conceyu dende l’añu 774, cuando, según les cróniques, el Rei Aurelio fundó’l municipiu. La cellebración coincide cola festividá de San Martín de Tours, patronu’l conceyu. 11 de payares, 2004 0 FacebookTwitterPinterestEmail
Lliteratura Xixón desdobla la so actividá cultural con un festival de cuentos dientro y fuera de los colexos by asturnet 11 de payares, 2004 Xixón, de fábula. La ciudá abre güei el so II Festival de Cuentos, nel que cuatro ‘contadores’ profesionales espardirán les sos hestories diurnes per colexos ya institutos, y narrarán rellatos nocherniegos nel Muséu Barjola y un café de Cimavilla. El certame desdobla l’actividá cultural xixonesa, marcada dende’l martes pol empiezu del Festival de Jazz llocal. Entamáu pola asociación cultural Asturactiva col sofitu de delles entidaes públiques y privaes, l’alcuentru de narradores d’hestories tendrá la so primer sesión abierta -fuera de los centros d’enseñanza de la ciudá, onde los escolinos recibirán a los cuentacuentos- a partir de les 20 hores de güei nel Muséu Barjola, allugáu nos Xardinos de la Reina. Saldrán a escena l’asturiana Charo Pita y los integrantes del collectivu alicantín Grupu Albo. Esi equipamientu cultural sedrá tamién l’escenariu de les narraciones, mañana, del gaditanu Pepe Maestro y el venezolanu Rubén Martínez, narradores que volverán a contar cuentos el sábadu nel Barjola, nesta ocasión xunta’l Grupu Albo. El segundu de los escenarios abiertos previstos ye’l café ‘El Arca de Noé’, en Cimavilla, onde Pepe Maestro contará hestories a les 22,30 de güei. De forma paralela, el Conseyu de la Mocedá acueye un cursu a cargu de Charo Pita tituláu ‘Fórmulas de encuentamiento’, empobináu a cuentistes y concebíu pa formar a nuevos profesionales de la narración oral nel usu del llinguaxe xestual, el manexu de les pallabres y la esbilla y orniatu de narraciones. Dotramiente, Xixón continúa somorguiáu nel so Festival de Jazz, qu’esta nueche lleva al escenariu nel teatru Xovellanos al trompetista Terence Blanchard, eloxáu por Miles Davis como’l meyor de la so xeneración y autor, ente otros trabayos, de la banda sonora ‘Malcolm X’. 11 de payares, 2004 0 FacebookTwitterPinterestEmail
Sociedá Los bares de copes tarán obligaos por llei a adelantar el so horariu de pieslle by asturnet 11 de payares, 2004 Los bares de copes d’Asturies nun podrán abrir hasta l’alborecer. Un decretu aprobáu güei pol Conseyu de Gobiernu obliga a los llocales con música amplificada a trancar a les 3,30 hores de llunes a xueves y dos hores más tarde los fines de selmana. Los chigres deberán pesllar a les 2,30 como másimo, y les discoteques y sales de fiestes tendrán que cesar la so actividá a les 7,30 hores. La midida a la que güei -y dio’l preste el Gobiernu -qu’entrará en vigor dientro d’unos quince díes, darréu s’asoleye nel Boletín Oficial del Principáu- fixa l’apertura de los bares de copes pa les 11 de la mañana, prohíbe dafechu l’usu d’aparatos amplificaos de soníu antes de les 10 hores y estira la hora de pieslle, en vienres, sábados y viéspores de festivos, hasta’l másimu de les 5,30 de la madrugada. Muncho antes deberán trancar los bares, cafeteríes, restaurantes y chigres, cuyes puertes habrán tar pesllaes a la 1,30 con calter xeneral y a les 2,30, como másimu, nos vienres, sábados y nueches previes a díes festivos. Los llocales empobinaos pa menores de 16 años cesarán la so actividá yá a les 22,30 hores. Magar de too ello, el Gobiernu asturianu prevé dalgunes escepciones a los horarios, particularmente nos casos de fiestes patronales, y concede una hora adicionales a chigres, bares de copes y discoteques pa la so hora de pieslle nos xueves de la temporada de veranu. Web oficial del Principáu 11 de payares, 2004 0 FacebookTwitterPinterestEmail