Sociedá Selmana Cultural de los Moscones en Xixón by asturnet 8 de xineru, 2007 Entama la II Selmana Cultural Moscones en Xixón. L’Atenéu de La Calzada acoyerá estos alcuentros qu’añalmente se faen en Xixón. El primer d’estos alcuentros fadráse la tarde de güei 8 de xineru tarde, a partir de les 20,00, con una mesa redonda na que participarán delos deportistes moscones. Nesti alcuentru participarán los deportistes Santi Pérez, Oscar Vázquez y José Arconada, tamién tará’l Director Xeneral de Deportes, Daniel Gutiérrez Granda. Les actividaes continuarán el martes cola conferencia de la historiadora Beatriz Canitrot. El miércoles col escritor Fernando Flórez y el xueves el grupu Traslluz representará Contigo pan y Cebolla 8 de xineru, 2007 0 FacebookTwitterPinterestEmail
Sociedá Concursu de la Revista Formientu by asturnet 8 de xineru, 2007 L’asociación H.aXareos y Asturnews entamen un sortéu que va repartir 10 exemplares de la publicación Formientu sobre la lliteratura más moza en llingua asturiana. El primer númeru d’esta publicación recoyó testos de 27 creadores nacíos énte 1977 y 1988. Anque la poesía seya la técnica dominante, los más mozos y moces autores asturianos desenvuelven la so lliteratura tamién na ensayística o nel rellatu curtiu. Concursu 8 de xineru, 2007 0 FacebookTwitterPinterestEmail
Educación La Universidá Popular de Xixón abrió’l plazu de matricula by asturnet 5 de xineru, 2007 La Universidá Popular de Xixón abreió’l plazu de matriculación pa los sos cursos qu’entamen a partir del 14 de febreru. La programación d’estos cursos acueye formación en sectores que van dende la informática a la cocina pasando pola astronomía o la marroquinería. Ensin escaecer los referíos a la cultura del país como los ya avezaos de llingua asturiana, gaita, tambor o un cursu sobre la monarquí asturiana. Los plazos de matriculación nos diferentes cursos entamen el día 16 de xineru y acaben el día 26 de xineru. La matricula puede facese nel Atenéu de La Calzada, nel Centru Integráu de L’Arena, nel Centru Integráu d’El Coto, nel Centru Integráu de Pumarín “Xixón Sur” y nel Edificiu de l’Antigua Pescadería Municipal. Asina mesmo tamién esiste la posibilidá de facer esti trámite nos caxeros automáticos habilitaos y per internet. 5 de xineru, 2007 0 FacebookTwitterPinterestEmail
Sociedá El conceyu de Corvera entamó la retulación de la so toponimia by asturnet 5 de xineru, 2007 Dende’l 4 de xineru Corvera ta instalando la so señalización n’asturianu. Esta midida afectará a los más de 150 núcleos habitaos del conceyu. Sicasí la primer fase, que yá ta en funcionamientu, d’esta campaña de rotulación sólo va afectar a 29 de los llugares del conceyu. Los topónimos que s’actualizarán a la denominación tradicional van ser: El Castiellu, Los Espinos, La Sierra, El Molín, La Peruyal, El Moncó, La Estebanina na parroquia de Molleda; na parroquia de Cancienes los topónimos afectaos pola actualización serán La Peluca, La Cabaña, La Pedrera, La Rebollada, Moriana, Bango, Taúxu, El Campu la Vega y Cancienes de Riba; na parroquia de Les Vegues l’adecuación toponímica entamará por Molleda de Riba; y na parroquia de Solís Taraño, Casal, Santa Mariña y El Pontón tendrán la so toponimia oficial visible. La campaña con un presupuestu d’alredor de 4000 tien una subvención de la Conseyería de Cultura de 3500, aportando’l restu’l conceyu de Corvera. 5 de xineru, 2007 0 FacebookTwitterPinterestEmail
Sociedá Más de mil doscientes persones participen nel actu d’alcordanza a Juan Muíz Zapico by asturnet 5 de xineru, 2007 Los actos d’alcordanza de la memoria de Juan Muñiz Zapico, l’históricu sindicalista y políticu asturianu, axuntaron a más de mil doscientes persones nel actu fechu nel cementeriu de La Frecha, conceyu de L.lena. Ente los participantes nesti actu tuvieron Vicente Álvarez Areces, presidente d’Asturies; Antonio Pino, secretariu xeneral de Comisiones Obreres d’Asturies; o dellos dirixentes del PCA encabezaos pola secretaria xeneral Noemí Martín. L’actu concluyó cola interpretación del cantar “Al home de la unidá”, escrita por Manuel Asur n’alcordanza de Juan Muñiz Zapico. Homenaxe a Juan Muñiz Zapico “L’home la unidá” 5 de xineru, 2007 0 FacebookTwitterPinterestEmail
Sociedá Campaña pola creación del dominiu .ast by asturnet 5 de xineru, 2007 Los internautes asturianos reclamen el dominiu .ast como seña d’identidá de la comunidá asturianofalante na rede. Con esti fin un grupu d’internautes acaben de crear l’Ensame pol puntu AST una comunidá dende la que concienciar sobre lo afayadizo d’identificar les páxines escrites n’asturianu embaxo esti dominiu. Siguiendo l’exemplu de la creación del dominiu .cat a finales de 2005 esti grupu d’internautes tien por aciu amuesar la presencia de la llingua y la cultura asturiana na rede mediante la creación d’esti dominiu. L’Ensame pol puntu AST tien entamada una campaña na rede na que mediante una imaxe se reclama la creación d’esti dominiu. Ensame por un puntu ast 5 de xineru, 2007 0 FacebookTwitterPinterestEmail
Sociedá Homenaxe a Juan Muñiz Zapico “L’home la unidá” by asturnet 4 de xineru, 2007 Esti xueves 4 de xineru conmemórase’l trenta cabudañu del accidente de circulación que provocó la muerte del históricu sindicalista asturianu Juan Muñiz Zapico. La Fundación Juan Muñiz Zapico entama con esti homenaxe un añu d’actividaes n’alcordanza de la memoria del únicu asturianu encausáu nel procesu 1001, del que saliera con una pena de 18 impuesta pol Tribunal d’Orde Públicu. Nacíu en La Frecha, L.lena, nel añu 1941 entamó’l so llabor sindical al ser escoyíu como enllace sindical nes elecciones sindicales de 1963. En 1964 Juan Muíz Zapico entamaría la so militancia nes Comisiones Obreres y nel Partíu Comunista. Muñiz Zapico ye ún de los 460 Xuraos d’Empresa que participaron na toma de la Casa Sindical de Mueres nel añu 1966. Acusáu, xunta otros camaraes, d’asociación ilícita y propaganda illegal por firmar el manifiestu y participar nes xornaes de llucha del 1 de febreru y del 27 d’ochobre de 1967. Esta condena llevaríalu a tar dos años nes cárceles d’Uviéu, Jaén y Segovia. En 1970 ye nomáu miembru del Comité Rexonal del PCE. Dende esi momentu tresllada la so residencia a Xixón, ciudá na qu’intensifica la so actividá sindical, causa esta de numerosos despidos y de la persecución policial. En 1972 ye deteníu nel Conventu de los Padres Oblatos de Pozuelo de Alarcón (Madrid), entamándose’l Procesu 1001 y siendo condenáu a 18 años pol Tribunal d’Orde Públicu’l 20 d’avientu de 1973; tres la muerte de Franco recibe un indultu’l 30 de payares de 1975. La so vuelta a Asturies produciría una gran represión policial nes cais de Xixón y Mieres el día 4 d’avientu de 1975. Dende’l so regresu a Asturies, Juan Muíz Zapico, participa nel desendolcu orgánicu y formal de les Comisiones Obreres, de les que fuera parte sel Secretariáu Xeneral na Asamblea de Barcelona, na qu’espuso una Ponencia sobre’l Reforzamientu Orgánicu de Comisiones. En xunetu de 1976 ye elixíu pa participar nel Comité Central del PCE, que se fadría en Roma. Juan Muñiz Zapico xugaría un perimportante llabor na Xunta Democrática y depués na Coordinación Democrática d’Asturies. La cabera detención prodúxose a la salidá de la Universidá d’Uviéu; na so vida d’activismu políticu sufrió 7 aós de carcel, 5 despidos, 4 multes gubernatives y 2 condenes del TOP y fizo 4 fuelgues de fame. El so prestixu y les sos capacidaes d’analís ficieron que Juanín fuere un de los protagonistes indiscutibles de la Transición, que nun vio. El dos de xineru de 1977 sufría un accidente de tráficu nel que fallecería. El so entierru, el 4 de xineru de 1977, convertiríase nuna de les mayores publiques de la Transición n’Asturies con más de 20.000 participantes. 4 de xineru, 2007 0 FacebookTwitterPinterestEmail
Sociedá Danza prima en Xixón by asturnet 4 de xineru, 2007 L’Asociación de Vecinos Xovellanos de Xixón va facer el próximu domingu una danza prima na plaza San Miguel. Esta asociación vien baillando la danza prima tolos primeros domingos de cada mes. L’obxetivu d’esta actividá ye recuperar la tradición de baillar la Danza Prima. 4 de xineru, 2007 0 FacebookTwitterPinterestEmail
Sociedá Prueba de conocencia de la Llingua Asturiana by asturnet 4 de xineru, 2007 L’Academia de la Llingua Asturiana convocó, como vien faciendo semestralmente, la preba de conocencia de la llingua asturiana. La prueba fadráse’l día 27 de xineru, y la inscripción tará abierta dende’l día 15 hasta’l 25 de xineru. Esta prueba tien por aciu reconocer la conocencia básica del idioma de les persones que seyan declaraes aptes nel nivel básicu según calces seguíos pola Institución. Academia de la Llingua Asturiana 4 de xineru, 2007 0 FacebookTwitterPinterestEmail
Educación Muyeres y discursos audiovisuales by asturnet 3 de xineru, 2007 El Coleutivu Milenta Muyeres entama pal sábadu 13 de xineru un taller sobre “Metáfores de la fuxida: muyeres y discursos audiovisuales”. Esti taller tará coordináu por Isabel Menéndez y faese col envís d’analizar el papel de los roles asumíos polos homes y muyeres al través de los medios de comunicación. El taller abordará la evolución de los roles asumíos polos homes y muyeres nel ámbitu de los medios de comunicación. En pallabres d’Isabel Menéndez “n’actualidá detéctense dalgunes tendencies qu’intentes quebrantar la brecha xéneru”. Como exemplu Isabel Menéndez menciona’l cine “que n’ocasiones otorga a les muyeres protagonismu, permitiéndo-yos qu’escueyan opciones vitales autónomes o non sometíes al mandáu de xéneru”. Coleutivu Milenta Muyeres 3 de xineru, 2007 0 FacebookTwitterPinterestEmail