Tecnoloxía

El Palaciu de Congresos de Xixón, asitiáu na Feria de Muestres d’Asturies, acueye dende güei l’alcuentru internacional ‘Fundamentos Web 2007’, que va axuntar a más de cuatrocientos especialistes en desenrrollu web de tol estáu ente güei y el vienres. Esta ye la tercer edición d’esti eventu.

Esta tercer edición del congresu, afaláu pol Gobiernu d’Asturies y organizáu pola Fundación CTIC y la Oficina Española del W3C, da la oportunidá de sentir a figures relevantes nel ámbitu mundial del diseñu web con estándares y va centrase en facer analís de la Web dende una perspeutiva téunica y social.

Al actu inaugural va asistir el viceconseyeru de Modernización y Recursos Humanos del Gobiernu del Principáu, Luís Iturrioz Viñuela; l’alcaldesa de Xixón, Paz Fernández Felgueroso y el director xeneral de la Fundación CTIC, Pablo Priesca Balbín. Les actividaes van desenrrollase ente les 9:45 y les 18:30. Ufrimos un vidiu de les actividaes del añu pasáu

Programa completu de Fundamentos WEB 2007

La empresa Bionorte y l’Ayuntamientu de Samartín del Rei Aureliu firmaron un contratu de collaboración mediante’l cual los vehículos municipales van abastecese con combustuible biodegradable nun porcentaxe del 20%. Tres un periodu de pruebes nun se descarta la posibilidá de que’l porcentaxe d’abastecimientu a los servicios municipales xuba y qu’entame a suministrase tamien nes estaciones de serviciu del conceyu pal cosumu de los vecinos.

El combustible, que recibe’l nome de biofuel, ta compuestu por derivaos d’aceites vexetales (procedentes na so mayor parte d’establecimientos hosteleros) y anguaño ta siendo utilizáu, en periodu de pruebes, por empreses del sector de la metalurxia y la cerámica. Amás la empresa, que ta ubicada nel polígunu industrial de la Florida en Samartín, tamien ta ultimando alcuerdos pa comercializar el so combustible con empreses como Central Lechera Asturiana y la termica de Lada.

L’Ayuntamientu de Samartín del Rei Aureliu tien marcáu como oxetivu pa 2010 na axenda llocal l’algamar el 5,71% d’usu de carburantes ecolóxicos nel sector del tresporte.

Dende’l blog Trayasgaya ta acabante de convocase pal día 24 de Payares a les 18 hores, coincidiendo cola manifestación del CAO n’Uviéu una xuntanza de blogueros asturianos baxo’l nomatu de “Blogues y Sidra”.

Como se comenta nesi blog, “fai tiempu que se fala de proyeutos de xuntanza pola nuesa blogosfera. Cosa dificil nel universu esti del asturianismu. Pero la xente que fai blogues, somos persones rares y estremaes. Asina que dempués d’un primer acercamientu nel mes d’abril d’esti añu, baxo l’abellugu de la escuela de seronda, parez que llega la hora de formalizar esos contautos y xunir fuercies p’algamar un oxetivu común.”

L’autor de Trayasgaya, diz amás qu’a raiz de dellos comentarios ente diferentes blogs y dalguna qu’otra conversación privada plantega tres idees básiques pa esa xuntanza:

“1.Facer una primer quedada enbaxo’l nome “I Sidra&Blogues Pola Oficialidá”, aprovechando la mani del C.A.O. del 24 payares d’Uviéu cola fín de conocese y falar de la creación d’una Xunta de Blogueros/es en Llingua Asturiana, y de la organización del “II Alcuentru de Blogueros/es en Llingua Asturiana” sobre’l mes d’abril de 2008.

2.Crear una Xunta de Blogueros/es en Llingua Asturiana, tomando les decisiones de los caminos a siguir.

3.Organizar de forma autónoma el “II Alcuentru de Blogueros/es en Llingua Asturiana”, con tolo qu’ello conlleva (llugar, ponentes, material, suvenciones…) nestos siete meses que queden.

Convocatoria nel blog de Trayasgaya

Dende un entamu’l so principal esmolecimientu y porgüeyu diríxese a caltener ya esparder el folclor y la etnografía popular en tolos sos aspeutos. D’esi mou non solo representa los bailles y cantares tradicionales d’Asturies, sinón que tamién organiza charres, esposiciones y talleres de tradición, amás de cuntar con escuela música y cultura tradicional.

Nes sos interpretaciones musicales trata de presentar los bailles y dances tradicionales d’un mou asemeyau al que les xentes del pueblu representaben y representen nes romeríes y folixes populares. El so repertoriu abarca la totalidá d’Asturies, pero tien el so principal raigañu na tradición de la cuenca minera del Nalón.

En toos estos años, fueron numberoses les actuaciones feches tanto n’España como n’Europa. Ente elles hai de destacar la so presencia en festivales de Lille (Francia), Viana do Castelo (Portugal), Montpellier (Francia), Æro y Copenhague (Dinamarca), Utrech y Henguelo (Holanda), Serra da Estrela (Portugal), Festival Intercelticu de Guingamp (Bretaña) y numberoses participaciones en festivales de folclor n’España.

Web del grupu

Google presentó esti martes un nuevu programa del so paquete de servicios ofimáticos online: trátase de Presentations, una aplicación asemeyada a Powerpoint que ta enxertáu en Google Docs y que se xunta al procesador de textos y la fueya de cálculu que ya ufiertaba.

La presentación fízose nel blog de Google cumpliendo asina la promesa d’abril del presidente de Google, Eric Schmidt.

Presentations caltien les calterístiques conocíes de Docs pal trabayu en comuña, permitiendo que varies persones collaboren na ellaboración simultánea d’un documentu al través de la Rede.

El programa online ufrese dende esti martes 18 en 25 idiomes.

El Gobiernu del Principáu fai l’anuncia de la lliberación de 150 aplicaciones informátiques de calter propietariu como amuesa del so enfotu n’impulsar el software llibre nes alministraciones. L’anuncia fízose esti martes 18 depués de la xunta que caltuvo la Direición Xeneral d’Informática con representantes de la Fundación CENATIC (Centro Nacional de Referencia de Aplicación de las Tecnologías de la Información y la Comunicación).

El Gobierno del Principado va lliberar darréu les fuentes del Frame Work propiu que desendolcare na anterior llexislatura y de les aplicaciones desenvueltes con elli. Agora, el Principáu fai un brinde a les asociaciones y coleutivos que quieran participar xunta la Universidá d’Uviéu, l’Asociación Asturlinux y el Cluster TIC nesti nuevu proyectu, pa lo que fadrá delles xuntes próximamente.

La sede que tien nel mundu virtual Second Life la candidata del PSOE a l’Alcaldía d’Uviéu, Paloma Saínz, foi otra vuelta esti xueves 24 de Mayu, dende les 22 hores, el llugar onde se celebró una manifestación reivindicativa, pa pidir nesti casu la Oficialidá de la Llingua Asturiana. La oficialidá ya foi recalamada esta selmana pasada notra manifestación asemeyada nuna sede que tamién lleva sirviendo pa manifestase a simpatizantes del PP escontra la escarcelación de De Juana y a simpatizantes de Batasuna xustamente palo contrario.

La candidata socialista a l’alcaldía d’Uviéu vio esti xueves como s’axuntaben na so sede asturianistes reclamando la Oficialidá con amás manifestantes de dereches como los que’l día 15 xunta los de Batasuna (caún colos sos mensaxes) boicoteaben la so sede en Second Life al estilu de lo que ta faciendo nel mundu real Batasuna nestos díes de campaña. Aquel día los manifestantes concentráronse delles hores con cartelos na sede que tien nel mundu virtual Second Life chateando los lemes qu davezu se vienen sintiendo nes manifestaciones de la AVT (Asociación de Víctimes del Terrorismu). Nesta ocasión la manifestación foi muncho más pacífica.

La sede tuvo naquella xornada del día 15 el mayor tráficu dende que s’allugare nel mundu virtual, pasando de los 12700 avatares a les 10 de la nueche.

La sede que tien nel mundu virtual Second Life la candidata del PSOE a l’Alcaldía d’Uviéu, Paloma Saínz, va ser otra vuelta esti xueves 24 de Mayu, a partir de les 22 hores, el llugar onde se celebre una manifestación reivindicativa, pa pidir nesti casu la Oficialidá de la Llingua Asturiana. La oficialidá ya foi recalamada esta selmana pasada notra manifestación asemeyada nuna sede que tamién lleva sirviendo pa manifestase a simpatizantes del PP escontra la escarcelación de De Juana y a simpatizantes de Batasuna xustamente palo contrario.

La candidata socialista a l’alcaldía d’Uviéu vio amás el martes 15 como manifestantes de dereches y de Batasuna (caún colos sos mensaxes) boicoteaben la so sede en Second Life al estilu de lo que ta faciendo nel mundu real Batasuna nestos díes de campaña. Los manifestantes concentráronse delles hores con cartelos na sede que tien nel mundu virtual Second Life chateando los lemes qu davezu se vienen sintiendo nes manifestaciones de la AVT (Asociación de Víctimes del Terrorismu).

La sede tuvo nesta xornada’l mayor tráficu dende que s’allugare nel mundu virtual, pasando de los 12700 avatares a les 10 de la nueche.

Dellos de los manifestantes portaben cartelos pidiendo la llibertá de De Juana y dellos otros banderes d’España y cartelos pidiendo que tornare a la cárcel el terrorista y criticando la política terrorista de Zapatero.

Ente los manifestantesdel pasáu día 15, dellos aportaron con armes de fueu y con antorches a la sede de Paloma Sainz y del PSOE d’Uviéu en SL, magar tea dafechamente prohibido na zona onde s’alluga conocía como Quest II, talamente como se pue ver nel cartelu afitáu delantre la sede polos propietarios del tarrén onde mercare la so sede la candidata uvieina.

SLURL de la sede electoral de Paloma Sainz en SL

Esti martes 22 entamó un ciclu de conferencies divulgatives sobre ciencia y teunoloxía n’asturianu nel Centru de Cultura Antiguu Institutu de Xixón que va desendolcase hasta’l 25 d’esti mes. La primera d’elles foi’l martes y titúlase ‘La Ciencia Llingüística y el mitu de la llingua’, na que l’investigador Xulio Viejo fizo un repás a “los mitos y discursos históricos sobre’l llinguaxe cola voluntá d’aclariar terminos y ayudar a estremar los componentes políticos de los puramente científicos que se dan nel debate sobre la llingua”.

Mañana sigue’l ciclu col profesor del Departamentu d’Informática de la Universidá d’Uvieu Xabiel G. Pañeda, que va tratar de “redes de distribución peer to peer”. El xueves 24 con Xose M. Fernández, del Institutu Europeu de bioinformática, que va falar de “Xenómica: desenduvellando’l filangrayu de la vida” y el remate, esti vienres 25, cola participación de Xose Ánxelu G. Morán, del Institutu Oceanográficu Español, que va dar una conferencia titulada “La mar de Bichos, una introducción a la ecoloxía acuática microbiana”. L’horariu de les charres ye les 19:30 hores.

La Oficina de Política Llingüística del Principáu (OPL) ta acabante d’estrenar esti llunes la so páxina web, desendolcada pol grupu Asturies.com, na que se ufierten desplicaciones del so trabayu institucional y de les instituciones que depende d’ella como l’Observatiriu de Política Llingüística o la Xunta Toponimia. Na web, de factura cenciella y direuta ufiértense los documentos políticos y llegales que tienen de ver cola aición de gobiernu de la Oficina, ente los que se puen alcontrar l’Acuerdu de Gobiernu ente’l PSOE y IX-BA, nel so apartáu dedicáu a la «Política llingüística y normalización de la llingua asturiana» (Asturianu), el Plan de Normalización Social del Asturianu 2005-2007 o-l Presupuestu mesmu de la Oficina de Política Llingüística ente 2004 y 2007.

Con un diseñu tamién cenciellu y direutu ta acabante d’estrenar la so web (que llevaba en construcción bien d’años) el selmanariu Les Noticies. Xunta delles de les noticies que se van espublizar na edición impresa d’esti xueves pue consultase la hemeroteca completa de la publicación impresa dende’l so aniciu.

Web de la OPL