Sobre les declaraciones del Conceyal Jesús Montes Estrada

Nun puedo más qu’ablucar énte les declaraciones del Conceyal Jesús Montes Estrada, feches nuna rueda de prensa nel Ayuntamientu esti xueves. N’elles refirióse al incidente que sufrí nes dependencies municipales el pasáu 28 d’avientu, cuando me disponía a facer un simple trámite burocráticu y vi como la funcionaria que m’atendía ría al ver delles pallabres escrites n’asturianu.

El Conceyal Montes Estrada declaró que l’Ayuntamientu de Xixón se punxo en contactu col ciudadanu en cuestión, yo, “pa disculpase y aclariar el malentendíu”. Esto ye total y absolutamente falso. Nun recibí nenguna comunicación nin oral nin escrita per parte del Conceyu de Xixón, nin de naide.

D’otru llau, creo que la funcionaria en cuestión, que fizo mal al tomar l’actitú yá conocida, nun ye la máxima responsable. La culpa principal ye de los políticos del PSOE y IU-Bloque por Asturies que gobiernen l’Ayuntamientu de Xixón y que nun punxeron a disposción de los ciudadanos los documentos necesarios pa poder dirixise a esti organismu públicu n’asturianu. Tamién son responsables los encargaos de la Oficina Municipal de la Llingua, a la que se pidió’l Modelu Normalizáu n’asturianu necesariu pal trámite, ensin recibir respuesta nenguna.

Paezme llamentable que’l Conceyal Montes Estrada “Churruca” mienta a la ciudadanía y use de cabeza de turcu a una funcionaria, cuando la so inacción ye la causante d’esti tipu de conflictos. Les contradicciones del conceyal Montes Estrada salten a la vista, cuando denuncia a los medios de comunicación por nun usar los topónimos n’asturianu, delantre d’un cartelu del propiu Ayuntamientu nel que pue lleese namás “Ayuntamiento de Gijón”.

Namás quiero dexar constancia de la manipulación y les mentires del equipu de gobiernu del PSOE y IU-Bloque por Asturies nesta cuestión y recordar que nun quiero nenguna disculpa del Ayuntamientu, que de toes formes nun se me dio, sinón que se cumplan los drechos de los ciudadanos, ensin que pasen estes coses.