Comunicación Fernando Alonso algama’l Príncipe d’Asturies de los Deportes by asturnet 5 de setiembre, 2005 El pilotu Fernando Alonso algamó’l Premiu Príncipe d’Asturies de los Deportes correspondiente a 2005 y concedíu esta mañana n’Uviéu. Alonso recibe’l premiu nuna de les sos meyores temporaes y na que puede facese col mundial de Fórmula 1. Como nes sos competiciones el nome del pilotu uvieín tuvo d’abrise pasu ente otres ventitrés candidatures presentaes al másimu galardón de los deportes que concede la Fundación Príncipe d’Asturies y procedentes de doce países. El xuráu que decidió premiar a Fernando Alonso taba presidíu por Juan Antonio Samaranch ya integráu por Pedro Barthe, José Ángel de la Casa, José María Casanovas, Juan Antonio Corbalán, José María Echevarría y Arteche, María Escario, José María Forte, Julián García Candau, Daniel Gutiérrez Granda, Miguel Induráin, Luis Infante, María del Carmen Izquierdo, Jaime Lissavetzky, Javier Muñoz Gallego, Matías Prats, Nemesio Rodríguez López, Juan Antonio Samaranch Salisachs, José Javier Santos, Iñaki Urdangarín, duque de Palma, José Luis Vilaseca i Guasch, Emma Villacieros ya Ignacio Martínez, como secretariu. 5 de setiembre, 2005 0 FacebookTwitterPinterestEmail
Comunicación La Federación de Muyeres Progresistes d’Asturies premia a la cantante Bebe by asturnet 5 de setiembre, 2005 La Federeación de Muyeres Progresistes d’Asturies decidió conceder el premiu “Muyer y Medios de Comunicación” a la cantante Bebe pola denuncia de la violencia de xéneru nes sos lletres y el tratamientu que recibe nos sos temes la figura de la muyer. Bebe tien previsto recoyer el premiu esti viernes 9 en Xixón. L’asociación feminista quier premiar con esta distinción a una artista na que les sos canciones denuncien abiertamente la violencia de xéneru y failo amás, a xuiciu del xuráu que concedió el premiu al través de “una contribución importante pa camudar l’imaxinariu social qu’asitia a les muyeeres en posición de víctimes, ufiertantdo un modelu de comportamientu onde la voz ye la de la muyer que respuende activamente, como suxetu, al maltratador”. El fallu del premiu considera amás que l’estilu musical de Bebe “llega al públicu más mozu, ofreciendo un patrón de conducta que se allonxa d’ otru tipu de discursu d’otros autores cantantes o grupos”. El xuráu del premiu “Muyer y Medios de Comunicación” taba compuestu por representantes de los medios de comunicación (prensa, radio y televisión) axencies de publicidá y el Seminariu d’Estudios de la Muyer de la Universidá d’Uviéu. 5 de setiembre, 2005 0 FacebookTwitterPinterestEmail
Comunicación Dieciocho candidatures opten al Premiu Príncipe d’Asturies del Deporte by asturnet 3 de setiembre, 2005 Un total de dieciocho candidatures opten al Premiu Príncipe d’Asturies del Deporte que va fallase esti martes 7 n’Uviéu. Al empar la Fundación que dirixe Graciano García recibió hasta la fecha alrodiu de 175.000 cartes de sofitu a les distintes candidatures qu’aspiren al galardón de la Concordia, y d’elles casi 50.000 son en favor de les Hermanes de la Caridá de San Vicente Paúl . 3 de setiembre, 2005 0 FacebookTwitterPinterestEmail
Comunicación Militantes de la Xunta manifiéstense pola oficialidá na visita a Asturies de Zapatero by asturnet 1 de setiembre, 2005 Un grupu de militantes de la Xunta pola Defensa de la Llingua encabezaos pola célebre Pita manifestóse ayer énte’l presidente del gobiernu español José Luis Rodríguez Zapatero pa reclamar la oficialidá pal asturianu. La protesta materializóse mientres el xefe del executivu de Madrid visitaba n’Uviéu les obres del nuevu hospital. Los militantes de la organizaciónen defensa de los derechos llingüísticos espresaron les sos reivindicaciones al pasu de la comitiva presidencial coincidiendo nel sitiu con otros colectivos que facíen oyer les sos protestes énte Rodríguez Zapatero. La importante presencia policial y la rapidez cola que pasó la comitiva pol sitiu de les protestes impidió que los manifestantes pudieren acercase al presidente español y al xefe del executivu autonómicu, Vicente Álvarez Areces, que lu acompañaba na so primer visita institucional a Asturies. 1 de setiembre, 2005 0 FacebookTwitterPinterestEmail
Comunicación Areces asitia a finales del primer trimestre de 2006 l’empiezu de les emisiones de l’Autonómica by asturnet 31 d'agostu, 2005 El presidente del Principáu Vicente Álvarez Areces asitió a finales del primer trimestre de 2006 l’empiezu “con normalidá” de les emisiones de la televisión autonómica. Areces fexo estes declaraciones nel cursu d’una entrevista emitida por Ser-Xixón na que tamién s’amosó enfotáu en llograr un alcuerdu presupuestariu con IX-BA El presidente autonómicu afirmó respective a la puesta en marcha del Ente Públicu de Comunicación que “tan dándose pasos de manera rigurosa y ordenada” y que les emisiones van entamar en cuantes se complete’l procesu de selección del personal y los remates técnicos, ya que “non namás se trata de persones, sinón que se trata de tecnoloxíes y de tener un sistema de repetidores, de señales y de platós debidamente adaptaos”, declaró. Tocante al empiezu de les tresmisiones p’Areces “siendo realistes lo lóxico sería que al finar el primer trimestre del añu que vien teamos emitiendo con normalidá”. Na entrevista radiofónica el cabezaleru del executivu asturianu valoró positivamente los dos años de gobiernu compartíu con IX-BA y amosóse enfotáu en llograr l’alcuerdu colos sos socios p’aprebar los prósimos presupuestos autonómicos: “globalmente el balance ye positivu y toi convencíu de que va a haber alcuerdu presupuestariu y vamos a velo nel Parlamentu, vamos a facelo ya”, manifestó’l presidente. 31 d'agostu, 2005 0 FacebookTwitterPinterestEmail
Comunicación Andecha pidi-y al gobiernu asturianu qu’impida la difusión de la señal de la Televisión Gallega by asturnet 23 d'agostu, 2005 Andecha Astur pidió al gobiernu del Principáu que denuncie énte les instancies afayadizea la restresmisión de la señal de la Televisión Gallega (TVG) en territoriu asturianu. Pa la organización nacionalista estes emisiones incumplen la llei del tercer canal na que s’obliga a les televisiones autonómiques a emitir namás dientro les llendes de la so comunidá. A.A. califica estes emisiones de “auténtica invasión cultural”. Los nacionalistes consideren que ye illegal espardir la señal del ente públicu gallegu dientro’l territoriu d’Asturies y per voz del so dirixente David Rivas cuida que la instalación d’un repetidor de la TVG na llende administrativa cola nuestra comunidá nun ye necesario pa que la televisión vecina cubra coles sos emisiones tol territoriu de Galicia y ve nello “una clara intención del gobiernu gallegu d’interferir culturalmente n’Asturies, concretamente nos conceyos más occidentales”. Andecha invoca un informe xurídicu ellaboráu pa esta organización por espertos en Derechu de Comunicación pa pidi-y al gobiernu del Principáu que denuncie la intromisión nel nuestru territoriu de la señal de TVG. Según la llei del tercer canal 46/83 les televisiones autonómiques namás pueden emitir dientro les llendes de la so comunidá. Nesi sen l’ente públicu gallegu, a xuiciu d’A.A. taría cometiendo una posible illegalidá. 23 d'agostu, 2005 0 FacebookTwitterPinterestEmail
Comunicación La cultura asturiana actual protagoniza un especial de La Voz de Galicia by asturnet 21 d'agostu, 2005 La eidicón dixital de La Voz de Galicia dedica nel so canal d’Ociu un especial a la cultura asturiana actual. El suplementu inclúi entrevistes a Xuan Bello y José Ángel Hevia, con reportaxes sobre la lliteratura na nuestra llingua, el nuevu cine y el panorama musical n’Asturies. El rotativu gallegu ufierta embaxo’l títulu “La factoría cultural del vecino” un ampliu especial sobre les espresiones más vives del mundu creativu asturianu. L’especial escomienza remembrando que nel añu 1989 un grupu que cantaba n’asturianu como Los Berrones superaba en ventes de discos nel so país a la mesmésima Madonna. Nel especial afírmase que “de los escombros de la reconversión industrial, surdió n’Asturies un dinámicu movimientu artísticu que sabe conectar con tou tipu de públicos”. L’escritor Xuan Bello declara na entrevista de “La Voz de Galicia” que nos enzancos llantaos nel camín de la supervivencia y la normalización de la llingua asturiana “el problema son los otros nacionalismos” y remembra que “en determinaos sectores nacionalistes gallegos nun-yos gusta nada el casu asturianu, decolócalos”. Bello tamién opina del papelu xugáu polos políticos de partíos estatales n’Asturies de los que diz: “ya podíen ser xacobinos, polo menos seríen dalgo”, ya que pal poeta de Paniceiros: “s los asturianos fáltanos más país sobre’l que pisar, non porque nun lo tengamos, que lo tenemos, sinón porque la nuestra clase política tuvo más ocupada na xestión de la crisis económica”. El gaiteru Hevia ye otru de los entrevistaos nel especial de La Voz de Galicia. El músicu villaviciosín compara la situación de la remanecencia de la música tradicional n’Asturies y en Galicia que pa él son procesos “asemeyaos”, cola diferencia de que “n’Asturies surde too de la iniciativa privada, mientres en Galicia son les instituciones les que sofiten esti movimientu cultural”. Reportaxes sobre la escena independiente xixonesa, l’arqueoloxía industrial y la capitalidà cultural d’Uvièu nel aniversariu de la creación de los Premios Príncipe d’Asturies complemeten xunto a los mencionaos artículos sobre cine, música y lliteratura n’asturianu l’especial que la ediciòn dixital del rotativu gallegu dedica al nuestru país. La factoría cultural del vecino 21 d'agostu, 2005 0 FacebookTwitterPinterestEmail
Comunicación Descártase dafechu la emisión de la televisión autonómica prevista pal 8 de setiembre by asturnet 11 d'agostu, 2005 El deséu espresáu de manera reiterada pol presidente del Principáu Vicente Álvarez Areces pa que la primera emisión de la futura televisión autonómica s’entamare el prósimu 8 de setiembre nun va poder materializase. Asina lo aseguraron fontes del Ente Públicu que señalen la primavera de 2006 como fecha posible pal empiezu de les tresmisiones. La complexidá del procesu d’antenización pa consiguir una recepción bona de la señal de la cadena de radiotelevisión ye la causa pola que les primeres emisiones nun se van poder captar hasta diento unos meses. El director de la canal autonómica, José Antonio Pérez Ornia, apuntara na so última comparecencia na Xunta Xeneral a finales d’esti añu o empiezos del prósimu pa la puesta en funcionamientu de la televisión y eses paecen les feches reales. La precipitación a la hora d’entamar les tresmisiones fuera una de les crítiques qu’Izquierda Xunida-Bloque teslladara a los sos socios del gobiernu presidíu por Álvarez Areces xunta’l métodu escoyíu pa convocar les places destinaes a cubrir la plantiella del Ente de Comunicación. Les dificultaes técniques de la puesta en marcha de la radiotelevisión asturiana vienen agora a asitiar nel tiempu l’empiezu de les emisiones. 11 d'agostu, 2005 0 FacebookTwitterPinterestEmail
Comunicación El PP súmase a les crítiques pola puesta en marcha del Ente de Comunicación by asturnet 7 d'agostu, 2005 La diputada del Partíu Popular Alicia Castro sumóse ayer a les crítiques pola manera de poner en marcha l’Ente Públicu de Comunicación del Principáu y el calter de la convocatoria de selección de personal. Castro afirmó que na futura televisión “namás van entrar persones col carnet del PSOE na boca”. La parlamentaria popular criticó la convocatoria publicada nel BOPA con malpenes un mes de vagar pa que los aspirantes preparen el temariu: “Areces paez que tien prieses por tener una televisión al so serviciu”,dixo Alicia Castro que calificó’l modelu escoyíu pol gobiernu del Principáu como “xuguete particular al serviciu d’Areces y un mediu nel que nun va haber llibertá d’espresión”.. La posible falta de tresparencia nel procesu de selección del personal foi otra de les crítiques llanzaes pola diputada del PP: “les 84 places convocaes ya tienen dueñu”, declaró Castro pa quien “nun hai dulda de qu’Areces va meter xente prósimo al so partíu”. La diputada popular tamién criticó l’enfrentamientu por esti motivu ente PSOE ya IX-BA y descalificó a entrambos socios de gobiernu por “tar nuna permanente griesca” y dixo que “nunca tuvo’l Principáu un gobiernu más débil”. 7 d'agostu, 2005 0 FacebookTwitterPinterestEmail
Comunicación El Gobiernu da-y la medalla d’oro d’Asturies a Graciano García by asturnet 3 d'agostu, 2005 El Conseyu de Gobiernu del executivu autonómicu decidió por unanimidá conceder la Medalla d’Oro del Principáu al director de la FPA Graciano García. Con esta distinción quier reconocese’l llabor del creador de los premios Príncipe d’Asturies y el so compromisu colos valores democráticos. El Principáu concede-y la so másima distinción a Graciano García nel añu de la celebración del XXV aniversariu de la Fundación que creó en 1980. La Medalla d’Oro va ser entregada al periodista y entamador de la FPA dientro los actos institucionales del prósimu ocho de setiembre. Graciano García nació en Moréa (Ayer) en 1939, diplomáu en Periodismo escomenzó a colaborar nel diariu La Nueva España en 1968; un añu después fundó la revista Asturias Semanal y en 1978 el periódicu Asturias Diario Regional. 3 d'agostu, 2005 0 FacebookTwitterPinterestEmail