Xixón celebró otra vuelta’l Día l’Emigrante

Xixón celebró por segundu añu consecutivu’l Día l’Emigrante, pensando tanto nos emigrantes asturianos retornaos como nos inmigrantes que residen nel Principáu. Los actos tán organizaos conxuntamente pola Axencia Asturiana d’Emigración, el Conseyu de Comunidaes Asturianes y l’Ayuntamientu de Xixón. La primer xornada tuvo dedicada a los emigrantes retornaos.

El Centru Municipal de l’Arena foi l’escenariu onde se celebró edsti xueves un actu d’homenaxe al emigrante retornáu con presencia del conseyeru de Xusticia y Esteriores, Francisco Javier García Valledor.

Esti viernes tuvo llugar la celebración del Día l’Emigrante nel recintu del Muséu Pueblu d’Asturies y al igual que l’añu pasáu, la xornada foi dedicada a les costumes asturianes y al fomentu del conocimientu y la puesta en contactu de los diferentes emigrantes asturianos.

A primera hora de la mañana, organizóse una visita guiada pol Pueblu d’Asturies y un percorríu pola Feria Internacional de Muestres que ta cellebrándose estos díes. A continuación, ufiertóse una xinta, tres de la que disputáronse diferentes deportes autóctonos, que terminaron con una espicha amenizada por canciones y bailles poulares.

L’Asociación d’Emigrantes Españoles Retornaos n’Asturies y l’Asociación pa la Integración y l’Asesoramientu d’Emigrantes Retornaos del Principáu, organizaron esti xueves 11 una xornada orientada al debate, que se fizo nel centru municipal de L’Arena, y na que varios emigrantes retornaos van esponer les sos vivencies con respecto a la integración na tierra d’orixe, depués de munchos años d’ausencia. Nes diferentes meses reondes van tocase temes como «Retornu, cómo afecta a la persona nel tema psicolóxicu», «Vida llaboral, cómo empezar de nueu» y «Estatuto del ciudadanu español nel mundu».