15 mozos y moces van realizar práctiques n’empreses d’Italia, Irlanda y Portugal

L’alcalde d’Uviéu, Alfredo Canteli, y el conceyal d’economía, Javier Cuesta, recibieron la selmana pasada nel Salón de Plenos del Conceyu d’Uviéu a los quince nuevos del conceyu que nos próximos díes van partir escontra los sos destinos n’Italia (Florencia y Campobasso), Irlanda (Cork) y Portugal (Lisboa) dientro del Programa Erasmus + “Euroempléate”.

Por un un periodu de 3 meses van tar realizando práctiques n’empreses rellacionaes coles sos titulaciones dientro de les families profesionales de cocina y gastronomía, promoción turística, eletricidá y electrónica o fabricación mecánica.

“EUROEMPLÉATE VI” ta promovido por un CONSORCIU coordináu pol Conceyu d’Uviéu y del que tamién formen parte los Institutos d’Educación Secundaria “Pando”, “Doctor Fleming”, “Leopoldo Alas Clarín” y Colexo Fundación Masaveu. El Conceyu participa unviando a alumnáu de les Escueles Taller remataes el 2020 (“Uviéu empecipio del Camín” y “Recuperación de los meandros del Nora”) y el restu de centros educativos participen con alumnáu que llograra una titulación de Ciclu Formativu de Grau Mediu (antiguu FP1) mientres 2021.

El Conceyu d’Uviéu cofinancia’l proyectu aprosimao nun 50% del total destinando’l so sofitu a la xestión del agospiamientu de los participantes, el seguru de responsabilidá civil y d’asistencia sanitaria. Amás, dende’l Conceyu fai una aportación extra a la bolsa de viaxe y dáse-yos a los participantes un cursu d’idiomes según el destín escoyíu y un cursu de remanador d’alimentos nel casu de los participantes dientro de la familia profesional de cocina y gastronomía.

Destacase qu’a pesar de les dificultaes derivaes de la situación de crisis sanitaria que supunxo un retrasu nel calendariu del programa y nos destinos primeramente previstos cubriéronse les places ufiertaes y que tolos participantes recibieron la pauta completa de vacunes en collaboración col Departamentu de Salú Pública de la Conseyería de Salú del Principáu d’Asturies.