Música La Sinfónica del Principáu actúa esta nueche n’Uviéu con Alexei Volodin by asturnet 9 de febreru, 2007 La Orquesta Sinfónica del Principáu d’Asturies estrena, esta tarde a partir de les ocho nel Auditoriu Principe Felipe d’Uvieu, la “Sinfonía número 2. Luz” del compositor madrileñu Jesús Rueda. La obra va tar dirixía pol maestru Maximiano Valdes y va contar cola interpretación al pianu del solista Alexei Volodín. A les siete y media de la tarde el director de la OSPA y el solista van ufrir una charra na sala de conferencies nº4 del Auditoriu. La Orquesta del Principáu va ufrir tamien la obertura “Semiramide” de Gioacchino Rossini y el “Conciertu pa piano y orquesta nº 2 en do menor (op 18)” de Serguei Rachmaninov. Cola obra de Rachmaninov, Alexei Volodin va facer el so debut nel Principáu. Alexei Volodin nació en xunetu de 1977 en San Petersburgo. Estudió en Moscú con I. Chaklina y con T. Zelikman en la Gnessin Music School. En 1994 comienza a preparase nes Clases Magistrales de la profesora Elisso Virsaladze nel Conservatoriu de Moscú. Dearreu en 2001 estudia na Fundación Internacional de Piano Theo Lieven en Como. Ye’l ganador del Primer Premiu na novena edición del Concursu Geza Anda de Zurich 2003, galardón que supuso la proyeición internacional de la so carrera. 9 de febreru, 2007 0 FacebookTwitterPinterestEmail
Música Carlos Rubiera interpreta “Canciones de Xixón” esta nueche nel Teatru Xovellanos by asturnet 9 de febreru, 2007 El cantautor xixones presenta esta nueche a partir de les 8 y media, ante’l público de Xixón, el so último trabayu discográficu tres cuatros años sin pisar los escenarios asturianos. L’artista ufrirá los cancios del so nuevu trabayu, col que vuelve a los oríxenes de la canción popular, y tambien tien previsto incluir nueves composiciones nun conciertu de dos hores de duración. Carlos Rubiera va contar col sofitu d’una sección d’once musicos amás de les voces de Mariluz Cristóbal Caunedo y el cantautor Rafa Lorenzo. El de Caldones ye ún de los históricos miembros del llamáu Nueu Canciu Astur, que entamó a garrar puxu nos primeros años de la transición, a mou d’otros movimientos asemeyaos que se dieron n’otres nacionalidaes del estáu. Tamien formó parte de la organización Conceyu Bable en Xixón, dende la qu’empezó a trabayar pola recuperación llingüística del asturianu. L’actuación entamará a les 20:30 nel Xovellanos y el preciu de les localidaes ye de 10 euros. Esta xera forma parte del “Festival de la palabra”, que va ufrir durante les prosimes selmanes les actuaciones d’artistes como Astrid Hadad y Concha Buika. 9 de febreru, 2007 0 FacebookTwitterPinterestEmail
Música Xuacu Amieva presenta “Seis” nel Nuevu Teatru La Felguera by asturnet 9 de febreru, 2007 El Nuevu Teatru La Felguera en Llangreo acoyerá l’actuación del gaiteru Xuacu Amieva que va interpretar temes de”Seis”, el so nuevu trabayu discográficu. L’actuación en directu fadráse mañana, sábadu 10 de febreru, a partir de les 20,15 hores. Esti trabayu, que ye’l sestu de la carrera de Xuacu Amieva, representa la internacionalización de la música del gaiteru de grupos míticos de la música asturiana como Ubiña. “Seis” ye el so sestu trabayu discográficu nel que recueye composiciones propies y tamien daque son tradicional. El discu completase colos dibuxos y diseñu del gran ilustrador Neto, asína como la collaboración especial nalgunos temes del músicu asturianu Sergio García (percusiones llatinas) y del hindú Tapán Bhattacharya (tabla hindú). 9 de febreru, 2007 0 FacebookTwitterPinterestEmail
Música Conciertu de Madix Trío a les 8 en Xixón by asturnet 7 de febreru, 2007 El Ciclu de Jazz del Centru de Cultura Antiguo Instituto agospia esta mesma tarde a les 8, l’actuación del conxuntu de jazz “Madrix Trío”. El conciertu ta enmarcáu dientro del ciclu de jazz del centru xixones y ye d’entrada llibre y gratuita pa tolos asistentes. Madrix Trio ye un grupu d’experimentaos músicos de la escena jazzistica española formáu pol guitarrista Joaquín Chacón, Pablo Martín al contrabaxu y el baterista Jose Vázquez. 7 de febreru, 2007 0 FacebookTwitterPinterestEmail
Música Arranca la segunda fase de FM07 cola actuación del grupu folk “La gueta la runa” by asturnet 3 de febreru, 2007 La banda xixonesa entamaba’l vienres a les 23:30 la segunda fase del concursu nos llocales de la Fundación de Música Moderna na cai Jose Cueto 16 d’Aviles. Tres pasar el primer filtru de selección de maquetes son 35 les bandes que van participar na edición d’esti año del concursu compitiendo ente si con actuaciones en direutu a cellebrar nos llocales de la Fundación Los encargaos d’entamar esta segunda fase del concurso son la banda de Xixón “La gueta la Runa”, único grupu qu’apostó poles sonoridaes folk na presente edición del certamen.Mañana les actuaciones siguirán col punk-rock de los mierenses “Helltrip”, grupu formáu por miembros d'”Overall ink” y el cantante y guitarrista de “Los Energeticos” L’exitu del concursu abarca tol territoriu nacional y anque la mayor parte de bandes son asturianes tamien van competir grupos de Galicia, Madrid, Lleón, Andalucia o Cataluña. Fundación de Música Moderna ye una asociación avilesina empobinada a la promoción musical n’Asturies y que dende 1995 organiza talleres, ufre clases pa músicos y pa desemplegaos asina como beques de formación. Anguaño la FMM cuenta con un sellu de grabación propiu (FM Records), organiza más de 150 conciertos anuales y tien más de 300 alumnos na so sede d’Aviles. Fundación de Música Moderna 3 de febreru, 2007 0 FacebookTwitterPinterestEmail
Música Stormy Mondays ufierta de baldre tolos sos cantares en mp3 by asturnet 2 de febreru, 2007 El grupu Stormy Mondays ufierta na so páxina web de baldre tolos sos cantares en mp3. El grupu, qu’acaba d’asoleyar la decisión, vien apostando de siempre col so líder Jorge Otero pola copyleft y la distribución gratuita de la música. Sigún se comunica na web del grupu, Stormy Mondays ta acabante d’actualizar la sección mp3 de la web, ufiertando la totalidá de la discografía a tolos interesaos en descargala. El grupu asturianu, ún de los que más y meyor vien faciendo un apueste nidiu pola música de llibre distribución y que vien ufriendo dende hai tiempu los sos cancios nInternet, ta preparando nueves canciones que tamién se van poer escuchar na web. Como ellos mesmos afiten, Stormy Mondays ye un grupu rock xenuino, en castellán, con influencies de Beatles, Rolling Stones, Bob Dylan, Bruce Springsteen, Neil Young… y un soníu averáu al de Counting Crows, REM, Jayhawks o Tom Petty. 2 de febreru, 2007 0 FacebookTwitterPinterestEmail
Música Cultura va entregar el 21 de Febreru’l Premiu al Meyor Cantar en Llingua Asturiana by asturnet 31 de xineru, 2007 El próximu día 21 de Febreru, la Conseyería de Cultura va celebrar una gala musical na que va entregase’l Premiu al Meyor Cantar en Llingua Asturiana, pol que compiten cinco cancios preseleccionaos d’ente tolos que se editaren y comercializaren en 2006. El premiu conoceráse nesa gala, que tresmitirá la TPA y cunbtará cola actuación d’un grupu o artista invitáu y de los cinco candidatos: Tejedor, Carlos Rubiera, La Tarrancha, Toli Morilla y Asgaya. La Conseyería de Cultura preseleccionó cinco cantares que van optar al Primer Premiu al Meyor Cantar en Llingua Asturiana d’ente tolos editaos y comercializaos en 2006 que cumplíen les bases de la convocatoria qu’afiten que’l cantar premiáu tien de ser “obra musical de creación orixinal de cualesquier xéneru, descartándose les pieces tradicionales yá esistentes y les versiones o adaptaciones d’obres de creación publicaes de mano n’otrra llingua”. Les obres y el xuráu Les obres preseleccionaes pela Conseyería de Cultura son “La Maleta al agua”, de Tedejor, con lletra de Ruma Barbero; “Yá nun van a La Camocha”, de Carlos Rubiera, con lletra del cantautor; “Exit-encia” de La Tarrancha, “Azul y Gris” de Toli Morilla, con letra de Marta ori y el propiu Toli Morilla; y “Asgaya”, con lletra de Sergio Álvarez. Los encargaos d’escoyer ente estes cinco composiciones a la ganadora del Premiu al Meyor Cantar en Llingua Asturiana 2006 van ser el Direutor Xeneral de Cultura, Carlos Madera, el Xefe de la Oficina de Política Llingüística, Ramón d’Andrés, el executivu de la TPA, Javier Asenjo, el filólogu Fernando A. Balbuena, el escritor Dolfo Camilo Díaz, el críticu Manolo Abad y Sergio Rodríguez. El xuráu escoyerá’l cantar ganador na mesma nueche de la gala’l próximu día 21 de Febreru y nun lu asoleyará hasta’l final d’esa gala. El galardón consiste nuna escultura o figura orixinal y esclusiva d’un artista plásticu asturianu de reconocíu prestixu y el Gobiernu del Principáu mirará pola promoción y difusión del cantar nos medios de comunicación y nos eventos entamaos o promovíos pol propiu Gobiernu, editándose amás nun soporte esclusivu. 31 de xineru, 2007 0 FacebookTwitterPinterestEmail
Música Corquiéu y Tejedor finen con éxitu la so participación nel Celtic Connections by asturnet 28 de xineru, 2007 El grupu de Ribesella Corquiéu fina esti domingu la so participación nel Celtic Connections de Glasgow cola so última actuación, la cuarta, de les dos que taben previstes. Corquiéu entamó la so participación en Glasgow con una actuación xunta Four Men & a Dog y l’exitu d’esta actuación foi l’aniciu de la estensión del so programa n’Escocia. Al grupu de Ribesella sólo-y queda l’actuación d’esti domingu pela tarde xunta Rory Campbell Band, depués de que amás de les actuaciones de grupu, el flautista Dani Álvarez xubiera a escena’l viernes pa facer un dúo con José Tejedor, que tamién ta participando xunta los sos hermanos nel festival escocés. Tejedor entamó la so participación nel Celtic Connections el 23 de xineru con un conciertu, que foi retransmitíu pola BBC4, nel que se fizo la presentación de “Música na Maleta”. El 24 de xineru volvieron a les tables xunta a Finlay MacDonal y esti vienres 26 de xineru José Manuel Tejedor participó nel homenaxe a Gordon Duncan, nel que lu acompañó Dani, xunta a músicos como Paddy Keenan, Allan McDonald, Ross Ainslie o Jarlath Henderson. Corquiéu y Tejedor en Glasgow 28 de xineru, 2007 0 FacebookTwitterPinterestEmail
Música Les Bandes de Gaites Villa de Xixón y Corvera dAsturies, ganen el troféu a les meyores bandes foriates del Desfile de San Patriciu en Nueva York. by asturnet 25 de xineru, 2007 La Banda de Gaites Villa de Xixón y la Banda de Gaites de Corvera d’Asturies van recibir de manes del Conseyeru de Rellaciones Esteriores Francisco Javier García Valledor, los trofeos que les acrediten como les meyores bandes foriates del Desfile de San Patriciu en Nueva York onde actuaron xuntes. Na última Parada-Desfile parciparen más de 500 bandes de tolos Estaos Xuníos d’America, amás de bandes foriates d’Irlanda, Gales, Escocia, Canadá, Australia, Nueva Zelanda y Asturies. Los trofeos fueron concedíos pol Xuráu del Comite de la Parada de San Patricio de Nueva York y la entrega oficial va tener llugar nel salón d’actos del EASMU (c/Coronel Aranda nº 2, Uvieu) mañana vienres 26 de Xineru a les 19:30 hores. Nel actu van proyectase imáxenes del desfile y les bandas de gaites van tocar los temes qu’interpretaron nel eventu. Nel actu van tar presentes, tamien, el Director d’Emigración, Luís Miguel Fernández Romero y el Director Xeneral de Cultura, Carlos Madera. 25 de xineru, 2007 0 FacebookTwitterPinterestEmail
Música Tejedor y Corquiéu viaxen al Festival Celtic Conncections de Glasgow by asturnet 23 de xineru, 2007 Corquiéu y Tejedor,Dos de los grupos más internacionales del folk asturianu participarán nel Festival Celtic Connections qu’añalmente se cellebra en Glasgow. El Celtic Connections ye consideráu por munchos el mayor festival de la música celta del mundu. La edición de 2007 entamó ‘l pasáu 17 de xineru y va acabar el 4 de febreru, momentu nel que pelos escenarios del festival pasaren más de 180 actuaciones. Corquiéu entamará los conciertos el día 25 de xineru xunta a la banda Four Men & a Dog, el conciertu será grabáu pola BBC. El domingu 28 van compartir escenariu con Roy Campbell. Corquiéu formóse en 1997 cola xuntura de cinco músicos ribeseyanos. La so presentación discográfica fízose nel discu “Nuevu Folk asturianu, volume 5” editáu nel añu 2000 pola Discográfica L’Aguañaz; esti discu yera compartíu con otros grupos de recién creación de la escena folk asturiana. Al añu siguiente publicaríen, tamién con L’Aguañaz el so primer discu en solitariu tituláu La Barquera. Depués d’esti trabayu participaríen en dellos discos colectivos hasta llegar a 2005, cuando volveríen a los estudios pa grabar Salia, esta vegada con Tierra Discos. Corquiéu ye anguaño una de les bandes del folk asturianu con más presencia, y calidá, nos directos. Depués de pasar per Glasgow los de Corquiéu empobinarán camín de Bélxica pa depués salir a facer les amériques. Corquiéu acaba de ser convidada a participar nuna minixira pelos Estaos Xuníos que los podría tener alredor de 15 díes tocando pel país americanu, dalgo que na música asturiana sólo fizo Llan de Cubel. Pela so parte los hermanos Tejedor, que vienen de llenar el Teatru Campoamor d’Uviéu y de lliderar les llistes de ventes de discos asturianes, van entamar la so participación nel Celtic Connections mañana 23 de xineru con un conciertu, que va tar retransmitíu pola BBC4, nel que fadrán la presentación de “Música na Maleta”. El 24 de xineru volverán a les tables xunta a Finlay MacDonal. El domingu 26 de xineru José Manuel Tejedor participará nel homenaxe a Gordon Duncan xunta a músicos como Paddy Keenan, Allan McDonald, Ross Ainslie o Jarlath Henderson. Los Hermanos Tejedor entamaron el so llabor nos estudios col trabayu Texedores de Suaños, 1999. En 2003 sacaríen Llunáticos pa yá en 2006 asoleyar Música na Maleta. José Manuel y Javier Tejedor ganaron el troféu MacLlan, el más prestixosu del mundu, en delles ocasiones. Eva Tejedor ye parte del colectivu Muyeres xunta al que grabaría dos discos. Ente les collaboraciones del grupu tán les feches xunta a Davy Spillane, Carlos Nuñez, Kepa Junkera, Phil Cunninham o la fadista portuguesa Dulce Pontes. Emisión en llinia del Festival Celtic Connections 23 de xineru, 2007 0 FacebookTwitterPinterestEmail