Una exposición recuerda los 30 años de movimientu vecinal n’Avilés

Dende’l 24 d’ochobre al 3 de payares 20 paneles van amuesar la vida del movimientu asociativu d’Avilés nel Centru Municipal d’Arte y Exposiciones (CMAE). Nos paneles mezclense la información de les asociaciones, la so historia, fotos antigües y d’anguaño de los barrios. Paralelamente a la exposición el CMAE va acoyer dos meses redondes los díes 25 y 26 d’ochobre a les 19.30 hores.
La primera aconceyarase el 25 d’ochobre embaxo’l títulu “Los entamos del movimientu ciudadanu n’Avilés” y na que van participar los presidentes fundacionales de les primeres asociaciones de vecinos, representantes del Colectivu Ecoloxísta d’Avilés, del Grupu de Non-Violencia y del Colectivu de Muyeres.
La segunda de les meses redondes, día 26 d’ochobre, abellugará embaxo’l títulu “Les asociaciones de Vecinos anguaño: perspectives dende les Federaciones” a responsables de les Federaciones d’Asociaciones de Vecinos de Xixón, Villaviciosa y Avilés.
L’amuesa contará con cuatro paneles introductorios sobre la situación de la ciudá dende 1975 y la creación de les primeres asociaciones de vecinos, les primeres elecciones municipales, la constitución de la primera corporación democrática y la apaición de los movimientos ciudadanos na ciudá.