Tecnoloxía

Los usuarios de Tuenti, una les redes sociales más populares d’España sobre too ente los adolescentes y la moceedá, disponen dende güei d’una versión en catalán, otra en gallego y una tercera n’euskera. A primera hora, esperaben proporcionar esti servicio al 15% de los sos usuarios pa dir depués espardiéndolo al resto.

Amás tornar al catalán, el gallegu y l’euskera les ferramientas de la web, el serviciu d’asistencia a los usuarios tamién va atender en tols llingües oficiales del Estáu les sos comunicaciones.

Una bayura de medios dixitales y blogs españoles, ente los que s’alcuentra Asturnews, vienen acabantes esti martes d’asoleyar un manifiestu na defensa defensa de los drechos fundamentales n’internet y escontra la llei d’economía sostenible del Gobiernu qu’ufre al Ministeriu de Cultura la posibilidá torgar una páxina web ensin intervención xudicial.

El Manifiestu foi asoleyáu esti martes 2 d’Avientu pela mañana simultáneamente en castellán, inglés, catalán, gallegu y asturianu, y reproduse darréu na nuesa llingua:

Manifiestu “Na defensa de los drechos fundamentales n’internet”

Por mor de la inclusión nel Anteproyectu de Llei d’Economía sostenible de modificaciones llexislatives que cinquen al llibre exerciciu de les llibertaes d’expresión, información y el drecho d’accesu a la cultura al traviés d’Internet, los periodistes, bloggers, usuarios, profesionales y creadores d’internet manifestamos la firme oposición de nueso al proyectu, y declaramos que…

1.- Los drechos d’autor nun puen allugase penrriba de los drechos fundamentales de los ciudadanos, como’l drecho a la privacidá, a la seguridá, a la presunción d’inocencia, a la tutela xudicial efeutiva y a la llibertá d’espresión.

2.- La suspensión de drechos fundamentales ye y tien seguir siendo competencia dafechu del poder xudicial. Nin un pieslle ensin sentencia. Esti anteproyectu, a la escontra de lo afitao nel artículu 20.5 de la Constitución, dexa nes manes d’un muérganu non xudicial -un organismu dependiente del Ministeriu de Cultura-, la potestá de torgar a los ciudadanos españoles l’accesu a cualaquier páxina web.

3.- La nueva llexislación fadrá xurdir inseguridá xurídica en tol sector tecnolóxicu español, perxudicando ún de los pocos campos de desendolcu y futuru de la nuesa economía, atapeciendo la creación d’empreses, inxertando torgues a la llibre competencia y ralentizando la so proyección internacional.

4.- La nueva llexislación propuesta amenaza a los nuevos creadores y atapecer la creación cultural. Con Internet y los sucesivos avances tecnolóxicos democratizose dafechu la creación y emisión de contenidos de toa mena, que ya nun provienen prevalentemente de les industries culturales tradicionales, sinon de bayura de fontes diferentes.

5.- Los autores, como tolos trabayadores, tienen drechu a vivir del so trabayu con nueves idegues creatives, modelos de negociu y actividaes asociaes a les sos creaciones. Intentar caltener con cambios llexislativos a una industria obsoleta que nun ye a adaptase a esta nueva arrodiada nun ye nin xusto nin realista. Si’l so modelu de negociu se basaba nel control de les copies de les obres y en Internet nun ye posible ensin vulnerar drechos fundamentales, deberíen buscar otru modelu.

6.- Consideramos que les industries culturales necesiten pa sobrevivir alternatives modernes, eficaces, creyíbles y asequibles y ayafadices pa los nuevos usos sociales, en llugar de limitaciones tan desproporcionades como ineficaces pa la fin que dicen perseguir.

7.- Internet ha funcionar de forma llibre y ensin interferencies polítiques alitaes por sectores que van a la gueta perpetuar obsoletos modelos de negociu ya imposibilitar que’l saber humanu siga siendo llibre.

8.- Desiximos que’l Gobierno garantice por Llei la neutralidá de la Rede n’España, ante cualaquier presión que puea producise, como marcu pal desendolcu d’una economía sostenible y realista de cara al futuru.

9.- Proponemos una verdadera reforma del drecho de propiedá intelectual empobinada al so fin: tornar a la sociedá’l conocimientu, promover el dominiu públicu y llimitar los abusos de les entidaes xestores.

10.- Na democracia les lleis y les sos modificaciones han aprobase tres del oportunu alderique públicu y consultando enantes a toles partes implicaes. Ye inaceptable que se faigan cambios llexislativos que cinquen a drechos fundamentales nuna llei non orgánica y que trata d’otra estaya.

L’asociación “Softastur”, encargada de la creación de software n’asturianu, ta acabante anunciar los datos de descarga del sistema operativu Ubuntu, tornáu por esta organización al asturianu. El 29 d’ochobre salió Ubuntu 9.10 Karmic Koala, lo que provocó que l’usu diariu d’Ubuntu n’asturianu españe de manera ablucante y constante, hasta algamar cuasi 1.500 usuarios d’esti sistema.

Col sistema operativu Ubuntu pue facese cualesquier xera, como restolar per Internet, ver videos, oyir música, escribir documentos, mandar y recibir emails, ver y editar semeyes, descargar música y películes, chatear… y too ello n’asturianu, ensin virus y de baldre.

Les xornaes van facese nos locales de la Xunta pola Defensa de la Llingua Asturiana n’Uviéu, na cai la Gascona 12, Baxu A. A elles tán convidaes toles persones interesaes y toes aquelles qu’amás quieran aprovechar pa instalar nel so ordenador esti sistema operativu, n’asturianu y basáu nel software llibre. Güei vienres, a les siete, va dase charra d’averamientu a Ubuntu y al software llibre. Mañana sábadu, ente les 9 y les 14 hores y de 15 a 21 hores, va facese’l taller d’instalación d’Ubuntu.

Softastur, col sofitu de la Xunta pola Defensa de la Llingua Asturiana, va faer unes Xornaes d’instalación de softwarellibre n’asturianu, esta fin de selmana.

Les Xornaes van facese dos díes, vienres y sábadu. El primer día va facese una charra pa esplicar en qué consiste Ubuntu, y tamién van solucionase toles duldes que se puedan tener sobre la instalación y l’usu del sistema operativu. El segundu día va ser el taller d’instalación.

Esta actividá ye de baldre y ta abierta a tol mundu. Namás hai que traer el ordenador portátil o la CPU.

La versión va tar disponible pa los usuarios de cualesquier sistema operativu a partir de la versión 3.2 de OpenOffice.org, que s’espublizará en próximes feches.

El colectivu de voluntarios Softastur ta acabante de completar la torna al asturianu de la suite ofimática OpenOffice.org. La versión nueva tará a disposición de los usuarios de cualisquier sistema operativu (GNU/Linux, Windows, Mac Os, etc) a partir de la versión 3.2 d’esti paquete de ferramientes informátiques, que s’espublizará en próximes feches.

OpenOffice.org ye anguaño el principal competidor de la suite ofimática privativa Microsoft Office, y la so penetración vien medrando de forma bultable nos años últimos, especialmente nel mercáu empresarial, profesional y alministrativu. Los últimos estudios espublizaos coinciden en que na redolada’l 15% de los usuarios de Windows nel mundu tienen instaláu esti paquete (http://acurti.es/Eha), y ye la opción mayoritaria en sistemes GNU/Linux.

La so traducción al asturianu supunxo más de dos años de trabayu pa los voluntarios de Softastur, nel que contaron col conseyu de l’Academia de la Llingua Asturiana. La torna d’Open Office ye, además, el segundu proyeutu de mayor volume completáu pol colectivu, tres de la distribución Ubuntu del sistema operativu GNU/Linux.

Cola próxima espublización de la versión 3.2 de OpenOffice.org, los usuarios qu’asina lo deseen van poder contar con un procesador de textos (Writer), la fueya de cálculu (Calc) o el programa d’elaboración de presentaciones (Impress), ente dellos otros recursos, dafechu n’asturianu.

OpenOffice.org surdió de la suite StarOffice, desarrollada por StarDivision, que foi alquirida en 1999 por Sun Microsystems. Nel añu 2000, lliberóse’l so códigu fonte pa tentar de facer frente a Microsoft Office. Anguaño, el so códigu fonte distribúise embaxo llicencia LGPL y pue descargase de baldre dende’l sitiu n’internet openoffice.org. La suite compónse del procesador de textos Writer, la fueya de cálculu Calc, la ferramienta de presentaciones Impress, la base de datos Base, l’editor de gráficos Draw y l’editor de fórmules matemátiques Math.

Unidá Nacionalista Asturiana fae un llamamientu pa que’l Gobiernu asturianu nun imponga sistemes operativos propietarios y faiga un apueste claru pol software llibre dientro del desenvolvimientu del Programa Escuela 2.0.

Unidá Nacionalista Asturiana (UNA), al traviés del so voceru Faustino Zapico, amosó l’alcuerdu con l’usu de sistemes operativos llibres ya que “garantiza una meyor optimización de los recursos financieros, permitiendo que col mesmu coste económicu estes polítiques d’introducción de les nueves tecnoloxíes na escuela asturiana puedan algamar meyores resultaos. Dientro del Estáu español hai exemplos d’estes polítiques venceyaes al software llibre como ye’l casu de la Comunidá Autónoma d’Extremadura, na que gobierna’l PSOE”.

Según UNA el Gobiernu d’Extremadura lleva años mandándose de soluciones tecnolóxiques llibres, cola implantación na escuela d’una distribución propia, LinEX, basada en GNU/Linux, con unos “resultaos granibles nel planu económicu, tecnolóxicu, y educativu, siendo un referente internacional nesti campu. Representantes d’esta alministración tienen reconocío la imposibilidá de desenvolver plenamente estes polítiques ensin soluciones llibres”.

Los nacionalistes consideren que mandase de software llibre permite un aforru económicu significativu, amás de garantizar la independencia tecnolóxico a la que tán obligaes les alministraciones públiques. Otru de los beneficios ye la xeneración d’un texíu tecnolóxicu propiu venceyáu al desenvolvimientu y al mantenimientu d’aplicaciones de códigu fonte abiertu.

Zapico afirmó que nel casu d’Asturies “nun se puede escaecer que l’usu d’estes tecnoloxíes permitiría l’usu d’un sistema operativu 100% n’asturianu gracies al trabayu desinteresáu de la comunidá Softastur. Una xera reconocidá y pervalorada pola comunidá internacional d’Ubuntu que destacó va poco lo muncho que-yos prestaba que fuere una llingua minorizada como l’asturiana una de les 25 del mundiu totalmente implementada, al mesmu nivel que castellano, inglés, francés, portugués o catalán”. UNA considera que’l “Gobiernu asturianu nun puede marafundiar dinero de los contribuyentes en sistemes operativos propietarios que nun xeneren riqueza n’Asturies, cola implantación de software llibre nes escueles taríemos invirtiendo na creación d’emplegu, tecnoloxía y conocimientu n’Asturies” concluyó Zapico.

Mentantu’l presidente de Microsoft presentaba’l nuevu sistema operativu de la firma en Nueva York, la presidenta de Microsoft Ibérica, l’asturiana María Garaña, ya lo ficiera en Sietes, conceyu Villaviciosa, delles hores enantes afitando que ye’l meyor sistema operativu de tola historia de la compañía.

Pa sofitala en Sietes, un vecín amosó como axuntar delles fotos nuna panorámica en dellos clics, al tiempu que dexaba bien a les clares que nun sabía un res d’informática, nun tonu simpáticu que fizo afayase a los periodistes qu’enllenaben la sala de la Casa del Horru de Sietes, que dende güei ye un nuevu centru Innova.

La presidenta de Microsoft Ibérica desplicó que s’escoyera Sietes pal llanzamiento n’España del sistema operativu, nun sólo pol nome, sinon tamién porque yera l’escenariu perfectu para dexar nidies les facilidaes qu’ufre Windows 7 a les personas qu’enxamás tuvieron contatutu cola informática.

La Conseyera d’Alministraciones Públicuqes del Principáu d’Asturies, Ana Rosa Migoya, tamién faló na presentación de Windows 7 desplicando l’apueste del Gobiernu asturianu poles nueves tecnoloxíes en tolos ámbitos.

Esti sábadu 17 d’ochobre a les 10:30 la Plaza’l Güevu de Villaviciosa va ser el puntu de reunión pa tolos que quieran participar nuna actividá cola que Sofastur fai en Sietes campaña de software llibre a la escontra de la de Microsoft Windows 7 nesi pueblu maliayu.

El colectivu de voluntarios Softastur, sofitaos por Asturlinux y l’equipu llocal d’usuarios d’Ubuntu p’Asturies, entamen un taller llúdicu tocante al Software Llibre en xeneral y GNU/Linux en particular.

Durante el taller, amás de compartir conocimientos, esperiencies y duldes, grabaráse un videu promocional de GNU/Linux pa destacar les bondaes d’esti sistema frente a otros privativos, como sátira de la campaña que vien faciendo la multinacional estaunidense Microsoft pa la versión nueva del so sistema privativu Windows.

Softastur, yá fuera de toles connotaciones étiques que conlleva l’usu del Software Llibre, quier destacar la necesidá d’usar nos equipos informáticos un sistema estable, robustu y seguru. Dalgo que col software privativu ye dificil d’asegurar, al nun facilitar el códigu y al nun ser l’usuariu propietariu del software qu’instala na so máquina.

El fechu de que GNU/Linux pueda obtenese llegalmente de baldre, que nun-y afecten los virus, ya son unos importantes argumentos a favor d’esti sistema llibre, pero Softastur quier destacar la importancia de disponer de más de 200 llingües pal interfaz del sistema, ente los que s’alcuentra l’asturianu, consideráu pola comunidá de desendolcadores como una de las 26 llingües más desarrollaes del sistema, xunto col francés, castellanu, inglés, catalán o chinu entre otres.

Softastur quier convidar tanto a usuarios de Software Llibre como a primerizos a participar d’esti día en Sietes. Los vídeos que van grabase durante l’actividá van amosase na páxina web www.sietesunpuebludespertos.com

Web de softastur

El Club de Prensa Asturiana de La Nueva España va acoyer güei xueves, a les siete la tarde, la presentación de la Comunidá Asturix de distribución Linux . Na presentación van tratase temes como’l Software llibre, con una presentación multimedia: “Asturix: dende Asturies pal mundu” y una Demo Asturix: “presentación de la nueva versión de Business 2.0.”

Páxina web d’Asturix