Tecnoloxía

El Garrapiellu quier facer un “Garrpiellu 2.0” y pa ellos va xubir al so blogue, elgarrapiellu.blogspot.com, una entrevista colos ganadores del XX Concursu de Cuentos Curtios El Garrapiellu. Esti concursu tuvo’l sofitu de la Conseyería de Cultura y Deporte del Principáu d’Asturies.

Con estes entrevistes a Denis Soria Fernández y Pablo Rodríguez Alonso va abrise una nueva estaya que ye, según espliquen, “la de llevar a El Garrapiellu al sieglu XXI y tener presencia en redes sociales como Facebook onde yá cuenta con cerca de dos millares de seguidores”.

Na so páxina nesta rede social, l’asociación xixonesas ta faciendo “un percorríu pel ricu patrimoniu gastronómicu asturianu”.

Va unos díes Radio Sele anunciaba un alcuerdu pol qu’emitiría los sos programes al traviés de la emisora de Radio QK, dempués de que’l Gobiernu d’España, al traviés de la Dirección de Telecomunicaciones, ordenara quitar l’antena d’esta emisora, que lleva 25 años emitiendo n’asturianu. Agora ye esta emisora, Radio QK, la que recibe l’amenaza del gobiernu central de recibir una multa de mediu millón d’euros si nun retira l’antena de les sos instalaciones, según acaben d’informar los responsables de QK.

Esti martes presentábase nes Xornaes Internacionales d’Estudiu la revista dixital “Ciencies”, un proyectu a comuña ente la Universidá d’Uviéu y l’Academia de la Llingua Asturiana que quier afondar nes posibilidaes del asturianu nel campu de la ciencia y la tecnoloxía, dende un puntu de vista divulgativu. El so director Carlos Lastra, esplicó los detalles d’esta publicación que s’abre con dellos artículos o reportaxes sobre’l Campu San Francisco d’Uviéu, les llibélules d’Asturies, el cáncer y los xenomes, les races autóctones y los nanomateriales, ente otres temes.

La revista va espublizase namás en versión dixital, que va poder consultase dende les páxines de l’Academia y de la Universidá.

Descarga la revista “Ciencies” de baldre

Esta tarde entamen n’Uviéu les Xornaes Internacionales d’Estudiu, qu’esti añu se centren na organización d’un Conceyu Internacional de Toponimia y Antroponimia. Sigui esti eventu organizáu pola Academia de la Llingua Asturiana dende la canal d’Asturnews en Twitter, con semeyes y actualizaciones sobre lo que ta asociendo en tiempu real.

Canal d’Asturnews en Twitter

Softastur informó que la llingua asturiana acaba d’algamar el tercer puestu nel llistáu mundial de llingües a les que se traduz el sistema operativu Ubuntu, per delantre de llingües como’l francés, rusu, alemán, italianu o castellán. Na versión anterior, (Ubuntu 11.04) l’asturianu ocupaba’l 6ᵁ puestu.

El programa Al aldu, de la TPA, entamó esti llunes la emisión cola posibilidá de sotítulos pa persones con deficiencies auditives parciales o totales, dientro del procesu que ta llevando a cabu la canal asturiana p’adaptase a la normativa esistente pal accesu de persones con minusvalíes a conteníos audiovisuales.

Al Aldu, programa con cinco secciones estremaes sobre deportes, noticies, monólogos, cocina y axenda cultural, emítese de llunes a vienres a les 9:15 hores, y repítese n’estremaos horarios na fin de selmana. A piques de cumplir cinco años n’antena ye ún de los programes más veteranos de la canal.

L’aplicación “Ayures” permítenos conocer la toponimia en cualesquier llugar d’Asturies y ta desendolcada pol avilesín David Rodríguez Álvarez, y el lleonés Ayoze Roberto Bernardo. L’aplicación funciona n’iPhone y Android y ye frutu de la collaboración con Softastur, la Oficina de Política Llingüística y el trabayu de la Xunta de Toponimia. Na primer versión de l’aplicación sólo funciona con twitter, onde pueden compartise les llocalizaciones, pero nes futures versiones contémplase la “integración” con Facebook, Google+ y la posibilidá d’unviar una semeya dende’l móvil del usuariu, asina como feedback de los usuarios pa nuevos puntos. L’aplicación yá puede descargase na Apple Store o nel market de Android.

Ayures llocaliza la posición esacta d’un usuariu, y avisa a tolos contautos del usuariu vía twitter. L’aplicación unvía-yos un enllaz coles coordenaes del sitiu, pa que seya fácilmente reconocible nun mapa, y un testu col Topónimu Oficial de la llocalización. La peculiaridá d’esta ferramienta, ye que la llocalización fai usu de la Nueva Toponimia Oficial del Principáu d’Asturies, espublizada nel BOPA ( http://acurti.es/Ort ). Esta base de datos consta de 7000 puntos de tola xeografía asturiana, y tien una llicencia llibre GPL (General Public License), que permite l’accesu al códigu a tol mundu.

L’aplicación caracterízase pola so cenciellez, usabilidá y pocu espaciu ocupáu nel móvil. L’usuariu executa l’aplicación, y ésta fai la llocalización por triangulación, amuesa una caxa de testu editable cola posición, que permite amestar más referencies o mensaxes, y mándala vía twitter a tolos contautos del usuariu.

L’aplicación consta tamién d’un hestóricu de posiciones, y la posibilidá de copiar el testu pa poder inxertalu nun mensaxe, corréu lletrónicu, documentu… Na versión Android, l’usuariu tien la opción de remanar el mapa con capa satélite, y llocalización por 3G (menos precisión) o GPS. Los contautos del usuariu, reciben el mensaxe vía twitter y la llocalización visualízase sobre un mapa.

La compañía asturiana Telecable llogró esta selmana pasada una llicencia rexonal pa desplegar la so propia rede de telefonía móvil, na puya acabante de pesllar pol Ministeriu d’Industria. Gracies a esti contratu, la empresa tecnolóxica de nueso va poder desenvolver na rexón los llamaos servicios d’última xeneración (4G), qu’ufren una conexón a internet al traviés del teléfonu a una mayor velocidá a la que puede algamar na actualidá. L’asturiana pagó na puya 708.317 euros por faese con esta llicencia, que va tener una vixencia de 20 años.

El Gobiernu central aprobó’l pasáu 29 de xunu la salida a puya del llamáu espectru radioeléctricu del país, pa partilu ente les compañíes de telecomunicaciones. Y en concretu, Telecable llogró un anchu de banda de 10 megahercios (MHz) pa la so nueva rede móvil,lo que supon llograr una vieya aspiración de la compañía de cuntar cola so propia rede de telefonía móvil. Hasta agora depende de la de Vodafone.

Telecable entró nel sector de la telefonía móvil en 2008 y güei cunta yá con casi 70.000 veceros. El so oxetivu ye algamar los 100.000 en 2014. Pa desplegar esta rede d’última xeneración, cola tecnoloxía Long Term Evolution (LTE), Telecable va invertir unos 35 millones d’euros nos próximos diez años.

A lo llargo de la mañana d’esti llunes 27 de xunu, l’Academia de la Llingua Asturiana (ALLA) abrió una páxina oficial en caúna de les dos redes sociales más importantes del mundu, Facebook y Twitter.

Un mensaxe colgáu pasaes les once de la mañana dio l’acoyida a la páxina oficial de l’Academia de la Llingua Asturiana en Facebook, comentando la institución qu’aguardaben “un meyor contautu con tolos asturianos y asturianes y cola xente interesao na llingua asturiana”, gracies a esti nuevu calce de comunicación.

Los perfiles de l’Academia pueden atopase buscando’l nome completu de la institución nel casu de Facebook y col nomatu @ALLA_ast nel casu de la rede social Twitter.

Mozilla espublizaba esti martes día 21 de xunu la versión 5 de Firefox, el restolador web más usáu n’Europa y emblema del software llibre nel mundu con delles ya importantes meyores nel rendimientu y na integración con Linux.

Les meyores que destaquen na nueva versión son: Ferramienta “Do Not Track”, cola qu’evitar el siguimientu d’usuarios por parte d’anunciantes (Permite refugar la publicidá personalizada), el sofitu p’animaciones CSS, una ameyorada la integración pa Linux, la posibilidá de camudar ente les distintes versiones disponibles nes canales de desendolcu de Firefox dientro del propiu restolador y delles meyores nel rendimientu del motor JavaScript y nel sofitu HTML 5, XHR, MathML y SMIL.

Yá puede baxase de baldre pa tolos sistemes operativos y llingües dende la direición oficial: http://www.mozilla.com/ast/firefox/

Direición pa baxase la nueva versión