Valledor pieslla l’Alcuentru de la Mocedá Asturiano de Suramérica

El Conseyeru de Relaciones Esteriores Francisco Javier García Valledor clausuró’l II Alcuentru de la Mocedá Asturiana del Conu Sur. Nesti Alcuentru la mocedá asturiana tuvo representada pol presidente del Conseyu de la Mocedá d’Asturies, Paulino Feito; Feito nel trescursu del mesmu robló un alcuerdu pol que la entida representativa de la mocedá del país dará sofitu técnicu y material a la mocedá asturiana de suramérica.

Los alcuentros cellebraos en Viña del Mar, Chile, dende’l 18 de xineru hasta’l 22, constituyeron la I Asamblea de l’Asturianía Moza Americana. Nel alcuentru participaron 112 mozos y moces en representación de los diferentes Centros Asturianos del Conu Sur americanu.
El Conseyeru de Xusticia felicitó a la mocedá asturiana americana pol so compromisu de participación y n’especial con Asturies al tiempu que-yos recordó que la so xera ye “histórica”. Valledor citó que la iniciativa de constituyir una asociación de mozos astur-americanos ye inédita nel conxuntu del estáu. El Conseyeru refirióse, tamién, a los Centros Asturianos a los que calificó como d'”auténtiques embaxaes d’Asturies” y a les que nomó como entidaes “imprescindibles pal desendolcu económicu y social d’Asturies”.