Cine

Esti martes 16 a les cinco la tarde, el Salón d’Actos del Vieyu Institutu de Xixón va acoyer l’entamu del octavu Festival de Cine Asturianu cola presentación del llibru de Miguel Losada “Vivir el cine, 120 películas que no podrás olvidar” cola participación del autor y la intervención de la cantante Elena Martín. A les seis va producise la presentación de los directores y proyección de los trabayos nominaos al Premiu al Meyor Curtiumetraxe del 8u Festival de Cine Asturianu.

El miércoles a les 8 el Festival treslládase a Uviéu pa celebrar la gala d’entrega de premios nel Teatru Filarmónica. Na mesma, que va celebrase a partir de les ocho la tarde, va facese un homenaxe al actor Frank Braña coles intervenciones de Pepa Martínez, el Grupín de Teatru SomosAsturies, Elena Martín, Miguel Losada, DiCarlo, Isabel Friera, Adrián Zamanillo, Ángela Fernández del Rey, Moisés Tuñón, Saúl Quiñones, Manuel Curiel y Xavi Vilareyo.

23 hores: Fiesta del Cine en Sala La Comedie, calle La Luna 9.

Esti mozu ribeseyanu diose a conocer cuando en 2012 y con otros compañeros del so institutu preparó “L’Equipu A-stur”, un trabayu audiovisual pa clas qu’acabó por convertise nun fenómenu na rede. Dempués la so obra púnxose seria con “Tempus” un curtiu que llegó a proyectar nel Festival Internacional de Cine de Xixón, xunto a otros proyectos. Agora platégase rematar el que sedrá’l primer llargometraxe n’asturianu. Una película que como él mesmu cuenta a Asturnews surdió de delles entrevistes que fizo sobre la figura de Bernabé, un fugáu bien conocíu nel oriente d’Asturies.

La idea surdió a raiz del documental “Xente”, que grabó va dos años. Nesi procesu, esplica, “atopo munches vegaes la figura de Bernabé y grabo dellos testimonios del personaxe cola idea de dalgún día facer daqué con ello”. Dempués del ésitu de “Tempus”, Casanueva volvió a Bernabé “pa facer un guión colos testimonios que tenía recoyíos”. Sobre la hestoria esplica que “dalgunes cosuques tán supuestes pero la mayoría del guión tien base en testimonios de xente de la zona”, anque reconoz que “ye cuasi imposible asegurar la veracidá d’estes hestories”.

Ente les dificultaes atopaes a la hora de “refacer” la vida de Bernabé tán, según esplica’l director de la película, que “la figura de Bernabé sirvió como disfraz pa muncha xente qu’atracaba o mataba en nome d’él” y que “la xente cuenta la hestoria según-y paez, unos cuenten una cosa d’una manera y otros d’otra”. El guión trata de reflexar una serie de testimonios como exemplu, reconoz, “nun ye que Bernabé ficiera esactamente lo que se va ver na película, pero ye cuasi imposible asegurar lo que fizo en realidá”.

Pa Pablo Casanueva esti proyectu audiovisual “ye un mou de mostrar les coses que pasaron nesti país nun va munchos años”. Amás, recuerda que’l tema “ta mui vivu tovía, muncha xente conoció a Bernabé ya interésense pol proyeutu, yo creo que puede tener salida, polo menos nel oriente d’Asturies, onde actuó Bernabé”, reflexona.

Pal director l’usu del asturianu como llingua de la película taba claro “dende’l primer momentu sabía que si diba facer daqué, diba ser n’asturianu, ye la llingua na que me contaron les hestories y ye la llingua na que falo”, esplica. La película faise con presupuestu cuasi cero “los medios son los mínimos, l’equipu de producción ye bien cenciellu, yo al tema de imaxe y mios pas al tema d’ambientación”, esplica.

La película, que ñació como curtiu y acabó convertida en llargometraxe nun tien sovención de nengún tipu nin ayuda económica nenguna. Casanueva esplica cómo se va faciendo “funcionamos a base de collaboraciones, una muyer déxate la cocina de so casa pa grabar, un paisanu déxate una zamarra, otru una camisa… ye too asina”. En cuantes al equipu d’interpretes Casanueva esplica que “los actores son toos amigos y conocíos, que de manera totalmente altruista tán collaborando cola película, al igual que tola demás xente”. El protagonista, y actor más implicáu nel proyectu dende un entamu, ye Fernando Martínez, qu’interpreta a Bernabé.

Yá queda poco pa poder ver esti proyectu audiovisual completáu “no que ye’l rodaxe propiamente dichu tamos na parte final, fáltennos dos o trés secuencies más o menos”, esplica Casanueva. “Calculamos que pa Mayu tará finalizada anque la distribución nun la tenemos clara tovía, si que mos prestarían facer presentaciones pa que la xente pudiera vela, pero tamién mandala a concursos y festivales”. Pablo Casanueva, Pablín pa los munchos amigos que collaboren nel so proyectu tienlo claro “de momentu vamos acabar el llabor y acabalu bien”. Pronto Bernabé, esti fugáu perconocíu nel oriente d’Asturies, volverá a la vida nes pantalles d’Asturies gracies a esi llabor de Pablo Casanueva, una de les nueves y más prometedores promeses del audiovisual asturianu.

Trailer

Hora: abril 16, 2013 de 5pm a 6pm Ubicación: Salón de Actos del Antiguo Instituto – Xixón Organizado por: Xavi Vilareyo

El 16 d’abril a les 5 la tarde, va facese una presentación dientro del marcu del Festival de Cine Asturianu. El llibru, de Miguel Losada, lleva por títulu “Vivir el cine: 120 películas que no podrás olvidar”. Nel actu va cuntase cola presencia del autor y l’actuación de la cantante Elena Martín, amás de la presencia del director del Festival, Xavi Vilareyo.

Miguel Losada ye escritor y críticu cinematográficu. Ye director de la Estaya de Cine del Atenéu de Madrid y espublizó numberosos llibros sobre cine. Miguel Losada escribió ente otros llibros sobre les biografíes de Carmen Sevilla o Pepa Flores, ente otros como El Hollywood español o Cine y poesía. Esti llibru que presenta’l Festival de Cine Asturianu ye frutu d’una encuesta fecha a personalidaes del mundu del cine sobre les películes más influyentes na so vida.

El Festival de Cine Asturianu va dedicar la octava edición al actor allandés recientemente fallecíu Frank Braña. Francisco Braña Pérez ñació en 1934 en La Puela d’Allande, fíu d’un guardia civil, los constantes destinos del padre lleváronlu per residencies en Negueira, Fonsagrada, Ozcos, Doiras, Navia, L.luarca y Xixón. En Navia contactó col cine pues de neñu diba al Cine Fantasio, que sigue conservándose milagrosamente, y pa entrar gratis trabayaba d’ayudante. Con trece años trabaya na construcción en Xixón, nel túnel de Noreña y en La Camocha. Cesa en 1954 pa ingresar na Guardia Civil pero por silicosis ñégase-y la entrada. Deprendió a conducir, inglés y boxéu. Entamó faciendo pequeños papeles d’estra como especialista nel cine pola fortaleza física.

En Madrid consigue un papel na película de Gonzalo Delgrás Café de Chinitas (1960) gracies a l’amistá con Margarita Delgrás que lu recomienda pa los Estudios Bronston onde supera una prueba pa “Rey de reyes” como doblador d’escenes peligroses. Nun sabía montar en caballu pero yá s’apañaría. Ganaba 550 pesetes diaries, munchísimo, y nin siquiera salía nos créitos. Adopta’l nome de Frank Braña. Sabiendo inglés, un gayasperu físicu y unos impresionantes güeyos claros abriéron-y les puertes a producciones estranxeres rodaes nel estáu español, de vaqueros o hestóriques. Xunto a trabayos suyos onde sólo aparecía como especialista como “El Coloso de Rodas”, onde conoció a Sergio Leone, les primeres películes suyes acreditaes como actor fueron “Los corsarios del Caribe” (1961), “Horizontes de Luz (1962)” o “Juego de hombres” y participó na triloxía de Sergio Leone: Por un puñado de dólares,La muerte tenía un precio y El bueno, el feo y el malo, ente otres munches películes.

A partir de 1970 el so nome aparecerá ya siempre destacáu. Nos años 1970 participó en 59 películes con Guiliano Carnimeo, Mario Bianchi o Leon Klimovsky y en westerns de José Antonio de la Loma, Rafael Romero Marchent o Juan Bosch qu’almiraron a Hollywood.

Frank Braña rodó unes 167 películes en cinco continentes. Non toes fueron actuaciones destacaes. Munches veces el so papel consistía en cayer del caballu o morrer al principiu la película. Por ello ye l’actor que más vegaes morrió nes películes, unes 164 veces y unes quinientes actuaciones como especialista. En Golpe de mano (1970) representaba un dinamiteru asturianu que-y dio fama internacional. Otru ésitu foi Perros callejeros. Trabayó con Clint Eastwood, William Holden, John Carradine, Lex Barker… Rechazó un papel con Pedro Almodóvar. Siempre quixo rodar un guión suyu sobre la postguerra nos montes de la so querida Asturies. Morrió en Collado Villalba en 2012 aquexáu de la so eterna mala salú de fierru. El 8u Festival de Cine Asturianu dedicará-y un sentíu homenaxe póstumu el próximu 17 d’abril nel Teatru Filarmónica, na Gala d’Entrega de Premios, que nun pudo celebrase en vida del actor por mor del so repentín fallecimientu.

Col títulu xenéricu Escoyeta de curtios n’asturianu, el miércoles 27 de febreru dende les 18 hores pa en delantre, van proyectase nel Centru Sociocultural de Les Vegues una retafila de curtiometraxes que tienen la llingua asturiana como idioma vehicular. L’actividá organízala la Oficina de Normalización Llingüística del Conceyu de Corvera.

Con esta iniciativa, espliquen dende la organización “búscase mostrar la riqueza del curtiometraxe n’asturianu, versátil y diversu no que fai a estilos, rexistros y temátiques”.

Asina les coses, títulos como Lo que necesites selo yo, Nun val la pena conquistar la tierra, La neña de los mios güeyos o 7337, van llevanos pelos caminos audiovisuales de la ciencia-ficción, el terror, les aventures o’l surrealismu.

Con esta actividá síguese la llinia abierta nel otoñu del 2012 coles Xornaes del Audiovisual n’Asturianu, al envís de dar a conocer ente la ciudadanía corverana les producciones de los artistes asturianos.

L’actividá ye gratuita y d’asistencia llibre.

Los Conseyos de Mocedá d’Asturies y Uviéu, organicen el ciclu de curtiometraxes ‘REcortos’, el vienres 22 de febreru a les 20 hores nel Teatru Filarmónica d’Uviéu. La escoyeta de los curtios ta a cargu de José Luis Cienfuegos, Director del Festival de Cine Européu de Sevilla.

Nel actu podrá falase colos directores Alex Montoya y Marina Seresesky y tres la proyección celebraráse una fiesta en ‘La Caja Negra’ cola participación de Maribel&Sebastian DJ’s, con accesu llibre y de baldre.

Esti vienres, 8 de febreru, nel Salón d’Actos del Conseyu de Mocedá de Xixón va proyectase’l curtiometraxe de Beatriz Merés “El abominable que se sentó frente a las nieves que no dejaban de hablar”. L’actu, que va cuntar cola presencia de l’autora, va facese en dos pases, unu a les siete y otru a les ocho la tarde.

“Piquinu” ye un curtiu documental que tien de protagonista a un mozu del Conceyu L.lena, “al que lu acompáñen los sos perros per unu de los meyores paisaxes que tien esti país”, esplica la so directora Sonia Fernández, que conoció a esti rapaz, Aarón, nel colexu onde da clases de dibuxu, en La Pola L.lena, “ellí quedamos ablucaos, el mio collaciu d’Asturianu y yo, al lleer un rellatu que presentó Aarón pa un concursu lliterariu col tema de la montaña como exa principal”, esplica Fernández.

Aquel rellatu yera “El xabalí del Picu la Penasca” que según espliquen dexó-yos dos coses bien clares “l’amor d’Aarón pola montaña y la necesidá d’espresalo cenciella y contundentemente na so llingua materna”.

El resultáu ye esti curtiu cenciellu, nel que la voz n’off d’esti rapaz “piquinu” acompaña a les imáxenes de la so vida diaría nel pueblu de los sos güelos.

Ver el curtiu

Gonzali Producciones presentó en 2010 esti documental, el primeru rodáu en gallego-asturianu. Dirixíu por Illán Gonzali y conducíu por Alberto Álvarez Peña, esti mediumetraxe recuérdanos que n’Asturies había homes y muyeres que teníen el don de ver a los muertos y falar con ellos.”La so figura nun ta escaecida na parte más occidental d’Asturies”, comenten dende la productora. Y asina paez a la vista de los bonos resultaos que ta teniendo, con más de 3.500 persones que yá la vieron na canal de Vimeo.

En Bual ñació Amparo López, más conocida como A bruxa de Brañavara. Amparo entraba en trance pa comunicase colos difuntos y mediar ente éstos y los vivos. La so fama foi bien gande, hasta’l puntu de que la revista Triunfo dedicó-y l’artículu “Una bruxa auténtica en Brañavara”, nel so númberu del 3 de xunu de 1978.

D’ella, y de los sos fechos, trata esti documentu.

Ver documental

Gonzali Producciones tien yá programao pal segundu trimestre de 2013 el primer doblaxe al asturianu d’un filme checu, Inventu Diábolicu (Vynález zkázy), del añu 1958, obra del xeniu de l’animación mundial Karel Zeman (Oströmer, 1910 – Praga, 1989), onde cobra vida’l mundu creativu de Xuliu Verne. La película baraxa conceptos ya idegues apaecíos en delles noveles del autor francés, masque sigui la llinia argumental d’“Ante la bandera”, novela espublizada en 1896 ya ilustrada por Léon Benett, un dibuxante amigu de Verne que bien de veces facía los sos dibuxos baxo la supervisión del escritor.

Karel Zeman taba, cuando se punxo a treslladar al cine l’universu vernianu, influenciáu pola fuerte tradición marionetista de Checoslovaquia y pol so apegu a la obra de George Méliès. Asina, per aciu del trucaxe, la sobreimpresión y el collage, y con un sentíu dafechamente lúdicu y artesanal, dió-yos movimientu a los grabaos creando una suxestiva dómina del vapor enllena de prodixos mecánicos imposibles, somarinos y estremaos globos aerostáticos. Poro, esta cinta ye visualmente portentosa.

El director usó la técnica del esgrafiáu en tolos elementos d’esti trabayu cinematográficu (decoraos, traxes, ambientación…) consiguiendo un acabáu en pantalla perasemeyáu al d’una plancha d’aceru grabao. El filme combina a actores reales con marionetes y animación, y tamién decoraos planos con perspectiva distorsionao. Los personaxes allugólos nel planu como marionetes pa nun romper l’armonía del conxuntu. Esa síntesis, entamada en blanco y negro, da una mestura homoxéneo ente tolos elementos que tien un resultáu impactante.

La hestoria xira alredor de Thomas Roch, inventor francés que fai un esplosivu devastador. A Roch secuéstralu’l conde Artigas, y tres d’un llargu viaxe en barcu y submarín, llévenlu a una base secreta que s’afaya nuna islla volcánica metanes l’océanu. Ellí, con engañu, llogra convencer al profesor pa que trabaye col envís de facer un arma que-y permita gobernar el mundu. Pero Simon Hart, el so asistente, tamién reteníu na islla, fará tolo posible pa torgar los planes del conde. Cola ayuda de Jana, una moza náufraga, manda un mensaxe d’alvertencia dientro d’una botella aventada al mar, pero’l conde yá terminara la creación d’un enorme cañón potenciáu pol inventu de Roch.

Inventu Diábolicu ta narrada en pasáu, per aciu de les páxines del diariu de Simon Hart,y ye una metáfora sobre l’empléu de la enerxía atómica y sobre cómo l’home utiliza la ciencia pa oxetivos destructivos. La trama alviértenos de los peligros de la tecnoloxía y, la invención que da nome al filme, ta considerada como un anticipu a la bomba atómica.

FICHA TÉCNICA

Títuli orixinal: Vynález zkázy

Idioma: Checu

Xéneru: Aventura. Fantasía. Animación

País: Checoslovaquia

Duración: 83 minutos

Añu: 1958

Director: Karel Zeman

Repartu: Lubor Tokos, Arnost Navrátil, Miroslav Holub, Frantisek Slégr,Václav Kyzlink,Jana Zatloukalová, Frantisek

Cerný, Otto Simánek, Václav Trégl

Productora: Ceskoslovenský Státní Film