Sociedá La Xunta pola Defensa de la Llingua y los llagareros d’Asturies entamen otra campaña de normalización by asturnet 27 de marzu, 2008 “La sidra como tien que ser”. Esti ye l’eslogán col que la Xunta pola Defensa de la Llingua y los llagareros d’Asturies van promover l’usu de l’asturianu nes sidreríes y restoranes de la rexón, no que ye una nueva inciativa cola normalización de la llingua asturiana como oxetivu caberu. El cartelu de la campaña va presentase esti vienres 28 de marzu nel Hotel Villa de Gijón (C/ San Juan de Valles, nº 3. Xixón) nun actu que va entamar a les seis la tarde. Na presentación de la campaña van tar presentes el presidente de l’Asociación de Llagareros d’Asturies, Jose María Osoro; el representante de l’Asociación del Barriu de la Sidra, Jose Luis Acosta y el voceru de la Xunta pola Defensa de la Llingua Asturiana, Xuan Gonzalo. Esta campaña, qu’axunta sidra y cultura como ye tradicional na rexón, vien a amestase a les munches que vien desendolcando la Xunta, en favor del usu del asturianu. 27 de marzu, 2008 0 FacebookTwitterPinterestEmail
Sociedá L’ALLA va presentar la edición on-line del Diccionariu de la Llingua Asturiana by asturnet 26 de marzu, 2008 L’Academia de la Llingua Asturiana, nun actu que va presidir la presidente Ana Cano, va presentar esti miercoles la versión on-line del Diccionariu de la Llingua Asturiana (DALLA). Esta iniciativa va suponer una meyora sustancial nel usu d’esta ferramienta, tanto pa los escolinos d’asturianu como pa resolve-yos posibles duldes a los profesionales y particulares que se valen del asturianu nel so trabayu. Durante la presentación que va tener llugar a les 12:00 hores nel Hotel Principado d’Uvieu, los responsables academicos van mostrar con exemplos práuticos les posibilidaes qu’ufre esta nueva edición del diccionariu. Ana Cano, según informó l’ALLA en nota de prensa, tamien va anunciar la incorporación a la so web, pa la llibre consulta de los usuarios, de les Normes Ortográfiques y la Gramática de la Llingua Asturiana, amás de presentar les nueves iniciatives que la institución tien previsto desendolcar nel futuru nel terren de la normativización de la llingua asturiana. Academia de la Llingua Asturiana 26 de marzu, 2008 0 FacebookTwitterPinterestEmail
Sociedá L’Academia anuncia un Cartafueyu Normativu de terminoloxía informática na presentación del DALLA online by asturnet 26 de marzu, 2008 L’Academia de la Llingua Asturiana fizo anuncia de l’apaición bien pronto del númberu 5 de la colección de Cartafueyos normativos dedicáu a la temrinoloxía informática nel trescurrir del actu de presentación del Diccionariu de la Llingua Asturiana en llinia, dientru la ´páxina web de la institución acadcémica. L’actu presentación tuvo presidíu pola presidenta Ana Cano, que xunta Roberto gonzález Quevedo y un responsable de la empresa Araz.net presentaron la versión on-line del Diccionariu de la Llingua Asturiana (DALLA), con una demostración en llinia de la ferramienta que va suponer una meyora sustancial nel usu del DALLA, tanto pa los escolinos d’asturianu como pa resolve-yos posibles duldes a los profesionales y particulares que se valen del asturianu nel so trabayu. Ana Cano tamien presnetó la incorporación a la web, pa la llibre consulta de los usuarios, de les Normes Ortográfiques y la Gramática de la Llingua Asturiana, amás de presentar les nueves iniciatives que la institución tien previsto desendolcar nel futuru nel terren de la normativización de la llingua asturiana. 26 de marzu, 2008 0 FacebookTwitterPinterestEmail
Educación Xuristes pol Asturianu diz que’l curriculu de bachilleratu incumple dafechu la Carta Europea de les Llingües Rexonales y la Llei d’usu by asturnet 25 de marzu, 2008 L’Aconceyamientu de Xuristes pol Asturianu considera que’l proyeutu de currículu de bachilleratu qu’aprobó la Conseyería d’Educación del Principáu, incumple dafechu los mandaos de la Carta Europea de les Llingües Rexonales y la Llei d’usu y promoción del bable/asturianu. Nun escritu al Conseyeru d’Educación y Ciencia, Jose Luis Iglesias Riopedre, los xuristes asturianos denuncien l’incumplimientu que ta faciendose de la norma europea al nega-y a los escolinos asturianos, por mor de considerar l’asturianu como optativa, el derechu a disfrutar d’una enseñanza secundaria garantizada na so propia llingüa, dalgo qu’España comprometió al ratificar dicha Carta Europea. D’otra miente y no que cinca a la posibilidá qu’abre’l proyeutu pa escoyer la materia Llingua Asturiana y Lliteratura como optativa, los xuristes considerenla como una trampa. “De ná-yos va valir escoyela si a criteriu de la Conseyería los que lo faigan son un “númberu insuficiente d’alumnos y/o alumnes pa constituyir un grupu”, Esta situación, según afirma Xurde Blanco en representación de los xuristes, ta dafechu a la escontra del propiu sintíu de la llei d’usu que tien que garantizar la enseñanza del asturianun tolos niveles y graos. 25 de marzu, 2008 0 FacebookTwitterPinterestEmail
Sociedá L’ALLA diz que l’actuación na Ría del Eo ye una imposición llingüística y responde a polítiques interesaes by asturnet 25 de marzu, 2008 Tres la polemica actuación toponímica na Ría del Eo, camudando’l nome pol de Ría de Ribadeo, l’Academia de la Llingüa quiso denunciar lo que consideren una política interesada, que favorez inxustificadamente a una de les dos partes y que nun respeta la tradición llingüística y el sentir de los ciudadanos. “Les razones históriques y llingüístiques esgrimíes dende Asturies paecen nun pesar un res cuando dende Madrid traten d’imponer una política que s’alluga, oxetivamente, al marxe de les bones razones y de la convivencia”. Nestos terminos, nun comunicáu, espresó’l so descontentu la institución academica. L’ALLA tamien punxo en tala de xuiciu la representatividá y el bon funcionamientu d’una “Comisión Geográfica Nacional”ne que nun participa nengún representante asturianu. La institución que preside Ana Cano calificó los fechos como un bon exemplu d’imposición llingüística, “ensin el mínimu respetu a la vecindá, a la tradición oral y a los fechos impuestos por una realidá xeográfica compartida”. Al mesmu tiempu, piden al Gobiernu del Principáu que se pronuncie a la escontra d’esta decisión y recuerda qu’estos fechos enxamás diben ocurrir si l’asturianu tuviera reconocía la oficialidá. 25 de marzu, 2008 0 FacebookTwitterPinterestEmail
Educación LAcademia de la Llingua Asturiana prepara la prueba de conocencia dasturianu pa mayu by asturnet 18 de marzu, 2008 L’Academia de la Llingua Asturiana va zarrar va abrir nos próximos meses el plazu papuntase a la segunda oportunidá desti añu p’algamar el diploma de conocimientu básicu del asturianu. Lesame va facese en mayu na capital dAsturies. La prueba va tener dos partes, una escrita (dictáu, torna, exercicios gramaticales, redaición) y otra falada (conversación) na que se van valorar los conocimientos gramaticales, d’espresión escrita y oral asina como la conocencia del allugamientu de la llingua dientro de la sociedá asturiana y del procesu de normalización en que ta inxerta. Na web de l’ALLA hai más información sobre la prueba y sobre la bibliografía necesaria pa preparar esti esamen, ente ella la Gramática de la Llingua Asturiana y les Normes ortográfiques espublizaes pola institución. Bases de la prueba 18 de marzu, 2008 0 FacebookTwitterPinterestEmail
Sociedá Llangréu va acoyer una nueva campaña de normalización na hostelería by asturnet 18 de marzu, 2008 L’Ayuntamientu de Lalnagreu repite campaña de normalización llingüística na ostelería en vistes del exitu col que se recibió la inciciativa l’añu pasáu. Amás de 10.000 trípticos informativos van editase sobre d’azucre, serviyetes y demás material pa repartir nos establecimientos de la comarca. Nel actu de presentación participaren l’slcaldesa en funciones de Llangreu, María Fernández, la conceyala de Cultura, Turismu y Política Llingüística, Ana Oliva Rodríguez; presidente de los ‘hosteleros de Llangreu, Javier Fernández, ya’l responsable del Serviciu de Normalización Llingüística.Eloy Antuña. 18 de marzu, 2008 0 FacebookTwitterPinterestEmail
Sociedá El CAO diz que nun incluyir la oficialidá ye firmar la pena de muerte pal asturianu by asturnet 17 de marzu, 2008 “Firmar la pena de muerte pa la llingua asturiana”. Eso ye lo que van facer, segun el Conceyu Abiertu pola Oficialidá los partíos políticos que nun firmen la oficialidá de la llingua asturiana nel Estatutu. Asina quisieron dexalo claro los responsables de la plataforma nun comunicáu nel que piden “un marcu legal que garantice la supervivencia del asturianu y el reconocimientu d’un derechu ciudadanu que posibilite que cualesquier persona pueda emplear la llingua que quiera ensin torgues”. El CAO tamien quiso facer un llamáu al consensu ente fuercies polítiques p’algamar el meyor consensu p’Asturies. El CAO ye consciente de que la oficialidá ye un de los mayores obstáculos a la hora d’axuntar postures alredor del estatutu pero recordó que nun firmala ye poner a Asturies en situación clara de discriminación llingüística, política y educativa col restu de comunidaes con llingua propia dientro del estáu español. Según la platafor,a, en claru mensaxe al PSOE, nun firmar esta oficialidá diba discriminar doblemente a los falantes: de los que falen asturianu respecto a los que falen castellanu n’Asturies y de los asturianos respecto al restu de comunidaes con llingua propia. 17 de marzu, 2008 0 FacebookTwitterPinterestEmail
Educación Paz Andrés propón un presupuestu participativu y garantíes económiques pa los asturianos qu’algamen beques Erasmus by asturnet 14 de marzu, 2008 La cabera candidata en facer anuncia de la so intención de ser Rectora de la Universidá foi esti vienres la primera en presentar un programa mui completu onde destaca un exerciciu de lo que nomó como “democracia directa” y nel que destaca la propuesta de facer que’l presupuestu de la Universidá sea “participativu” y lu decida (menos no que cinca a les nómines) la propia comunidá universitaria. Paz Andrés ufrió tamién garantíes de que dengún estudiante quedaría ensin disfrutar una beca Erasmus por problemes económicos y garantizó una ayuda complementaria pa eso. La única candidata asturiana al Rectoráu de la Universidá d’Uviéu presentó esti vienres pela mañana nel ediuficu históricu de la Universidá un programa que lleva por títulu “Ganar el futuru de nueso” (Ganar nuestro futuro) y que presenta un bo n númberu de novedaes bien interesantes, recoyendo’l compromisu que ya adelantare pa cola llingua asturiana. Ente les munches propuestes qu’ufrió la candidata asturiana al Rectoráu destacaron les que cinquen a la so idega de “non neutralidá”, porque la so dandidatura quier ser la d’una Universidá comprometida: “Bientar social y seguridá nel trabayu”, “Lo nuestro: la llingua y la cultura asturianes”, l’atención a la diversidá: por una Universidad accesible, integradora e inclusiva”, la igualdá de xéneru y l’enfotu nuna Universidá sostenible. La candidata presentó propuestes tan innovadores como un presupuestu participativu, nel que menos les nómines del personal lo demás lo puean escoyer los miembros de la comunidá universitaria, un apueste pola vocación internacional de la Universidá d’Uviéu n’Europa y América, la lealtá institucional col Principáu, l’apueste por nueves titulaciones como Periodismu, Arquitectura, Veterinaria o Farmacia, y la revitalización del claustru y otros muérganos participativos de la Unviersidá. Esmolición pola carrera docente del profesoráu con una asistencia que facilite la so acreditación, la lliberación de la burocracia pal personal investigador o la consolidación d’una xornada llaboral flesible foron delles otres propuestes de fondura que se xuntaron a innovaciones como la Oficina de Xestión Integral de la Investigación y una tarxeta financiera del investigador pa gastos menores (desplazamientos, compres por Internet) pa que los qu’investiguen nun tengan d’adelantar perres pa gastos de proyectos. Presentación de la candidatura nel Rexistru Xeneral de la Universidá 14 de marzu, 2008 0 FacebookTwitterPinterestEmail
Sociedá Chus Pedro y Nacho Fonseca van dar dellos conciertos didáuticos n’asturianu pa los escolinos de la rexón by asturnet 14 de marzu, 2008 Chus Pedro y Xentiquina van ufrir dellos conciertos empobinaos a fomentar l’usu de la llingua asturiana ente losescolinos de la rexón. La banda que dirixe Nacho Fonseca llevará la so música a 22 centros escolares d’educación primaria. demientres que’l cantante de Nuberu xunto col músicu Gabino Antuña va facer un total de 15 conciertos didaúticos nos que va facese un repás poles distintes modalidaes de la canción tradicional asturiana, de la vaqueirada a les habaneres o la tonada. Amás, les Conseyeríes de Cultura y Turismu y d’Educación y Ciencia van desendolcar un ciclu de cuentacuentos pa escolinos de Primaria en 21 sesiones al cargu de la escritora asturiana Montserrat Garnacho. Na presentación de les actividaes, esti vienres, tuvieron presentes, amás de Chus Pedro, Nacho Fonseca y Montserrat Garnacho, la directora xeneral de Promoción Cultural y Política Llingüística, Consuelo Vega Díaz, ya’l director xeneral de Polítiques Educatives y Ordenación Academica, Luis Enrique García Riestra. 14 de marzu, 2008 0 FacebookTwitterPinterestEmail