Cine

La Llei del Cine Catalán qu’aprobó esti día’l Gobiernu l comunidá desixe que los DVD incluyan la versión catalana nel menú d’idiomes, sigún informó’l Conseyeru de Cultura y Medios de Comunicación, Joan Manuel Treserras en rueda prensa.

Pa protexer el cine européu, el Gobiernu catalan atalanta que les películes europees con 15 o menos copies tienen de ser les úniques que ten llibres d’incluyir el catalán nel doblaxe o sotitulación. Les americanes con menos de 15 copies tendrán de distribuyir la metá de les copies en catalán. Los gastos d’estos doblaxes o sotitulaciones añadíes correrán a cargu de les distribuidores

El Festival de Cine de Xixón repite la esperiencia del añu pasáu y vuelve a sotitular y doblar cine al asturianu. Cuatro pieces van cuntar con presencia del asturianu nesta ocasión: 2 sotitulaes, una en versión orixinal y otra doblada. Asturnews ufre información del argumentu de les películes y los horarios de los pases n’asturianu.

“Dead man´s bluff”: Película rusa del añu 2005 na que Sergei y Simon, los protagonistes, formen una peculiar pareya de matones a sueldu del señor Mijailovich. Dambos demuestren ser espeditivos y nun paecen tener mieu a nada, pero cuenten con un seriu problema: tienen el gatillu demasiao fácil. Ente cada trabayu dialoguen a lo Pulp Fiction y faen planes pal futuru. Balabanov emplea xeneroses dosis d’humor negru p’averase a la llucha de mafies en pos del control del país tres la cayida del comunismu. Y nun pierde nunca de vista la evolución de la sociedá soviética, de la que’l film s’erixe en corrosiva sátira.

La película va sotitulase n’asturianu na sesión del vienres 20 a les 20 hores na sala 4 de los Cines Centro.

Esi mesmu día, nel Teatru de La Llabora va proyectase “Jasper, viaxe al fin del mundu”, dientro del ciclu Enfants Terribles. La película ta doblada y sotitulada n’asturianu na sesión de les 12.15 hores.

La otra película sotitulada n’asturianu, ye polaca y titúlase “Edi”, y ta premiada nel Festival de Berlín y presentada a los Oscars pola academia polaca. N’ella, Edi, vagabundu de bon corazón y aficionáu a la lliteratura, sobrevive vendiendo chatarra xunto a la so insepartable camarada Jureczek nuna Polonia contemporánea onde les diferenceas sociales medraron tres la cayida del comunismu. Al aceptar la ufierta d’unos gangsters pa impartir clases particulares a la so hermana, una “lolita” d’apariencia virxinal, Edi veráse envuelu nun malditu enguedeyu que terminará por convertilu n’estrañu padre adoptivu.

Edi va echase sotitulada na sesión del sábadu 21 a les 17 hores, na sala 1 de los Cines Centro.

Amás, dientro de la estaya oficial de curtios va ponese “Vida de María Magdala”, en versión orixinal n’asturianu con sotítulos n’inglés y francés. La película, dirixida por Santos Hevia, y coproducida por España y Bélgica dura 14 miniutos y nella vese a una muyer farta d’aguantar a los homes de la so rodiada, que s’aprovechen d’ella, decide dar un pasu y cambiar de vida.

Los horarios d’esti curtiu n’asturianu van ser el sábadu 21 a les 20 hores en Cines Centro sala 4 y el domingu 22 a les 12.30 hores na sala 3 de los mesmos cines.

Les entraes pa toles películes del Festival lleven a la venta delles selmanes y pueden mercase tovía nos puntos habituales establecíos pol certame.

Programa completu del 47 FICXixón

L’amuesa, realizada en collaboración col Festival Internacional de Cine de Xixón, presentaráse na capital belga los díes 26 y 27 de payares, dempués del gran ésitu de les trés ediciones anteriores.

Nel ciclu va presentase una escoyeta de los meyor curtiumetraxes asturianos proyectaos nel certamen xixonés en 2008. Entamando un programa interesante que tendrá llugar nes instalaciones de la Casa d’Asturies de Bruseles col estrene en Bélxica del curtiumetraxe “La vida de María de Magdala” dirixida pol asturianu afincáu en Bruseles Santos Hevia.

El programa inclúi amás otros curtios de realizadores como Eliana Álvarez, Carlos Navarro o Jorge Rivero.

Per octavu añu consecutivu, el Festival de Cine de Xixón entrega’l Premiu Nacional de Cinematografía Nacho Martínez, que se da n’alcordanza del actor asturianu, que finó en 1996. Esti añu, la valiosa escultura fecha pol artista Jaime Herrero va ser pa la actriz Ángela Molina.

La actriz madrilana axúntase asina a la llista de profesionales del mundu del cine que ganó esti gallardón n’ediciones anteriores como Mercedes Sampietro, Eusebio Poncela, Assumpta Serna, Marible Verdú y Marisa Paredes, ente otros.

Fía del actor y cantante Antonio Molina, esta andada actriz lleva a recostines más de tres décades rodando a los mandaos de direutores como Luis Buñuel, Luigi Comencini, José Luis Borau, Marco Bellocchio, Manuel Gutiérrez Aragón, Jaime Camino, Bigas Luna, Pedro Almodóvar, Ridley Scott, los hermanos Taviani o Lina Wertmüller, con un camín fechu qu’avala una de les trayectories cinematográfiques más afitaes y privilexaes del cine español.

Programa completu del 47 FICXixón

Rellumes ye la nueva estaya competitivia del FICXixón que naz col envís de rellenar la competición de la Seición Oficial amestando más reflexones y más espresiones cinematográfiques a les que yá hai con otres rabaseres de cine independiente. El premiu ye de 6.000 euros y, per primer vegada nel festival, el ganador va ser escoyíu colos votos del públicu que vaya a les proyeiciones.

Pa la so estrena s’esbillaron ocho títulos. De Francia lleguen tres títulos imprescindibles. “L’insurgëe”, de Laurent Perreau, ta protagonizáu pol veteranu Michel Piccoli, que da vida un compositor y ex miembru de la Resistencia francesa. “Au voleur” ye la ópera prima de Sarah Leonor, na que pue almirase al malográu Guillaume Depardieu, que finó hará un añu, nun de los sos caberos trabayos compartiendo protagonismu con Florence Loiret Caille. Ella ye profesora. Él ye un lladrón. Y xuntos tán convencíos de poder algamar la felicidá, magar que vense obligaos a fuxir al fin del mundu. Remata’l tríu francés “The Wolberg Family”, d’Axelle Ropert, el retratu d’una familia normal, un padre y el so grupu familiar que, poles apariencies, lleva una vida aburrida, na que poco a poco apaecen resquiebros que tracamundien esa imaxe de familia xunida y contenta.

Dende Xapón aporta “Nikotoko Tou”, de Takuya Dairiki y Takashi Miura, que yá foi seleicionáu pol Festival de Locarno. Film misteriosu y finu que los diálogos combinen humor y fondura con especial harmonía y que ta llamada a ser película de cultu en Xixón.

Holanda apaez al traviés de “Can Go Through Skin”, d’Esther Rots, foi presentada na Berlinale. La vida urbana de Marieke vese interrumpida por un fechu dañible que va marcar na so esistencia un antes y un depués, fuxendo de les antípodes del azote d’Ámsterdam.

N’ “A religiosa portuguesa”, d’Eugène Green amuesa un prestosu y delicáu cantu a la guapura del paisaxe de Lisboa, retratada como un territoriu fantasiosu onde’l tiempu parez que ta paráu y los sitios amuesen continues xuntures col pasáu de la ciudá. A la capital portuguesa aporta Julie, una xoven actriz francesa, que durante la so estancia, va llograr desquitase d’un recién fracasu sentimental. Rodiada d’un ambiente d’irrelidá, cualesquier instante parez buenu pa falar sobre l’amor, la pasión y otros temes esenciales de la vida.

“Burrowing”, d’Henrik Hellström y Fredrik Wenzel, ye un filme que nos fai esmolecer y nel que miramos con güeyos de neñu lo qu’asocede nun suburbiu típicu escandinavu, gracies a Sebastián, un neñu de 11 años.

La representante del cine independiente americano vien roblada pol realizador navayu Sterlin Harjo. “Barking Water”, una cinta que yá foi seleicionada pal Festival de Sundance na so Seición Oficial, cuenta la historia alrodiu d’un pareya mayor que xúntase una última vegada pa facer el caberu viaxe con un destín a una reserva india d’Oklahoma.

El FIC Xixón 2009 va inaugurase güe xueves 12 de payares, a les once y media la mañana, nel Salón d’Actos del Centru de Cultura Vieyu Institutu cola presencia de José Manuel Sariego, presidente del Teatru Xovellanos y conceyal de Coordinación y Festexos del Conceyu de Xixón; Mercedes Álvarez, conseyera de Cultura y Turismu d’Asturies; César Menéndez Claverol, director de Rellaciones Institucionales y Asuntos Sociales de Caxastur; y José Luis Cienfuegos, director del Festival.

La Seición Oficial fizo del Festival de cine de Xixón un puntu de referencia pa los que-yos presta’l cine d’anguañu, suxeridor, más arriesgáu, más vivu, un cine que nun necesita ardiluxos pa conmover, esmolecer o entretener al espeutador. Tolos títulos que van competir na Seición Oficial va tener en Xixón la so première española. La ópera prima d’Álvaro Brechner, Mal día pa pescar, va ser la representante nacional nuna programación na que van tar les últimes producciones más nomaes vinientes de tolos requexos del planeta. Cintes como Welcome, Les beaux gosses o Le roi de l’evasion van destacar el poderíu del cine francés nuna seición na que los Estaos Xuníos va participar con Go get some Rosemary y Humpday. The good hearts, Francesca, Wakaranai, La pivellina, Frontier blues, Between two worlds, Morrer un homen o The last days of Emma Blank completen un cartelu que perpasa les llendes europees pa recoyer los caberos trabayos de calidá de países como Irán y Xapón.

Bobbie Paunescu trai a Xixón, Francesca. Una cinta que revisa la situación actual de los inmigrantes rumanos n’Italia. El direutor Masahiro Kobayashi, concursa por primer vegada nel nuestru certame con Wakaranai, un destempláu drama protagonizáu por un mozu de 16 años al que la vida-y enseña la so cara más xabaz.

Mal día para pescar, ye la ópera prima del direutor uruguayu Álvaro Brechner,producida por Telespan 2000 y Baobab Films. Foi premiada nel últimu Festival de Lima y escoyida pa representar a Uruguay nos Premios Oscar. El filme cuenta’l percorríu per Llatinoamérica de dos particulares buscavides: un piraván y cínicu empresariu y el bracu alcohólicu ex campeón de llucha llibre, al que representa.

Lynn Shelton preséntase con Humpday, Premiu Especial del Xuráu de Sundance, que ye un intelixente (y divertidísimu) exerciciu sobre la sinceridá masculina. De los Estaos Xuníos llega tamién, tres pasar pela Quincena de los Realizadores de Cannes,Go get some Rosemary, de Joshua & Benny Safdie, una historia que revolotia sobre les sides y les responsabilidaes de la paternidá al traviés d’un pá que va d’amigu de los sos fíos pequeños.

Otra película con discutiniu: Welcome. El tema de la inmigración illegal aporta de la mano de Philippe Lioret en forma de drama que mete’l deu nuna de les gafures abiertes pol estáu de la liberté, la égalité y la fraternité. De Francia lleguen tamién otres dos películes: Les beaux gos , de Riad Sattouf, una de las revelaciones del cine galu d’esti añu; y Le roi de l’evasion, d’Alain Guiraudie (tamién presente na Quincena de Reallizadores de Cannes), que cuenta una historia d’amores prohibíos qu’arrecostina un vendedor d’equipos agrícolas homosexual que nun lleva nada bien el tar solteru.

Tampoco ye nenguna maraviya la vida de Tonia, el travesti que protagoniza Morrer como un homem, de Joao Pedro Rodrígues. Un finu ya imaxinativu melodrama que se proyeutó na seición “Un Certain Regard” del Festival de Cannes.

El matrimoniu de realizadores formáu pola italiana Tizza Covi y l’austriacu Rainer Frimmel estrénase nel terrén de la ficción con La pivellina, una producción que cuenta la historia d’una pareya d’artistes de circu a los que-yos cambia de sópitu la vida, cuando’l destín los lleva a curiar d’una neña de dos años qu’alcontraron abandonada.

Desde Sri Lanka llega una propuesta tan llamativa como ambiciosa. Vimukthi Jayasundara presenta Between two worlds, una película que plasmó y ablucó en Venecia y Toronto. El direutor plantega un ruempecabeces d’alloriantes imáxenes que retraten dende la violencia d’una ciudá apocalíptica, reflexu d’una Sri Lanka en perpetua guerra civil, hasta la repetición de vieyes lleendes metanes la xungla.Y pa ruempecabeces d’imáxenes, Frontier Blues, l’últimu trabayu de Babak Jalali, nel que’l direutor compón simétriques semeyes en movimientu con una murnia retranca que recuerda al meyor Kaurismaki.

Tres l’ésitu n’anteriores ediciones del Festival con películes como Dark Horse y Noi Albinoi, Dagur Kári torna a Xixón col so primer film rodáu n’inglés, The good Heart. Paul Dano (Little Miss Sunshine) interpreta a Lucas, un mozu que vive nuna caxa de cartón so una autopista de Nueva York, que quier ayudar a la April , una azafata pimplada que lo ta pasando mal, pesie a que Jacques, el dueñu d’un chigre, ta a la escontra.

En The last days of Emma Blank, l’holandés Alex Van Warmerdam ufierta una áceda visión de la familia y la burguesía al traviés de la historia d’Emma, una muyer que, emperrada en que carez una enfermedá incurable, tien apolmonáu al serviciu colos mandaos más fatos y les esixencies más humildantes. Una comedia negra na llínea de Familia, de Fernando León d’Aranoa. El pieslle va facelu Cruz Ángeles cola cinta Don’t let me drown, tamién fuera de competición, ganadora del Audience Award nel Festival de San Francisco y presentada en Sundance y nos Imagen Foundation Awards.

La Sección Oficial del Festival de Xixón que se celebra dende’l 19 al 28 de payares va ufrir una amuesa importante del cine fechu por realizadores asturianos. Asina, y dientro de la Estaya Oficial va poder vese a Tomas Cimadevilla (Telespán 2000) dirixendo la “Mal día para pescar”, coproducida con Uruguai. Nel casu de la Estaya Oficial de curtiumetraxes les representantes asturianes van ser “La vida de María de Magdala” de Santos Hevía, y “Viejos Perdedores”, de Rubén Ordieres.

Per otru llau, el yá tradicional “Día d’Asturies” van protagonizalu nueve trabayos presentaos esti añu a competición: Cielo rojo al amanecer de Julio de la Fuente; Cinco necesidades, de Pablo Vara; Estación de carretera, de K. Prada y J. Prada; Sin Lupe, de Mario F. Tardón; Un juego, de Juan Soto; Puntu, de Eva Gallego Valdés; Sin cobertura, de Iñaki Ibisate; Tacones, de Benjamín Villaverde y The storyteller, de Eliana Sánchez.

Fuera de les estayes competitives van estrenase otres obres d’asturianu: Cena bizarra, de Carlos Álvarez Cabrero; Cuscús, de Melania Fraga; Felices, de Pelayo Muñiz; Juguetes tontos, d’Omar Tuero Uncal; Mal dormíu, de E. Church; Nos vemos el próximo miércoles de Robert Tabeada; Pagar el pato, de Xuan Acosta; Una rosa, de Manuel Pizarro y Miguel Expósito, y Two or three things I don´t know about her, d’Elisa Cepedal, amás de los premiaos del concursu “Nun me cuentes películes ¡failes!”, Y ahora ¿qué?, Ser o sentirse y Bajo el disfraz.

La Conceyalía de Cultura sigue col Ciclu “Cine porque sí” cola película “The Rocky Horror Picture Show”, un musica diferente en versión orixinal sotitulada. La entrada ye de baldre. La Sala Polivalente de la Casa Cultura acueye la esibición del llargometraxe a les 19:30 hores.

El músicu asturianu Ernesto Paredano, qu’asoleyaba en 2008’l discu n’asturianu “Alebrix”, con poemes n’asturianu d’Esther García, va ver la so música na gran pantalla’l 24 y 31 d’ochobre, dientro de la 54ª Selmana Internacional del Cine de Valladoliz.

El gaiteru y pianista punxo música a la película “Oveja Negra”. La mesma vien recibiendo dellos premios en festivales de México, onde reside l’asturianu, ente los que destaca’l de la crítica internacional.

Páxina web de la película

El Festival Internacional de Cine de Xixón y Canal + tienen abiertu’l plazu de presentación de trabayos pal “Proyectu Curtiu”, una iniciativa que quier afalar y sofitar a los curtiometraxistes que participen “pa que puedan sacar alantre los sos proyectos, facilitando a los ganadores del certame la realización d’un curtiometraxe nel formatu de 35 milímetros”.

La obra seleccionada va dase a conocer nel trescursu del Festival, que se celebra estos díes ente’l 19 y el 28 de payares. El ganador va recibir 9.000 euros que va tener que destinar a la realización de la so película. Amás, Canal + comprométese a emitir esi curtiometraxe a lo llargo de los próximos cinco años.

Los interesaos han presentar los sos trabayos enantes del llunes 2 de payares nes oficines del Festival Internacional de Cine de Xixón, que s’asitien nel númberu 82 de la cai Cabrales (códigu postal 33201). Los participantes han axuntar el guión del curtiometraxe, el presupuestu y un plan de inanciación y de rodaxe.