‘Cartafueyos normativos’ llega a la so cuarta entrega con ‘Abreviatures, rotulaciones y propuestes d’espresión y llocución’

Redacción.

Dempues de la edición de ‘La llingua asturiana na Alministración’ a finales del añu pasáu y dientro de la xera normativa de l’ALLA, la Institución asoleya’l númberu cuatro de los sos ‘Cartafueyos normativos’, ‘Abreviatures, rotulaciones y propuestes d’espresión y llocución’ col que l’Academia quier “afitar los usos llingüísticos asturianos n’espacios públicos, alministrativos y cotidianos arreyaos a estayes comunicatives concretes y poco trabayaes hasta agora como son les rotulaciones n’ámbitos públicos, les propuestes d’abreviatures, sigles y símbolos o propuestes”, según espresó la presidenta Ana Cano nel discursu del Día de les Lletres Asturianes.

Nesti númberu apaecen propuestes normatives d’abreviatures, sigles y símbolos d’usu habituales,qu’inclúi un apendiz coles sigles de los conceyos asturianos. Amás, propuestes de rotulación pa la Xunta Xeneral, les Cases de Conceyu, centros escolares de primaria, secundaria y bachiller, facultaes universitaries y estaciones de tren y autobus. Pa rematar el númberu, apaecen unes propuestes d’espresión y llocución, onde dando la entrada en castellán, recueye opciones n’asturianu que l’Academia encamienta pal usu normativu.

L’ALLA prepara yá otros númberos, unu dedicáu a la terminoloxía d’Internet en llingua asturiana que s’igua en collaboración col Colexu d’Inxenieros n’Informática del Principáu d’Asturies.