Cine

“Sinjania, talleres d’escritura” organiza, pa la primer quincena d’avientu, un taller de guión cinematográficu, embaxo’l títulu “Introducción a la escritura de guión pal cine”. El director y realizador Juan José Bors coordinará esti taller d’iniciación nel que van tratase los puntos claves d’un guión: la idea, la estructura, los personaxes, el diálogu, el pitching, etc. Con un enfoque prácticu va buscase’l que, coles indicaciones del coordinador, seyan los participantes quien trabayen y escriban los sos propios proyectos.

El cursu tien un preciu de 160 euros y va celebrase del 1 al 12 d’avientu, de 19:00 a 21:00 hores. P’apuntase ha mandase un corréu a info@sinjania.es o llamar al 984 182 519 o al 984 182 565. Tamién ye posible acercase pela cai Martínez Marina 3, 1u D, n’Uviéu.

La 46 edición del Festival Internacional de Cine de Xixón entama esti xueves día 20 de payares con más 20o películes a proyectar, 100 llargometraxes y 107 curtios de producción tantu asturiana, como nacional ya internacional con “precios populares” y delles películes subtitulaes n’asturianu como novedá cimera.

El preciu por proyeición esti añu va ser talamente como en 2007 de 3,5 euros, mientres que por 25 euros van poer vese diez cintes, confirmando l’enfotu de la organización de facer un festival cercanu y popular.

La novedá d’esta edición ye tamién que yá ten a la venta les entraes nes páxines web del festival, nel Teatru Jovellanos y en Caxastur, entidá que collabora col certame.

Una nueva película rodada n’Asturies llega a les pantayes de los cines de tol estáu. El filme ye “Cenizas del cielo” y ta dirixíu por José Antonio Quirós y protagonizáu por Gay Piquer, Beatriz Rico y Celso Bugallo, ente otros. Na película participen amás artistes asturianos como Xuan Bello, que fizo la lletra de la banda sonora, Anabel Santiago, que la interpreta y Ramón Padra qu’adaptó la lletra a la so música.

La película presentóse yá n’Asturies y en Madrid y recibió dellos premios, ente otros sitios, nel Xapón o nel Festival de Cine de Mediu Ambiente. La película tien un tresfondu ecoloxista y cuenta la historia de los vecinos d’un valle asturianu que ven alteriaes les sos vides pola instalación d’una central térmica nel territoriu onde viven. «Cenizas del cielo» supón la segunda incursión de José Antonio Quirós nel cine de ficción dende qu’hai cuasi diez años llevara a les carteleres «Pídele cuentas al rey».

Como anécdota, na película apaez Carlos Madera faciendo un caméu. Nel momentu de la grabación Madera yera Director Xeneral de Cultura.

Esta ye la lletra de Xuan Bello escrita pa la película:

La dirección del Festival Internacional de Cine de Xixón, que va celebrase esti añu ente los 20 y 29 de payares, prepara la edición d’un doblaxe al asturianu. La película ye “La increíble aventura de los dos mosquitos”, de los directores daneses Jannil Hastrup y Flemming Quist Meller.

El proyectu supón, per primer vegada, el doblaxe d’un película al asturianu. Sicasí, la esperiencia n’esti campu bien dada por dellos curtios, la serie animada “El faru d’Iyán” o’l doblaxe de los cuentacuentos del programa “Presta asgaya” na TPA.

La Mancomunidá d’El Cabu Peñes vieno acabante convocar el II Certame de Curtios n’asturinu col oxetu de facer un curtiu en Llingua Asturiana (de temática llibre) con un llargor d’unos quince minutos recoyendo amás una referencia de la propia Mancomunidá y del Serviciu de Normalización Llingüística, asina como de la Conseyería de Cultura y Turismu como muérganos o entidaes qu’entamen y/o sofiten esti certame.

La entrega de la documentación pue facese en mano (nes oficines de la Mancomunidá con señes: C/Braulio Busto, 2 – 2u, 33430 Candás – Carreño; tfnu. 985872421, n’horariu d’atención al públicu de 9:00 a 14:00 hores), por persona interpuesta, o per corréu certificáu y con acuse recibu (paquete postal exprés), en tal casu tien de remitise per fax al nu 985 87 25 22, dientro del plazu presentación, el resguardu del mentáu unviu.

Ha presentase nuna carpeta o sobre col títulu: “Segundu Certame de Curtios en Llingua Asturiana de la Mancomunidá Cabu Peñes” asina como’l nomatu del autor. Dientro del sobre ha axuntase un sobre zarráu colos datos del autor (nome, apellíos, señes, teléfonu y nomatu) y títulu del trabayu. La fecha tope pa entregar esti material sedrá’l 1 d’avientu de 2008 (llunes) a les 14:00 hores.

Pa más información pue consultar llamando al Serviciu de Normalización Llingüística de la Mancomunidá n’horariu de 10:00 a 14:00 hores y nos tfnos. 985872406 (martes y xueves) y 985883532 (llunes, miércoles y vienres) o per corréu electrónicu a la dirección: mmcp.llingua@asturnet.es.

Les BASES del CONCURSU puen consultase na páxina web de la Mancomunidá Cabu Peñes: www.faronorte.org. asina como n’otres páxines y medios afayadizos.

Web pa consultar les bases del Certame

Dende esti vienres, “Tiro en la cabeza”, la radical película sobre la cotidianidá d’un etarra que llevantado abonda polémica nel Festival de San Sebastián, ye la primer pelícuila que tamién tendrá una sala virtual n’internet qu’ufre a 100 persones por sesión, la posibilidá de ver la película nuna web por namái que 3,40 euros. La película mércase al traviés d’un sms y la duración ye idéntica a les semanas que la cinta se caltenga na cartelera con pase a les 16, 18, 20 y 22 hores.

Esta iniciativa esperimental, ensin precedentes n’España, ñaz d’un alcuerdu ente Jaime Rosales, director de Tiro en la cabeza, y el portal www.filmin.es. Poro, la propuesta precisó del beneplácitu del Ministeriu de Cultura, porque la llei de cine nun permite estrenos de películes sovencionaes n’otros recintos que nun seyan sales cinematográfiques.

La páxina onde pue vese la película ye una especial preparada por Filmin pala ocasión.

Páxina onde se pue ver l’estrenu de “Tiro en la cabeza”

El cine asturianu collecha ésitos en tol mundiu. Les películes “El orfanato”, con guión del asturianu Sergio G. Sánchez y “Las cenizas del cielo”, del director José Antonio Quirós, rodaes amás n’Asturies tán acabante de ser nominaes pa dos importantes premios. Una nueva amuesa de la salú que vive la producción cinematográfica n’Asturies.

Nel casu de “La cenizas del cielo”, la película foi seleccionada pa participar na sección oficial de la 21 edición del Festival Internacional de Cine de Toquio, dempués de que fuera estrenada’l pasáu 26 d’agostu na Expo de Zaragoza.Llegará a los cines asturianos na seronda. La obra ta protagonizada por Celso Bugallo, Clara Segura, Gary Piquer y Beatriz Rico, filmada na redolada de la Central Térmica de Soto de Ribera, con munchos de los sos diálogos n’asturianu, la so banda sonora débese a Ramón Prada. La película ábrese y ciérrase con dos versiones d’una lletra de Xuan Bello, “El cantar de Dafne” interpretaes por Anabel Santiago y Michael Lee Woolf.

D’otru llau, “El Orfanato”, foi esbillada pa optar al Premiu del Públicu 2008 de la European Film Academy, según informó la organización nun comunicáu. Na película, que tien guión escritu por un asturianu, participen amás dellos actores asturianos, como Lluis Antón González. El Premiu del Públicu de la European Film Academy dexa a los fans de tol continente esbillar la so película europea favorita como parte de Los Premios de Cine Européu. Esti galardón quier presta-y atención a les películes que tan feches pal públicu. N’otres ediciones, algamaron esti galardón Pedro Almodóvar, con “Hable con ella”; Roberto Benigni, con “La vida ye bella”; Jean Pierre Jeunet, con “Amelie”; Peter Cataneo, con ‘Full Monty’; y Wolfgang Becker, con “Good bye, Lenin!’”. Por “El orfanato pue votase dende ayeri llunes y hasta’l 31 de setiembre na páxina web de l’academia europea del cine.

El Premiu d’Honor d’esta edición del Festival Internacional de Cine Gai y Lésbicu d’Asturies ye pal realizador gai norteamericanu Bill Condon. Bill Condon nació en Nueva york en 1955 y ye autor d’una riestra de películes d’éxitu como Hermana, hermana; Muerte nel agua; Dioses y monstruos; L’home que nun mentiría; Kinsey y la recién producción musical titulada Dreamgirls.

En 1999 ganó’l Premiu Óscar de l’Academia norteamericana al meyor guión adaptáu pola so película “Dioses y monstruos”. Amás de director consagráu, Bill Condon ye un gran guionista. Tuvo nomináu al Óscar tamién pol guión adaptáu de la película Chicago nel añu 2003. El 3r Festival Internacional de Cine Gai y Lésbicu d’Asturies – CinegailesAST 2008, estrenará n’Asturies cuatro llargumetraxes nominaos esti añu al Premiu a la Meyor Película que concederá’l públicu del Festival. Trátase de les películes norteamericanes Otra Peli Gai de Todd Stepehns, Vamos ser collacies de Glen Gayord, la producción filipina El florecimientu de Máximo Oliveros d’Auraeus Solito y la película alemana Vivir d’Angelina Maccarone.

L’estrenu d’estes producciones tien llugar del 7 al 9 d’agostu nel Auditoriu del Centru de Cultura Antigu Institutu de Xixón sede del Festival CinegailesAST 2008.

El Festival entamabá’l xueves 7 d’agostu del 2008 a les 5 la tarde nel Auditoriu del Centru de Cultura Antigu Institutu de Xixón, na cai Xovellanos, mui cerca de la Escalerona de la playa. Na xornada inaugural del Festival proyectáronse cinco de los curtios nominaos al premiu amás del curtiu ganador na primer edición del Festival: “Sirenito”. Llueu vendrá la película alemana Vivir (Vívere) d’Angelina Maccarone. Esti vienres 8 d’agostu entamarán les sesiones a les 5 la tarde cola proyección d’otros nueve curtios nominaos a los premios y la proyección del curtiu ganador del añu pasáu tituláu “Flores en el parque”. Llueu vendrá la proyección de dos películes: la norteamericana Vamos ser amigues de Glenn Gayord y la filipina El florecimientu de Máximo Oliveros d’Auraeus Solito.

Hai que remembrar que tolos premios concédelos el público asistente a caúna de les proyecciones salvo’l premiu d’Honor y el premiu al Meyor Documental qu’esti añu lu concede’l xuráu del Festival.

La Gala de Pieslle cola entrega de premios tendrá llugar el sábadu 9 d’agostu tamién nel Auditoriu del Antigu Institutu a partir de les 5,30 de la tarde, presentada una vez más pol gran actor DiCarlo. Durante la Gala proyectaráse una de les películes más provocatives, escandaloses y sorprendentes d’esta mesma temporada, la realización del norteamericanu Todd Stephens titulada Otra peli gai, que va dar muncho que falar. Los nominaos al Premiu al Meyor Documental son: LES SESIONES PARRICIDES (THE PARRICIDE SESSIONS) Diego Costa, EEUU-Brasil, 2006; MARICONEANDO LA PISTA (QUEERING THE PITCH) Tom Maguire, Irlanda, 2007; EL XARDÍN DE LES COLUMNES (EL JARDÍN DE LAS COLUMNAS) Diego Torres, España, 2007 y VAQUERU PA SIEMPRE (COWBOY FOREVER) Jean-Baptiste Erreca, Francia, 2006. L’asistencia a toles sesiones del Festival ye dafecho de baldre.

El Teatru Filarmónica d’Uviéu abre güei les puertes pal so ciclu “Llunes de cine”, organizáu pola Conceyalía de Cultura en collaboración cola Filmoteca d’Asturies. El primer pase va ser a les ocho y media la tarde y va tar protagonizáu pola película de1976, “Parranda”, de Gonzalo Suárez. La entrada ye de baldre hasta escosase l’aforu.

Enantes de la sesión, el director de la Filmoteca d’Asturies, Juan Bonifacio Lorenzo, va esponer una breve presentación como asesor de los ciclos. El pieslle d’esti ciclu va tar dedicáu al director José Luis Garci, cola proyección de tres de les sos películes nos tres últimos llunes del mes d’agostu: «Volver a empezar» (1982), «Sesión continua» (1984) y «Luz de domingo» (2007).

Xixón acueye un añu más el 3r Festival Internacional de Cine Gai y Lésbicu d’Asturies – CinegailesAST 2008. El Festival va entamar el próximu xueves 7 d’agostu del 2008 nel Auditoriu del Centru de Cultura Antigu Institutu de Xixón, na cai Xovellanos. Na xornada inaugural del Festival proyectaránse cinco de los curtios nominaos al premiu amás del curtiu ganador na primer edición del Festival: “Sirenito”.

Darréu, va ponese la película alemana Vivir (Vívere) d’Angelina Maccarone. El vienres 8 d’agostu van entamar les sesiones cola proyección d’otros nueve curtios nominaos a los premios y la proyección del curtiu ganador del añu pasáu tituláu “Flores en el parque”. Darréuu van proyectase dos películes: la norteamericana Vamos ser amigues de Glenn Gayord y la filipina El florecimientu de Máximo Oliveros d’Aureaus Solito.

Los premios concédelos el públicu asistente a caúna de les proyecciones salvo’l premiu d’Honor y el premiu al Meyor Documental qu’esti añu lu concede’l xuráu del Festival. La Gala de Pieslle, cola entrega de premios, va tener llugar el sábadu 9 d’agostu tamién nel Auditoriu del Antigu Institutu a partir de les 5,30 de la tarde, presentada una vez más pol gran actor DiCarlo.

Na mesma, va proyectase “una de les películes más provocatives, escandaloses y sorprendentes d’esta mesma temporada”, según la organización, la realización del norteamericanu Todd Stephens titulada Otra peli gai, que va dar muncho que falar. El Premiu d’Honor d’esta edición del certame ye pal realizador gai norteamericanu Bill Condon (Nueva York, 1955) , autor d’una riestra de películes d’éxitu como Hermana, hermana; Muerte nel agua; Dioses y monstruos; L’home que nun mentiría; Kinsey y la recién producción musical titulada Dreamgirls.