Una proposición de llei d’IX a la gueta de mayor sofitu pal colectivu asturianu nel esterior

El Plenu de la Xunta Xeneral del Principáu aprobó esta selmana pasada una proposición de Llei sobre l’asturianía nel esterior presentada pol grupu parlamentariu d’IX-BA-LV gracies a los votos a favor del grupu parlamentariu del PP. La decisión de los ‘populares’ foi criticada pol grupu socialista, qu’aseguró non entender cómo apoyaron la proposición dempués de “machacala” nel turnu de fixación de posiciones. El diputáu d’IX-BA-LV, Francisco Javier García Valledor, foi l’encargáu de defender la proposición de llei que tien un “oxetivu claru: saldar la deuda colos emigrantes asturianos nel esterior”. Asina, Valledor indicó que la emigración asturiana ye nesti momentu una realidá complexa que requier solidaridá y exixe esfuercios y recursos pa que dea bonos frutos.

Dende IX-BA-LV xustifiquen la necesidá de la llei pa poder facer que participe la xente del esterior nel puxu social que sufrió la rexón nos últimos años, dando respuesta a la nueva realidá de la inmigración asturiana y superando dalgunes llendes que quedaron espeyaes na actual llei de reconocencia de l’asturianía. Una llei que gúei “quedó desfasada”.

La nueva norma propuesta pola coalición establez la condición d’asturianos nel esterior; define los sos derechos -ente ellos velar porque los asturianos residentes nel esterior pueda facer efectivos los sos derechos reconocíos nel Estatutu d’Autonomía–; impulsar les midíes necesaries pa la torna de los emigrantes y recueye otres “importantes midíes” como l’entamu de midíes p’acceder a una vivienda digna a los que vuelvan, o’l fomentu del accesu al emplegu, ente otres. “Trátase en definitiva de saldar una deuda histórica, Asturies nun se pue entender sin los sos emigrantes y el papel que xugaron, por eso pensamos que ye imprescindible reformar la llei vixente y avanzar na aprobación d’una meyor que reconoza los derechos que los asturianos que viven nel Principáu a los que viven fuera”, dixo Valledor.