Cine

Acabante casi d’estrenar la so película musical “Divina lluz”(2004) sobro’l discu del mesmu títulu de Mus, Ramón Lluis Bande presentó nel ciclu Llendes del Festival de Cine de Xixón el so últimu trabayu: ‘De la fuente’, un mediometraxe documental sobre l’alcordanza de la revolucionaria asturiana Aida de la Fuente.

Rodada en namás dos planos-secuencia, la película de Bande tenta somorguiase na busca del mitu Aida al través del testimoniu oral de la única hermana superviviente de la heroína comunista y a onde lu empobina el so camín ye a los oríxenes, cuando’l mitu yera realidá, aquella “neña que xugaba a la comba” y “saltaba les barricaes” del cantar popular, la que Pilar de la Fuente conoció cercana. La segunda parte del documental contrasta o complementa el relatu de Pilar cola interpretación respigante del cantar popular na voz de Mari Luz Cristóbal Caunedo.

El testimoniu de la hermana d’Aida ye amosáu por Bande dende un planu fixu con enfoque viráu al estremu de la imaxe col fin de llantar la distancia necesaria pa que lo emocional nun interfiera ente la protagonista y l’espectador. Nél Pilar de la Fuente fala de la revolucionaria pero sobretoo de la so familia, una familia pequeño burguesa d’Uviéu consagrada a la militancia nel Partíu Comunista y que tres la muerte d’Aida, na guerra civil sufrió les terribles consecuencies de la represión por ser los familiares de de la Fuente hasta quedar prácticamente aniquilada: namás sobrevivió Pilar. Ye la hestoria tamién d’unes xeneraciones enfotaes nel sueñu de la revolución social y derrotaes después pol facismu, décades enantes de que los volviere derrotar la realidá.

El relatu de Pilar de la Fuente, espresáu con una sobriedá averada a la xelidez, ayuda al propósitu de Bande de centrar el documental únicamente na hestoria y los protagonistes d’ella, ensin interferencies superflues que desvirtúen la realidá filmada, la mesma hestoria. El realizador xixonés nuna posición radical énte los usos comunes del documental clásicu cree nel poder de les palabres, el testimoniu y la memoria de los protagonistes directos d’una hestoria tienen pa Bande la lexitimidá verdadera, son ellos los que vuelven a vivir lo relatao nel momentu que lo recuerden.

Una vuelta de tuerca más dica la obstinada busca de Ramón Lluis Bande en procuru de la verdá fría y desnuda, de la realidá.

El Festival de Cine de Xixón ufiertó na so sesión de nueche del domingu y nel ciclu ‘Llendes’ una de les sorpreses más interesantes de tolo qu’hasta agora se pudo ver nél. ‘Medrana'(2004), el primer llargometraxe de Juan Luis Ruiz, amosó que ya nun ye ocurrencia d’inxenuos pensar na posibilidá de la esistencia d’un cine asturianu y n’asturianu. Tamién que se puede tratar un tema como’l de les enfermedaes terminales ensin deformalo col filtru de la demagoxa o el tremendismu. Hestories d’enfermos d’esclerosis múltiple nun mundu que tamién agoniza de la mesma enfermedá: el mundu campesín asturianu.

‘Medrana’, escrita en collaboración con Llucía Herrera -como’l so anterior y celebráu trabayu, ‘Lluvina’-, fala de la llucha na que s’enfrenten la vida y la muerte coles sos poderoses enerxíes, una llucha de la que se conoz el resultáu final y la imposibilidá d’evitalu. Inda asina hailos que nun se resignen a entregase a la derrota y siguen lluchando con tola so fuerza porque saben que cada minutu de combate ye siguir nel llau de la vida.

John Berger, l’autor de ‘Tierra puerca’, denunciaba a principios de los años setenta la muerte de la Europa campesina, una aceleración programada polos economistes de Bruseles de l’agonía que sufre dende hai décades, más d’un sieglu, el mundu campesín. A un espectador ayenu a la traxedia la llucha de los llabradores asturianos por siguir baldándose nuna tierra que nun tien otru destín prósimu que’l de convertise en prau o en tierra ermo, puede abultá-y tan inútil como’l d’un de los protagonistes de ‘Medrana’, Juan Ignacio, un casu emocionante del coraxe y la brenga cola qu’un enfermu terminal puede aferrase a la vida. ‘La raza de los supervivientes’ llamó John Berger a los campesinos y a esa raza pertenez Juan Ignacio y otros protagonistes de la película de Juan Luis Ruiz, xente avezada a nun concede-y nenguna tregua a la folganza o al desaliendu porque d’ello depende la so sobrevivencia.

Crónica d’una muerte anunciada na que tamién cuerre poderosu’l ríu de la vida, simbolizáu equí pola constante presencia del agua en fontes, regatos, el mar, el molín nel que nació Juan Ignacio y que ye símbolu arriendes del molín que s’alimenta de la so propia capacidá de producir enerxía.

El primer llargometraxe del tándem Juan Luis Ruiz y Llucía Herrera ye un testimoniu llúcidu y incómodu de l’agonía d’un mundu, d’unos homes, de nós mesmos qu’agora asistimos como conmovíos espectadores a una llucha con derrota que tamién ye la nuestra. Tamién nós sentimos medrana.

Los actores que participen en llargumetraxes de gran difusión nun tienen por qué ser profesionales. El director arxentín Pablo Trapero, que presenta nel Festival Internacional de Cine de Xixón la so cinta ‘Familia rodante’, avaló güei esi estremu y reivindicó la so película como una producción mui cara y de montaxe complicáu.

Como amuesa d’ello, recordó el realizador sudamericanu, el propiu rodaxe: Catorce selmanes con unes temperatures medies dacuando de 40 graos centígrados y la baxa prematura d’una anciana que, al superar el ‘casting’ como reserva de la propia güela’l director, qu’actúa na película, acabó nel hospital. “Naide nun s’enfotaba nel proyectu”, recordó Pablo Trapero, y esa falta d’apoyu financieru postergó el rodaxe durante años.

De fechu, Trapero realizó antes otres películes -ente elles ‘El Bonaerense’- antes de filmar ‘Familia rodante’, que se proyecta esta nueche dientro de la sección oficial del Festival de Xixón y que narra el viaxe catárticu d’una familia al completo nuna caravana p’hacia la provincia de Misiones, nel estremu norte d’Arxentina.

Pol so llau, Paulo Branco, productor de la políticamente incorrecta ‘Ma mère’ -hestoria d’incestu que antes d’aniciáu el rodaxe yá contaba con detractores-, recordó esta mañana que’l cine nun pue quedar en películes concebíes sólo “pa que la xente salga contenta del cine”, y defendió el cálter “duru, radical y violentu” de la cinta que concursa en Xixón.

Tamién consciente de la polémica que’l llargumetraxe diba suscitar darréu s’estrenare, el coprotagonista de ‘Ma mère’, Louis Garrel, señaló la fonda dualidá con que foi acoyida la película en Francia -grandes detractores, grandes apasionaos- y ensalzó el llabor de la so compañera de repartu, la yá veterana Isabelle Huppert.

Unes 250 proyecciones, ocho sales, catorce películes a concursu na sección oficial. El 42 Festival Internacional de Cine de Xixón abre güei les puertes cola amuesa del llargumetraxe ‘Clean’, d’Oliver Assayas, nuna gala d’apertura conducida polos actores Daniel Guzmán y Lola Dueñas que se cellebrará nel teatru Xovellanos y qu’inagura una selmana de cine.

Na sección oficial compiten cintes manufacturaes en llugares tan dispares como Estonia (‘Revolution of Pigs’), Arxentina (‘Familia Rodante’), Rusia (‘4’) y Estaos Xuníos, qu’unvía al certame xixonés los llargometraxes ‘Tarnation’, ‘The Woodsman’, ‘Baadasss!’ y ‘Mysterious Skin’. L’ámbitu de la Europa occidental, con Francia a la cabeza, contribúi coles siete películes restantes qu’opten a algamar un premiu nel festival, los llargos ‘Wild Side’, ‘A Tout de suite’, ‘Ma mère’, ‘La historia del camello que llora’, ‘Vento di terra’, ‘Lila Dice’ y ‘Sugar Orange’.

Na so estensa programación, que s’espardirá por sales del centru de la ciudá con una incursión nel centru municipal de Pumarín, el certame dirixíu por José Luis Cienfuegos amosará nes pantalles ciclos monográficos de los directores Lukas Moodysson, Tsai Ming-Liang, Peter Watkins y Simon Pummell, y dará-yos continuidá a les habituales secciones ‘Enfants terribles’ y ‘Esbilla’.

El Festival de Cine de Xixón centrará amás el so focu nel cine independiente norteamericanu, ocuparáse de los tabúes nun apartáu específicu y cellebrará el prósimu miércoles el Día d’Asturies, cola proyección de curtios de, ente otros autores, Iraida Lombardía, Patricia García Quesada, Bruno Mateos, Alberto Pardo y Pedro Antonio Curto.

La producción cinematográfica asturiana sedrá amás visible na sección ‘Llendes’, na que s’exhibirán los documentales ‘Medrana’, de Juan Luis Ruiz, y ‘De la fuente’, un repasu de la muerte de la revolucionaria asturiana homónima na visión del realizador Ramón Lluis Bande.

Web oficial del Festival Internacional de Cine de Xixón

Les actrices Lola Dueñas (‘Días de fútbol’, ‘Mar adentro’) y Beatriz Rico (‘Historia de un beso’, ‘Un paso adelante’) presentarán les gales d’apertura y pieslle, respectivamente, del 42 Festival Internacional de Cine de Xixón, qu’empezará el prósimu 25 de payares y tendrá como miembros del xuráu al actor Tristán Ulloa, la distribuidora Jane Balfour, la programadora Diana Sánchez y los directores Lisandro Alonso y Monte Hellman.

Esti últimu llega a Xixón depués d’una llarga trayectoria profesional qu’inclúi un montaxe en versión ‘western’ de la obra teatral ‘Esperando a Godot’ y la producción de la película ‘Reservoir Dogs’, dirixida por Quentin Tarantino, mientres qu’Alonso (Buenos Aires, 1975) destacóse na dirección de los sos dos primeros llargumetraxes, ‘La libertad’ y ‘Los muertos’.

Amás de Tristán Ulloa, rostru reconocible nes pantalles en cintes como ‘Lucía y el sexo’, ‘Mensaka’ o ‘Los sin nombre’, el xuráu del festival xixonés completaráse con dos espertes técniques: Diana Sánchez, programadora del Festival de Cine de Toronto, y Jane Balfour, directora durante más de diecisiete años d’una distribuidora internacional especializada en documentales, curtios y llargumetraxes d’arte y ensayu.

Col asoleyamientu esta mañana d’eses dos llistes de nomes -xuráu y presentadores-, el festival dirixíu por José Luis Cienfuegos apuró esta mañana l’encendíu de los motores del certame, qu’arranca el prósimu 25 de payares y espardirá pola ciudá unes 250 proyecciones hasta’l 3 d’avientu.

Web oficial del Festival de Cine de Xixón

Un Uviéu “triste, gris y feríu”. Eso ye lo que se pue contemplar, en pallabres del director xeneral de Promoción Cultural, Carlos Madera, nes dos películes documentales que la Filmoteca d’Asturies ta acabante restaurar y qu’esta mañana se proyectaron por primer vegada, en pase especial pa prensa, depués de la so recuperación. Les cintes incluyen, ente otres imáxenes en movimientu inédites, la recepción por Franco de la Cruz de la Victoria.

Acaba asina un camín entamáu hai más de cuatro años, cuando los espertos alertaron de la esistencia de los documentales. Depués d’una llarga busca d’archivu qu’afayó la compra municipal de les películes en 1943 por 10.000 pesetes, les cintes apaecieron nun despachu y l’Ayuntamientu d’Uviéu cedió-yles a la Filmoteca a cambiu de la so restauración.

Agora, final feliz. Los dos documentales, obra’l director Justo de la Cueva y redactaos en prosa inflada propia de la dómina, puen vese en formatu renováu, con importantes meyores na calidá de la imaxe y escenes en movimientu inédites, tales como la recepción de la Cruz de la Victoria por parte’l dictador Francisco Franco que antes namás podía contemplase en formatu fotográficu.

Esa imaxe apaez na cinta ‘El gnomo de la catedral’ -alusión al restaurador de la Cámara Santa, Víctor Hevia-, un documental qu’amuesa una sé catedralicia en reconstrucción depués de la revolución de 1934 y la Guerra Civil. Na otra película, ‘Oviedo, capital de Asturias’, el realizador retrata, en tonu dafechu franquista, los efectos de la llucha desatada na capital asturiana ente los republicanos y los partidarios de los militares sublevaos al mandu de Franco.

El director de la Filmoteca Asturiana, Bonifacio Lorenzo, sorrayó la importancia de les cintes recuperaes, yá que los sos negativos desapaecieren nun incendiu, y precisó que les dos películes restauraes integren una serie de seis documentales sobro Asturies, ún de los cuales dedícase a Xixón: “Esta película, que nun ye tan bona como les d’Uviéu, perdióse, pero tengo llocalizada una copia en 16 milímetros”, señaló Lorenzo.

A la presentación pública de les restauraciones asistió amás l’archivera mayor d’Uviéu, Ana Herrero, quien se felicitó pola calidá del remocicamientu de les cintes y aseguró que l’Ayuntamientu yá puso en manos de la Filmoteca otros documentos pa sometelos a un procesu asemeyáu.

El tabú nel cine, la filosofía, la lliteratura y la hestoria ye’l tema común del VII Cursu Universo Media d’Estensión Universitaria que se va celebrar del 29 de payares al 3 d’avientu en Xixón, dientro la programación del Festival Internacional de Cine. Tabús hestóricos como l’holocaustu nazi o el franquismu, la censura nel cine, los tabúes estéticos o sexuales, son dellos de los asuntos que van ocupar les sesiones del cursu. Como vien siendo habitual Universo Media inclúi tamién la proyección d’un ciclu de cine nel que van poder vese clásicos como ‘Tabú'(1931) de F.W.Murnau o ‘La grand bouffe'(1973) de M.Ferreri xunta producciones d’estrenu n’Asturies como ‘Oh Uomo'(2004) de Y.Glanikian y A.Ricci,un documental sobro los horrores del sieglu XX.

L’escritor vascu Bernardo Atxaga, el críticu cinematográficu Carlos Boyero, los realizadores Jordi Costa y Sergi Sánchez o el periodista asturianu Enrique Bueres, son dellos de los diecinueve ponentes del cursu entamáu por Estensión Universitaria en collaboración col Festival de Cine.

El ciclu de cine col que se complementa Universo Media proyecta los siguientes filmes: ‘Tabú’ (F.W.Murnau, USA, 1931), ‘Oh Uomo’ (Yervant Gianikian/Angela Ricci Lucci, Italia, 2004), ‘Anatomie de l’enfer’ (Catherine Breillat, Francia, 2004), ‘La grande bouffe’ (Marco Ferreri, Italia, Francia, 1973), ‘De nens’ (Joaquim Jordá, España, 2003), ‘A place on earth’ (Artour Aristakisian, Rusia, 2001), ‘La piel vendida’ (Vicente Pérez, España, 2004), ‘Ma mere’ (Crsitophe Honoré, Francia/España/Austria, 2004) y ’20 Fingers'(Mania Akbarí, Irán, 2004).

L’asturianu Tomás Cimadevilla, responsable de empresa Telespan 2000, foi escoyíu ayer pola Federación de Productores Audiovisuales d’España (FAPAE) como vicepresidente xunto al cabezaleru de la productora BrB Claudio Biern. Cimadevilla preside anguañu l’Asociación de Productores Independientes (API) y tien nel so haber profesional ésitos cinematográficos como ‘El otro lado de la cama’, ‘Días de fútbol’ o les taquilleres: ‘Torremolinos 73’ y ‘Kárate a muerte en Torremolinos’.

El productor asturianu fundó nel añu 2000 la empresa audiovisual Telespan, qu’en poco tiempu ye una de les productores con mayor proyección nel mercáu de cine y la televisión. Apocayá la empresa de Tomás Cimadevilla firmó un contratu con Telecinco pa producir una serie televisiva de situación titulada ‘Maneras de vivir’ y trabaya agora nel proyectu del prósimu llargometraxe de la realizadora Chus Gutiérrez: ‘El calentito’, una hestoria ambientada nel Madrid del empiezu de la movida, na que la música de los grupos de la dómina tien un papel resaltable.

De la vinculación de Cimavilla con Asturies resalta la collaboración del grupu Doctor Explosion na banda sonora de les dos producciones de la serie ‘Torremolinos’. Agora dende la vicepresidencia de la Federación de Productores Audiovisuales, l’entamador xixonés, va tentar puxar pol desenvolvimientu d’un sector cada vez más importante de la industria cultural.

Los documentales ‘Metallica: Somo kind of Monster”(2004) de Joe Berlinger y Bruce Sinofsky, asina como ‘End of the Century: The Story of The Ramones'(2003) de Jim Fields y Michael Gramaglia, son los platos fuertes de la sección dedicada nel Festival de Cine de Xixón a les películes musicales. L’apartáu ‘Desorden y concierto’ complétase con otru filme sobro Los Ramones: ‘Blank Generation'(1976) y cinco documentales más cola música de vanguardia y el pop de les tres últimes décades como protagonistes.

Per tercer añu el Festival Internacional de Cine de Xixón dedica una apartáu específicu al cine musical embaxo’l títulu ‘Desorden y concierto’. Nesta ocasión van presentase ocho filmes, ente los que destaquen los estrenos de ‘Metallica: Some Kind of the Monster’, un documental de J.Berligner y B.Sinofsky alrodiu de l’actividá de la famosa banda heavy dende 2001 hasta 2003; tamién la primicia de ‘End of the Century: The Story of The Ramones’, de J.Fields y M.Gramaglia, un percorríu hestóricu pel camín andáu nos escenarios pol conxuntu de Joe Ramone dende los sos inicios hasta los sos últimos tiempos. Otru filme colos Ramones de protagonistes: ‘Blank Gemeration’ d’Amos Poe y Ivan Kral, completa l’homenaxe que’l Festival ufierta a una banda que sobrevivió col so enérxicu son a modes, corrientes y traxedies como la desapaeción progresiva de tres de los sos miembros, l’últimu el propiu líder del grupu Joe Ramone.

Nesta sección documental van poder vese tamién les producciones: ‘Arvo Pärt: 24 Preludes for a Fugue'(2002) de Dorian Supin, una cinta sobre’l compositor estoniu Arvo Pärt (Paide, 1935). ‘Low in Europe'(2004) de Sebastian Schrade capta la xira del tríu americanu Low pel continente americanu y ‘Festival Express'(2003) de Bob Smeaton recueye ‘l periplu per tierres canadienses d’un elencu de figures clásiques del rock de los setenta: Janis Joplin, Grateful Dead, The Band, Buddy Guy… Los otros filmes que completen la sección ‘Desorden y concierto’ son la producción americana ‘Kill yours Idols'(2004) de Scott Crary, un repasu a la hestoria del punk neoyorquinu con bandes como Suicide, DNA, Black Dice, The Contortions… xunida a los primeros rellumos de bandes posteriores como Sonic Youth o Yeah Yeah Yeahs. La película ‘Fallen Angel'(2004) de Gandulf Henning, cuenta la hestoria del músicu Gram Parsons, muertu de sobredosis a los 27 años, dende los sos inicios en solitariu y la so participación en grupos como ‘The Byrds’ o ‘The Flying Burrito Brothers’.

La memoria d’Aida de Lafuente protagoniza l’últimu trabayu cinematográficu de Ramón Lluis Bande, un documental entamáu alrodiu del testimoniu directu de la única hermana superviviente de la revolucionaria, Pilar de la Fuente, y del cantar popular “Aida” interpretáu por Mari Luz Cristobal Caunedo. La película afonda na hestoria de la mártir d’Ochobre del 34 y del so entornu familiar, fondamente marcáu pola militancia nel comunismu asturianu.

El mediumetraxe titúláu “De Lafuente” concibióse como un nuevu trabayu de la serie qu’en forma de ‘work in progress’ emprimó Ramón Lluis Bande alrodiu de la memoria hestórica d’Asturies y que tuvo’l so prededente nel tamién documental ‘Estratexa'(2003). En palabres del realizador xixonés: ‘Interésame afondar nesta forma de documental partiendo directamente de la realidá, del testimoniu y la presencia de los auténticos protagonistes de la hestoria cuntada, ensin dala interferencia d’elementos ayenos a esi relatu’.

Bande apuesta tamién por ufiertar un testimoniu, nesti casu el de la hermana superviviente d’Aida, Pilar de la Fuente, ‘directu y desnudu, tal lu espresa la protagonista’. Pa consiguir ‘el distanciamientu necesariu ente l’espectador y el testimoniu emocionáu y vívidu’ de Pilar, la figura de la protagonista nun se presenta nel centru de la imaxe, sinón ‘cásique a un marxe d’ella’, nun enfoque arriesgáu col que Bande afirma querer ‘consiguir que l’espectador ponga la so atención na hestoria que se cuenta más que na espresión conmovida de quien la cuenta’. Na primera parte, la más estensa del filme ufiértase el testimoniu de la hermana superviviente d’Aida y la segunda y postrera céntrase na interpretación que fai la cantante Mari Luz Cristóbal Caunedo del cantar popular ‘Aida’, un complementu o segunda versión testimonial alrodiu de lo que l’autor del mediumetraxe califica como ‘un relatu de los fechos membraos en forma de cantar que se correspuende cásique dafechu col que realiza Pilar’. Pa la ocasión la cantante asturiana interpreta ‘Aida’ nuna adaptación propia a les estructures monódiques de la tonada.

La intención de Ramón Lluis Bande de la qu’entamó’l proyectu fai dellos meses yera facer coincidir el so estrenu coles feches de remembranza d’Ochobre del 34. Un retrasu debíu a motivos de financiación del trabayu impidió ver cumplíu el deséu del realizador. Agora la cita pa que los espectadores puedan visionar ‘De la Fuente’ va ser nel trescursu del prósimu Festival Internacional de Cine de Xixón, un sitiu onde ya Bande presentara anteriores películes suyes.

El precedente d’esti documental alrodiu d’Aida de la Fuente, foi ‘Estratexa'(2003), con un formatu asemeyáu al de la nueva cinta, nel que s’afondaba na memoria de los guerrilleros asturianos al través del testimoniu directu d’ún d’ellos, el comunista Manuel García y del testimoniu gráficu alrodiu de la guerra civil y la llucha en monte del fotógrafu Constantino Suárez, esta última parte ensamblada na música del grupu Manta Ray y el so tema del mesmu títulu que la película ‘Estratexa’.Ramón Lluis Bande, confirmó a Asturnews la so intención de siguir esa obra en marcha alrodiu de la memoria hestórica d’Asturies con nuevos trabayos.