SUATEA aconceyó col Grupu Parlamentariu d’Izquierda Xunida

Jesús de la Roza y Llinu Álavrez del Secretariáu de SUATEA aconceyaron con Noemí Martín y Paloma Uría diputaes del Grupu Parlamentariu d’Izquierda Xunida cola fin de treslladar la so esmolición pola decisión del gobiernu de ceder parte de la Universidá Llaboral al grupu empresarial Thyssen Krupp.

Dende SUATEA la cesión al grupu empresarial d’una parte de les instalaciones del Centru Integráu de Formación Profesional de Xixón, nome actual de la Universidá Llaboral de Xixón, denúnciase que los conteníos del alcuerdu de cesión nun son conocíos, asina como tamién se desconocen les contrapartíes ufríes pola multinacional.

El conceyu valió tamién pa que los representantes del sindicatu educativu amuesaren la so indignación y “total repulsa” a la intención de la Conseyería d’Educación d’escorripiar darréu a los más de 100 del Ciclu Formativu d’Actividaes Deportives. Esti Ciclu ocupaba unes instalaciones inauguraes hai menos d’un añu, y nun hai previsión de que na Universidá Llaboral se vaya construyir un polideportivu nuevu. Nesti sen SUATEA denuncia que la decisión de la Conseyería nun se comunicó nin a los sindicatos nin a la Xunta de Personal Docente non Universitaria como ye “preceptivu” al cambiar los usos de les instalaciones educatives.

Dientro del alcuentru SUATEA plantegó a les responsables del Grupu Parlamentariu d’Izquierda Xunida la necesidá de que la fuerza d’izquierdes “faga lo posible pa que nos futuros desarrollos de la LOU la escuela pública nun seya la más perxudicada”. La situación de la enseñanza del asturianu foi otru de los temes abordaos pidiendo dende SUATEA la creación de la especialidá de mayestru d’asturianu, asina como la catalogación de les places y la convocatoria de les oposiciones correspondientes pa poner clas d’asturianu.
Los representantes de SUATEA incidieron na necesidá de catalogación de los estudios d’asturianu, entendiendo que la situación actual de los mesmos ye alegal asina como única nel restu del estáu. La catalogación de los estudios ye una midida necesaria de cara a la preparación, dignificación, de los mesmos. Dientro d’esti procesu inxertaríase la creación de les llicenciatures y diplomatures correspondientes, asina como la convocatoria d’oposiciones, les últimes daten d’hai más de 10 años. Nuna pallabra consistiríen facer de la enseñanza del asturianu una materia normal.

SUATEA